ސަރުކާރުން އިސްކަންދެނީ ދުރު ހިސާބުތަކަށް ޓޫރިޒަމް ގެންދަން: ފައިސަލް

ފަތުރުވެރިކަމުގެ ސިނާއަތުގެ އިންވެސްޓްމަންޓްތައް ކުރުމުގައި އަދުގެ ސަރުކާރުން އިސްކަންދޭނީ ދުރުހިސާބުތަކަށް ކަމަށް ފަތުރުވެރިކަމާ ބެހޭ ވަޒީރު އިބްރާހިމް ފައިސަލް ވިދާޅުވެއްޖެއެވެ.

ރައްޔިތުންގެ މަޖިލީހަށް ހާޒިރުވެ، މެމްބަރުން ކުރެއްވި ސުވާލުތަކަށް ޖަވާބުދެއްވަމުން، މިނިސްޓަރު ފައިސަލް ވިދާޅުވީ، ރައީސް ޑރ.މުއިއްޒުގެ ސަރުކާރުން ފަތުރުވެރިކަމުގެ ސިނާއަތުގެ އިންވެސްޓްމަންޓްތައް ކުރުމުގައި އެންމެބޮޑު އިސްކަމެއްދޭނީ ދުރު ހިސާބު އަތޮޅުތަކުގެ ރަށްތަކަށް ކަމަށެވެ.

ފައިސަލް ވިދާޅުވީ ރާއްޖޭގެ ދުރު ހިސާބުތަކުގައި ރިސޯޓް ތަރައްޤީކުރުމަށް ބޭނުންވާ އިންވެސްޓްމަންޓްތައް ހޯދުމަށް ސަރުކާރުން މަސައްކަތްކުރަމުންދާކަމަށެވެ. މިގޮތުން އިންވެސްޓަރުން ހޯދުމަށް ކުރިއަށްއޮތް އަހަރު އެކިއެކި ޤައުމުތަކުގައި އިންވެސްޓްމަންޓް ފޯރަމްތައް ބޭއްވުމަށް ނިންމާފައިވާކަމަށް މިނިސްޓަރު ވިދާޅުވިއެވެ.

ރައީސުލްޖުމްހޫރިއްޔާގެ ރިޔާސީ ވައުދުތަކުގެ ތެރެއިން ޓޫރިޒަމް ސެކްޓަރއަށް ހުރި ގިނަ ވައުދުތަކަކީ ޓޫރިޒަމް ޑިވެލޮޕްމަންޓަށް، ހާއްސަކޮށް ދިވެހިރާއްޖޭގައި ޓޫރިޒަމް ނެތް ތަންތަނަށް ވެވަޑައިގެންފައިހުރި ވައުދުތައް.

ފައިސަލް ވިދާޅުވިއެވެ

މިނިސްޓަރު ވިދާޅުވީ ރައީސްގެ އެ ވައުދުފުޅު ފުއްދުމަށްޓަކައި ޓޫރިޒަމް ނެތް ތަންތަނަށް އިންވެސްޓަރުން ހޯދުމަށް ތައިލެންޑް، ސިންގަޕޫރު، ދުބާއީ އަދި އިންޑިއާގައި އަންނަ އަހަރުެގ ކުރީކޮޅު އިންވެސްޓަރުންނަށް ހާއްސަކޮށް ފޯރަމްތަކެއް ބޭއްވުމަށް ނިންމާފައިވާކަމަށެވެ. މިގޮތުން އަންނަ އަހަރުގެ ފުރަތަމަ އަދި ދެވަނަ ކުއާޓަރުގައި މި ފޯރަމްތައް ބޭއްވިގެންދާނޭކަމަށް މިނިސްޓަރު ވިދާޅުވިއެވެ.

ފައިސަލް އިތުރަށް ވިދާޅުވީ ހދ.ހަނިމާދޫގައި ތަރައްޤީކުރަމުންދާ އެއާޕޯޓްގެ މަސައްކަތް ނިމެންވާއިރަށް އެ ސަރަހައްދުގެ ޓޫރިޒަމް ކެޕޭސިޓީ 4،000 ބެޑަށް ފުޅާކުރުމަކީ ސަރުކާރުގެ އަމާޒުކަމަށެވެ.

ރާއްޖޭގައި ރިސޯޓް ހެދުމަށް ދޫކޮށްފައިވާ ރަށްތަކުގެ ތެރެއިން މިހާތަނަށް 58 ރަށެއް ތަރައްޤީ ނުކުރެވި އޮތްކަން ފާހަގަކުރައްވަމުން ފައިސަލް ވިދާޅުވީ، މީގެ ތެރެއިން ގިނަ ރަށްތައް ހުރީ ހދ އަތޮޅުގައި ކަމަށެވެ.