ކޮތަޅު ޖަލްސާ ފަސްކޮށް ހުކުރު ދުވަހުގެ ރޭ އިދިކޮޅުން ބާއްވަނީ "ޗަ ގޯސް" ޖަލްސާ!
ފޯޅަވަހި މައްސަލައިގައި ދައުލަތުގެ ސްޓޭންޑު ބަދަލުކުރުމާއި ގުޅިގެން ރައްޔިތުންގެ ކަންބޮޑުވުންތައް ފާޅުކުރަމުންދާ މި ދަނޑިވަޅުގައި ޤައުމީ މަސްލަހަތު އިސްކޮށް ހުކުރު ދުވަހުގެ ރޭ އިދިކޮޅުން ފޯޅަވަހި މައްސަލައާއި ގުޅިގެން "ޗަ ގޯސް" ގެ ނަމުގައި ޚާއްސަ ޖަލްސާއެއް ބާއްވާނެކަން އިއުލާނުކޮށްފި އެވެ.
މީގެކުރިން އިދިކޮޅުން ވަނީ ކޮތަޅުން ޓެކްސް ނަގަން ފެށުމާއި ގުޅިގެން ރައްޔިތުންގެ އޮތް ކަންބޮޑުވުންތަކާއި ގުޅޭގޮތުން "ކޮތަޅު" ނަމުގައި ޖަލްސާއެއް ބާއްވާނެކަމަށް ބުނެފަ އެވެ.
އެހެން ނަމަވެސް މިއަދު ޕްރޮގްރެސިވް ކޮންގްރެސް ކޯލިޝަންގެ ލީޑަޝިޕުން ބޭއްވި ޕްރެސް ކޮންފަރެންސްގައި މީޑިއާއަށް މައުލޫމާތު ދެއްވަމުން އިދިކޮޅު ކޯލިޝަން ވަގުތީގޮތުން ހިންގެވުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވީ ފޯޅަވަހި މައްސަލައަކީ ހައްސާސް މައްސަލައަކަށް ވެފައި، އެ މައްސަލައާއި ގުޅިގެން ރައްޔިތުންގެ އޮތް ކަންބޮޑުވުން އިންތިހާއަށް އިތުރުވަމުން އަންނަކަން އެ ކޯލިޝަނަށް ފާހަގަކުރެވިފައި ވާތީ ކޮތަޅު ޖަލްސާ ފަސްކޮށް ޗާގޯސް މައްސަލައަށް ފޯކަސްކޮށްގެން ހަރަކާތެއް ހިންގުމަށް ޕާޓީން ނިންމާފައިވާ ކަމަށެވެ.
"އަޅުގަނޑުމެން ވާނީ ކޮތަޅު ޖަލްސާގެ ނަމުގައި އާޓިފިޝަލް ބީޗުގައި ޖަލްސާއެއް ބާއްވާނެ ވާހަކަ ދަންނަވާފަ. ޖަލްސާއެއް އެރޭ އޮންނާނެ. އެހެން ނަމަވެސް ޖަލްސާގެ ނަން ބަދަލުކުރަން މަޖުބޫރުވެގެން މި އުޅެނީ، ހާލަތު ނިޔާކުރި ގޮތުން. އެއީ ޤައުމުގައި މިއަދު އޮތް އެންމެ މުހިންމު މައްސަލައެއްގެ ގޮތުގައި އަޅުގަނޑުމެންނަށް ފާހަގަކުރެވިގެން މި އުޅެނީ ފޯޅަވަހި ވިއްކާލުން ނުވަތަ ޗާގޯސް ވިއްކާލުމުގެ މައްސަލަ. އެހެންވީމަ މިކަމުގައި ރައްޔިތުންގެ ހުރި ކަންބޮޑުވުން ފާޅުކުރުމަށް މާ މުހިންމުކަމަށް އަޅުގަނޑުމެންނަށް ޤަބޫލު ކުރެވުނީމަ ކޮތަޅު ޖަލްސާގެ ނަމުގައި ބާއްވަން އުޅުނު ޖަލްސާ އަޅުގަނޑުމެން މިހާރު ޗަ ގޯސް ގެ ނަމުގައި މިހާރު މި ބާއްވަނީ"
ޕީއެންސީގެ ރައީސް އަބްދުއްރަހީމް އަބްދުﷲ
އަބްދުއްރަހީމް ވިދާޅުވީ ޕީޕީއެމުން އިންތިޒާމު ކުރި ނަމަވެސް "ޗަ ގޯސް" ޖަލްސާއަކީ ގައުމީ ހަރަކާތެއްކަމަށް ދެކިވަޑައިގަންނަވާ ކަމަށެވެ.
އެހެންކަމުން ފޯޅަވަހި މައްސަލައިގައި ދައުލަތުން އަމަލުކޮށްފައިވާ ގޮތާއި ދިވެހިން ނުރުހޭކަން ދެއްކުމަށް ވީހާވެސް ގިނަ ބަޔަކު މި ޖަލްސާގައި ބައިވެރިވެ ވަޑައިގަތުމަށް އަބްދުއްރަހީމް ވަނީ ގޮވާލައްވާފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
