އެމްޓީސީސީއަށް ލޯޑު ބޮޑުވާ ވަރަށް މިހާރުވެސް ވަނީ މަސައްކަތް ޙަވާލުކޮށްފަ: އަސްލަމް
މޯލްޑިވްސް ޓްރާސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އަށް އޯވާލޯޑް ވާ ވަރަށް މިހާރުވެސް އެކި މަޝްރޫއުތައް ހަވާލުކުރެވިފައި ވާ ކަމަށް ޕްލޭނިން މިނިސްޓަރު މުޙައްމަދު އަސްލަމް ވިދާޅުވެއްޖެ އެވެ.
އަސްލަމް މިފަދައިން ވިދާޅުވެފައި ވަނީ ރައްޔިތުންގެ މަޖިލީހުގެ މިއަދުގެ ޖަލްސާއަށް އެމަނިކުފާނު ހާޒިރުކޮށް މަޖިލީހުގެ އުނގޫފާރު ދާއިރާގެ މެމްބަރު މުހައްމަދު ވަހީދު (ވައްޑެ) ކުރެއްވި ސުވާލަކަށް ޖަވާބުދެއްވަމުން ނެވެ.
މެމްބަރު ވަހީދުގެ ސުވާލުގައި ވަނީ މިނިސްޓްރީން މަޝްރޫއުތައް ހިންގަނީ ބަޖެޓުކުރެވޭ ތަރުތީބުންތޯ އައްސަވާފަ އެވެ. އަދި މަޝްރޫއުތައް ހިންގެވުމުގައި ރަށްތަކަށް ދިމާވެފައިވާ މައްސަލަތަކުގެ ކުޑަ ބޮޑުމިނަށް ބައްލަވަނީ ކިހާ މިންވަރަކަށް ތޯ ސާފުކޮށްދެއްވުމަށް މެމްބަރު އެދިވަޑައިގެންނެވި އެވެ.
މެމްބަރުގެ އެ ސުވާލަށް ޖަވާބުދެއްވަމުން މިނިސްޓަރު ވިދާޅުވީ މަޝްރޫއުތައް ބޭނުންވާ އެންމެ ހަލުވި މިނުގައި ނުދާކަން ފާހަގަކުރެވޭ ކަމަށެވެ. އެގޮތުން ބަޖެޓުގައި ކަމެއް ހިމެނި ނަމަވެސް ކަނޑައެޅިގެން މަޝްރޫއުތައް ހިންގަނީ ބަޖެޓު ތަރުތީބުން ނޫންކަމަށް މިނިސްޓަރު ވިދާޅުވި އެވެ.
އެކަން ފާހަގަކޮށް މިނިސްޓަރު ވިދާޅުވީ ރާއްޖޭގެ ރަށްތަކުގައި ހިންގާ ގިނަ މަޝްރޫއުތައް ހަވާލުކުރަނީ އެމްޓީސީސީއާއި ކަމަށެވެ. އެގޮތުން މިހާރުވެސް އެމްޓީސީސީއަށް ލޯޑު ބޮޑުވާ ވަރަށް މަސައްކަތް ހަވާލުކުރެވިފައިވާކަން މިނިސްޓަރު ފާހަގަކުރެއްވި އެވެ. މީގެ ކުރިން މަޖިލީހަށް ހާޒިރުކޮށް ސުވާލުކުރި ޖަލްސާއެއްގައި މިނިސްޓަރު ވަނީ އެކަން ފާހަގަކުރައްވާފަ އެވެ.
"އެމްޓީސީސީ، އެންމެ ގިނައިން ސިވިލް ވޯކްސް ކުރާ ފަރާތަކީ އެއީ. ކިތަންމެ މަސައްކަތެއް ހަވާލުކުރި ކަމުގައި ވިޔަސް، ކުރިން ދުވަހަކު ވެސް އަޅުގަނޑު މި ވާހަކަ މަޖިލީހުގައި ދެންނެވިން، އެމްޓީސީސީވެސް އޯވަލޯޑްވޭ އަސްލު. އަޅުގަނޑު ދަންނަވާފާނަން މި ވަގުތުވެސް 221 އެކި ކަހަލަ އިންފްރާސްޓްރަކްޗާ މަސައްކަތް ރާއްޖޭގައި. ޕްލޭންކޮށްފައި އޮތް މަސައްކަތްތަކާ އެކީގައި 541 މަސައްކަތް އެބޮތް. އެ ހުރިހާ މަސައްކަތެއް ކުރުމުގައި އަޅުގަނޑުމެންނަށް ގޮންޖެހުންތަކެއް އެބޮތް. އަޅުގަނޑު އުންމީދު ކުރާހާ ބާރު މިނުގައި ހަމަ މަސައްކަތްތައް ކުރިއަކަށް ނުއެއް ދޭ"
ޕްލޭނިން މިނިސްޓަރު އަސްލަމް
މިނިސްޓަރު ވިދާޅުވީ ތަރައްގީގެ ބައެއް ކަހަލަ މަޝްރޫއުތައް އަވަސް ކުރެވޭނީ ރައްޔިތުންގެ ވިސްނުން ވެސް ބަދަލުކުރެވިގެން ކަމަށެވެ.
އެގޮތުން ކޮންމެ ރަށެއްގައި ބޮޑު ހިލަ ޖަހަން ޖެހޭ އުސޫލު ބަދަލުކޮށް، އެ ނޫން ގޮތްތަކަށް ރައްޔިތުން އަހުލުވެރިވެ، އެ ނޫން ގޮތްތަކަށް ވިސްނުން ބަދަލުކޮށްފި ކަމަށްވާނަމަ އެފަދަ މަޝްރޫއުތައް ހިންގަން ސަރުކާރަށްވެސް ފަސޭހަވެގެންދާނެކަމަށް މިނިސްޓަރު ވިދާޅުވި އެވެ.
އޭގެ އިތުރުން މިނިސްޓަރު ފާހަގަކުރެއްވީ މަޝްރޫއުތައް ކުރިއަށް ގެންދާއިރު މައްސަލައިގެ ކުޑަ ބޮޑުމިނަށް ސަރުކާރުން ބައްލަވާކަމަށެވެ. އަދި ބޮޑެތި މައްސަލަތައް ދިމާވެފައިވާ ކަންކަމަށް އަވަސް ހައްލު ހޯދާދިނުމަކީ ސަރުކާރުން މަޝްރޫއުތައް ތަރުތީބު ކުރުމުގައި ބަލާ މިންގަނޑެއް ކަމަށް މިނިސްޓަރު ވިދާޅުވި އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
