ފުލެޓެއް ހުރި މީހަކަށް ފުލެޓެއް ލިބިގެން ނުވާނެ، އެއީ ސާފުކޮށް ބަޔާންކޮށްފައިވާ ކަންކަން: އަސްލަމް

ސޯޝަލް ހައުސިންގް ޔުނިޓްގެ ދަށުން ދޫކުރެވޭ ފުލެޓްތައް މީހުންނަށް ދިނުމުގެ އުސޫލުތަކެއް ކަނޑައެޅިފައިވާ ކަމަށާ، އެ އުސޫލުގެ ދަށުން ފުލެޓެއް ހުރި މީހަކަށް ފުލެޓެއް ނުދެވޭނެ ކަމަށް ހައުސިންގް މިނިސްޓަރު މުހައްމަދު އަސްލަމް ވިދާޅުވެއްޖެއެވެ.

މިހާރު ކުރިއަށްދާ ރައްޔިތުންގެ މަޖިލީހުގެ ޖަލްސާގައި ރައްޔިތުންގެ މަޖިލީހުގެ މާފަންނު މެދު ދާއިރާގެ މެންބަރު އިބްރާހީމް ރަޝީދު (ބޮންޑެ) ވަނީ ބޯހިޔާވަހިކަމުގެ މަޝްރޫޢުގެ ދަށުން ފުލެޓުތައް އެކިފަރާތްތަކަށް ދޫކުރާއިރު، ގެންގުޅޭ އުސޫލުތަކާއި، ކެޓަގަރީތައް ފުލެޓް ދޫކުރާ ކުންފުނިތަކަށް އަންގާފައިވާނެ ތޯ ސުވާލު ކުރައްވާފައެވެ.

ބޮންޑެގެ ސުވާލަށް ޖަވާބު ދެއްވަމުން އަސްލަމް ވިދާޅުވީ، ސޯޝަލް ހައުސިންގް ގެ ކެޓަގަރީތަކާއި، އެ ކެޓަގަރީގެ ތަކަށް މާކްސް ލިބޭނެގޮތް ވަރަށް ތަފްސީލްކޮށް ލިޔެ އެކަން ބަޔާންކޮށްފައިވާނެ ކަމަށެވެ. އަދި ކުންފުނި ތަކުން އަޅާ ފުލެޓްތައް ކުންފުނީގެ މުވައްޒަފުންނަށް ދިނުމުގައިވެސް އެ އުސޫލުގެ މަތިން ފުލެޓް ހަވާލުކުރުމަށް އަންގާފައިވާނެ ކަމަށް އަސްލަމް ވިދާޅުވި އެވެ.

ކުންފުނިތަކުން އިމާރާތް ކުރާ ފުލެޓްތައް ކުންފުނީގެ މުވައްޒަފުންނަށް ދިން ނަމަވެސް އެ ކްރައިޓީރިއާ ތަކަށް ފެތެންޖެހޭނެ. އަޅުގަނޑަށް މައްސަލައެއް ނެތް ކުންފުންޏެއްގެ ޚަރަދުގައި އަޅާ އިމާރާތެއްގައި އެ ކުންފުނީގެ މުވައްޒަފުންނަށް ބައެއް ޚާއްސަ ކުރުމުގެ. އެހެންނަމަވެސް، އެ ކްރައިޓީރިއާ އަށް ފެތެން ވާނެ. ސޯޝަލް ކެޓަގަރީއަށް ފެތޭ މީހަކަށް ސޯޝަލް ހައުސްއެއް ލިބެންޖެހޭނީ. އަދި ފުލެޓެއް ހުރި މީހަކަށް ވެސް ފުލެޓެއް ލިބިގެން ނުވާނެ. އެއީ ސާފުކޮށް އަޅުގަނޑުމެން ބަޔާންކޮށްފައި، ކޮމިޔުނިކޭޓްވެސް ކޮށްފައި އޮންނަ ކަމެއް.

މިނިސްޓަރު އަސްލަމް ވިދާޅުވީ، އެ އުސޫލާއި ޚިލާފަށް ކަމެއް ކޮށްފައިވާކަމުގެ މައުލޫމާތު މިނިސްޓްރީއަށް ލިބިއްޖެ ނަމަ އެކަންވެސް ބަލާނެ ކަމަށާ، މިހާރުވެސް އެފަދަ މައްސަލައެއް ފެންމަތިވެ، އެކަން ބަލަމުން އަންނަ ކަމަށެވެ. އަދި، އުސޫލާއި ޚިލާފަށް ފުލެޓް ދިނުމަކީ މިނިސްޓްރީން އެއްގޮތަކަށްވެސް އަންގައިގެން ކުރާ ކަމެއް ނޫން ކަމަށް އޭނާ ވިދާޅުވި އެވެ.

ބޮންޑެ މިފަދަ ސުވާލެއް ކޮށްފައި މިވަނީ، އާބަންކޯއިން އެ ކުންފުނީގެ އިސް ބައެއް މުވައްޒަފުންނަށް އުސޫލާއި ޚިލާފަށް ފުލެޓް ދީފައިވާ ކަމަށް ޚަބަރު ފެތުރިފައިވާ ދަނޑިވަޅެއްގައެވެ. ނަމަވެސް އެ މައްސަލާގައި އާބަންކޯއިން ވަނީ އުސޫލާއި ޚިލާފަށް ފުލެޓް ނުބަހާކަމަށް ބުނެފައެވެ.