ކޮތަޅު ބިލު އިސްލާހު ނުކޮށް މަޖިލީސް ޗުއްޓީއަށް ދަނީ

ޕްލާސްޓިކް ކޮތަޅު ބޮނޑި ޓެކްސް ނެގުން އިސްތިސްނާ ނުކޮށް ކުނި މެނޭޖުކުރުމުގެ ޤާނޫނަށް ގެނައި އިސްލާހުގެ ސަބަބުން، ކޮތަޅު ބޮނޑީގެ އަގުތައް އިންތިހާއަށް އުފުލި ރައްޔިތުންގެ ޝަކުވާ ބޮޑުވުމާއި ގުޅިގެން އެކަން އިސްލާހުކުރުމަށް މަޖިލީހަށް ހުށައަޅާފައިވާ ބިލުގެ މަސައްކަތް ނުނިންމާ މަޖިލީސް ޗުއްޓީއަށް ދާން ނިންމައިފި އެވެ.

ސަރުކާރުން ސްޕޮންސާކޮށްގެން ކުނި މެނޭޖުކުރުމުގެ ޤާނޫނަށް ހުށައެޅި އިސްލާހުގައިވަނީ ސިންގަލް ޔޫސް ޕްލާސްޓިކް ކޮތަޅުން ދެ ރުފިޔާގެ ފީއެއް ނެގުމަށް ކަނޑައަޅާފަ އެވެ. އެ އިސްލާހު ހުށައެޅިއިރު ކުނި ގާނޫނުގެ 35 ވަނަ މާއްދާއަށް އޭރު ގެނައި އިސްލާހުގައި އޮތީ 50 ކޮތަޅު ނުވަތަ އެއަށް ވުރެ ގިނަ ކޮތަޅު ހިމެނޭ ކޮތަޅު ބޮޑިން ފީ ނެގުން އިސްތިސްނާކޮށްފަ އެވެ.

އެހެން ނަމަވެސް ބިލު ފާސްކުރިއިރު އެ އިސްތިސްނާ ހިމަނާފައެއް ނުވެއެވެ. އެކަމާއި ގުޅިގެން ޕްލާސްޓިކް ކޮތަޅު ގަންނަ ކޮންމެ މަރުހަލާއެއްގައި ދައުލަތަށް ދެ ރުފިޔާ ދައްކަން ޖެހެއެވެ. އަދި އެކަމުގެ ސަބަބުން ކޮތަޅު ބޮނޑީގެ އަގުތަކަށް ވަނީ ވަރަށް ބޮޑެތި ބަދަލުތަކެއް އައިސްފަ އެވެ.

އެ މައްސަލައިގައި ރައްޔިތުންގެ ޝަކުވާ ބޮޑުވުމާއި ގުޅިގެން، އަދި ސަރުކާރަށް ގިނަ ފާޑުކިޔުންތަކެއް އަމާޒުވާން ފެށުމުން އެ މާއްދާ އަލުން އިސްލާހުކުރުމަށް މިހާރު ވަނީ މަޖިލީހަށް ހުށައަޅާފަ އެވެ.

އެ އިސްލާހުގެ ބަހުސް މިހާރު މަޖިލީހުގައި ފަށާފައިވާއިރު، އިއްޔެ ތިމާވެއްޓާއި ބެހޭ ވަޒީރު މަޖިލީހަށް ހާޒިރުކޮށް ކުރި ސުވާލުތަކަށް ޖަވާބުދެއްވަމުން ވަނީ އެ ބިލު ވީހާވެސް އަވަހަކަށް އިސްލާހުކޮށް ކޮތަޅުން ތަކުރާރުކޮށް ޓެކްސް ނެގުން ހުއްޓުވުމަށް ބިލު ފާސްކޮށްދިނުމަށް އެދިވަޑައިގަންނަވާފަ އެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި މަޖިލީހުގެ މަރަދޫ ދާއިރާގެ މެމްބަރު ވަނީ ކޮތަޅު ބިލު އިސްލާހުކޮށްފައި ނޫނީ ރައްޔިތުންގެ މަޖިލީސް ޗުއްޓީއަށް ނުދިއުމަށް އެދިވަޑައިގެންފަ އެވެ.

"މިހާރު ބަހުސްކުރެވެމުންދާ ކުނި މެނޭޖުކުރުމުގެ ބިލަށް ހުށައެޅިފައިވާ އިސްލާހުގެ މަސައްކަތް ނިމެންދެން މަޖިލިސް ޗުއްޓީއަށް ނުގޮސް ކުރިއަށް ގެންދިއުމަށް އަޅުގަނޑު ހުށައަޅަން. އިއްޒަތްތެރި މެމްބަރު ތާއީދު ކުރައްވާނެކަމަށް ހުށައަޅަން"

މަޖިލީހުގެ މަރަދޫ ދާއިރާގެ މެމްބަރު އިބްރާހިމް ޝަރީފް

މެމްބަރުގެ އެ ހުށައެޅުމާއި ގުޅިގެން މަޖިލީހުގެ ރައީސް މުޙައްމަދު ނަޝީދު ވިދާޅުވީ އެއީ މެމްބަރަށް ހުށައެޅޭނެ ކަމެއް ނޫން ކަމަށެވެ. އެ އިޚްތިޔާރު މެމްބަރަށް ލިބިގެން ނުވާކަން ތަކުރާރުކޮށް ހަނދާންކޮށްދެއްވަމުން ނަޝީދު ވިދާޅުވީ މިހާރުވެސް ތާވަލުކުރެވިފައިވާ ގޮތަށް މަޖިލިސް މާދަން ފެށިގެން ޗުއްޓީއަށް ދާނެ ކަމަށެވެ.

"އިއްޒަތްތެރި މެމްބަރަށް ސާފުކޮށް އަރުވަން ޖެހޭ އިއްޒަތްތެރި މެމްބަރަށް ހުށައެޅެން ނެތް ކަމެއް ތިޔަ ހުށައެޅުއްވީ. އެހެންވީމަ ސާފުކޮށް ދިނީ. އިރާދަކުރެއްވިއްޔާ މާދަން މި މަޖިލީސް ޗުއްޓީއަށް ދާނެ"

މަޖިލީހުގެ ރައީސް މުޙައްމަދު ނަޝީދު

އެހެންކަމުން ދެން އެ ބިލު އިސްލާހު ކުރާނީ މަޖިލީސް ޗުއްޓީއިން އެނބުރި އައިސްފަ އެވެ. އެ މުއްދަތުގެ ތެރޭގައި އަމަލުކުރެވެމުން ދާނީ މިހާރުވެސް އަމަލުކުރާ ޤާނޫނަށެވެ.

އެހެންކަމުން މަޖިލީސް ޗުއްޓީގައި އޮންނަ މުއްދަތުގެ ތެރޭގައި މިހާރުވެސް ނަގާގޮތަށް ކޮންމެ ކޮތަޅަކުން 2 ރުފިޔާގެ ފީއެއް ދައުލަތަށް ނަގަމުންދާނެ އެވެ. އަދި ކޮތަޅު ބޮނޑީގެ އަގުތައްވެސް ހުންނާނީ މިހާރު އުފުލިފައިވާ އަގުތަކުގަ އެވެ.