ޢުމްރާއިން އެނބުރި އައުމަށްފަހު ސަމާލުކަން ދޭންވީ މުހިންމު ކަންތައްތައް!

ޙައްޖުން ނުވަތަ ޢުމްރާއިން އެނބުރި އައުމަށްފަހު ބަލިތަކުން ރައްކާތެރިވުމަށް އެޅެން ހުރި ފިޔަވަޅުތައް އެޅުމަށް ސަމާލުކަން ދިނުމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން އިލްތިމާސް ކޮށްފިއެވެ.

މިކަމާއި ގުޅިގެން އެޗްޕީއޭއިން ކުރި ޓްވީޓެއްގައި އަރިދަފުސް ރޯގާ އަދި ވައިރަލް ހުމުން ރައްކާތެރިވުމަށް ޚާއްސަ ސަމާލުކަމެއް ދޭންވީ ކަންތައްތަކަށް ވަނީ އަލިއަޅުވާލައިފައެވެ.

މީގެ ތެރޭގައި:

-އަރިދަފުސް ރޯގާ ޖެހިއްޖެނަމަ ކެއްސާ، ކިނބިހި އަޅާއިރު އަނގަމައްޗާއި ނޭފަތް ނިވާކުރުން

-ޓިޝޫފަދަ ތަކެތި ބޭނުން ކުރުމަށްފަހު ރައްކާތެރި ގޮތުގައި ނައްތާލުން

-ގިނަގިނައިން ސައިބޯނި ލައިގެން އަތްދޮވުން

-ދަތުރުމަތީގައާއި ޙައްޖު އަދި އުމްރާ އަދާ ކުރުމުގައި އުޅޭ އިރު މާސްކް އަޅައިގެން އުޅުން އެދެވިގެންވޭ

-ރޯގާޖެހި ކެއްސާނަމަ، މީހުން އެއްވެ އުޅޭ ތަންތަނަށް ނުދިއުން، ޚާއްސަކޮށް މިފަދަ ތަންތަނަށް ކުޑަކުދިންނާއި އުމުރުން ދުވަސްވީ މީހުންނާއި ބަލިތައް ތަހައްމަލު ކުރަމުންދާ ފަރާތްތައް ނުދިއުން

-ރޯގާޖެހިފައިވާނަމަ ކުޑަކުދިން ކައިރިއަށް ނުދިއުން އަދި އެކުދިން އުރާ ނުހެދުން

-ހައްޖުން ނުވަތަ އުމްރާއިން އެންބުރި އަންނަތާ 14 ދުވަސް ތެރޭގައި ހުން އައުން، ކެއްސުން، ނޭވާލާ އުނދަގޫވުން، މޭގައި ރިއްސުން ފަދަ އަލާމާތެއް ފެނިއްޖެނަމަ، ލަސްނުކުރައްވާ ޑޮކްޓަރެއްގެ މަޝްވަރާ ހޯދުން

-ޑޮކްޓަރަކަށް ދައްކަވާއިރު ޙައްޖުން ނުވަތަ ޢުމްރާއިން އެނބުރި އައި މީހެއްކަމުގެ މައުލޫމާތު ދިނުން

-މިނޫންވެސް އިތުރު ބައްޔެއްގެ އަލާމާތެއް ފެންނަ ނަމަ ޑޮކްޓާރަށް ދެއްކުން

މިކަންތައްތަކުގެ އިތުރުން އެޗްޕީއޭއިން ވަނީ ހުން އަދި އަރިދަފުސް ރޯގާ ޖެހިއްޖެނަމަ ގޭގައި ފަރުވާގެ ގޮތުގައި އެޅިދާނެ ފިޔަވަޅުތައްވެސް ފާހަގަކޮށްފައެވެ.

މީގެ ތެރޭގައި:

-ގިނަގިނައިން ދިޔާތަކެތި ބޭނުންކުރުން

-އަރާމުކުރުން

-ހުންގަދަނަމަ ގައިގައި ފެންހޭކުން (އާދައިގެ ތާފަނާ ފެން)

-ޕެރެސެޓަމޯލް ފިޔަވައި އެހެން ބޭހެއް ޑޮކްޓަރެްގެ މަޝްވަރާއާ ނުލާ ބޭނުން ނުކުރުން

އުމްރާއަށް އެކި ޖަމިއްޔާތަކުގެ ފަރާތުން ފުރާފައިވާ ފަރާތްތައް މިހާރުވަނީ އެނބުރި އަންނަން ފަށާފައެވެ. މި ފަރާތްތަކުގެ ތެރޭގައި ރޯގާފަދަ އެކިއެކި ބަލިތައް ޖެހިފައިވާ މީހުން ހިމެނޭއިރު މިފަދަ ބަލިތައް އިތުރަށް ފެތުރުނަ ނުދިނުމަށް އަމިއްލައަށް އެޅެން ހުރި ފިޔަވަޅުތައް އެޅުމަކީ މުހިންމު ކަމެކެވެ.