ޚިދްމަތަށް ބުރޫ ނާރާނެ ހެން ޚިދްމަތް ދިނުމަށް ސްޓެލްކޯ އިން ޓީމެއް އެކުލަވައިލައިފި
ޢާންމުންނަށް ދޭ ޚިދްމަތަށް ބުރޫ ނާރާނެހެން މަސައްކަތް ކުރިއަށް ގެންދިޔުމަށް ޚާއްސަ ޓީމެއް ސްޓޭޓް އިލެކްޓްރިކްސް ކޮމްޕެނީ (ސްޓެލްކޯ) އިން އުފައްދައިފިއެވެ.
ސްޓެލްކޯއިން ބުނެފައިވަނީ ހޫނު މޫސުމާއި ގުޅިގެން ރެކޯޑް އަދަދަކަށް ކަރަންޓު ބޭނުންކުރާ މިންވަރު އިތުރުވެފައިވާތީ އެ ކުންފުނިން ރައްޔިތުންނަށް ދެމުންގެންދާ ޚިދުމަތްތައް މެދުނުކެނޑި ފޯރުވައިދިނުމަށް ކުރަމުންދާ މަސައްކަތްތައް އިތުރަށް ފުރިހަމަކޮށް ހަރުދަނާ ކުރުމަށްޓަކައި ޚާއްސަ ޓީމެއް އެކުލަވާލައިފައިވާ ކަމަށެވެ.
އަދި ސްޓެލްކޯގެ މެނޭޖިންގ ޑިރެކްޓަރު އަޙްމަދު ޝަރީފްގެ ބެއްލެވުމުގެ ދަށުން ޚާއްސަ ޓީމެއް އެކުލަވާލައި އެ ޓީމުގެ މަސައްކަތްތައް އިއްޔެ ވަނީ ފަށާފައި ކަމަށްވެސް އެކުންފުނިން ބުނެފައިވެއެވެ.
ސްޓެލްކޯއިން ބުނީ މިދިޔަ ފެބްރުއަރީއާއި މާރިޗު އަދި އެޕްރީލް މަހުގެ ލޯޑު ޓްރެންޑު ދައްކާ ގޮތުން މާލޭ ސަރަހައްދުގެ އެވްރެޖް ޕަވަރ ޔޫސޭޖް (އެވްރެޖް އެނާރޖީ ކޮންސަމްޕްޝަން) ދަނީ ދުވަހެއް ދުވަހަކަށް މަތިވަމުން ކަމަށެވެ.
އެވްރެޖްކޮށް ބަލާނަމަ ދުވާލާއި ރޭގަނޑުގެ ހުރިހާ ވަގުތެއްގެވެސް އެހެން މަސްތަކާ އަޅާ ބަލާއިރު ކަރަންޓު ބޭނުން ކުރާ މިންވަރު އިތުރުވެފައިވާ ކަމަށް ސްޓެލްކޯއިން ބުންޏެވެ. އެހެންކަމުން މި ދުވަސްވަރު ކަރަންޓު އިގުތިސާދު ކުރުމަށް ޚާއްސަ ސަމާލުކަމެއް ދިނުމަށް އެ ކުންފުނިން އިލްތިމާސް ކޮށްފައިވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
