ރައީސް ޔާމީންގެ އެންގެވުމަށް ޗާގޯސް މައްސަލައިގައި ޕީޕީއެމުން އިޓްލޮސްއަށް ސިޓީއެއް ފޮނުވަނީ!

ވާދަވެރި ސިޔާސީ ލީޑަރު އަދި ޕީޕީއެމްގެ ރިޔާސީ ކެންޑިޑޭޓު ރައީސް އަބްދުﷲ ޔާމީން އަބްދުލްގައްޔޫމުގެ އެންގެވުމަށް ދިވެހި ސަރުކާރުން މިހާރު އެއްބަސްވެފައިވާ ގޮތަށް ޗާގޯސްއަކީ މޮރިޝަސްގެ ސިޔާދަތު ހިނގާ ތަނެއްކަމަށް ދިވެހިން ޤަބޫލު ނުކުރާކަމަށާއި، އެކަމާއި ދިވެހި ރައްޔިތުން ދެކޮޅުކަން ހާމަކޮށް ރާއްޖޭގެ ސަރަހައްދީ އިން ކަނޑައެޅުމާ ގުޅޭ ގޮތުން މައްސަލަ ބަލަމުންދާ ޖަރުމަނުގައި ހުންނަ އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް) އަށް ސިޓީއެއް ފޮނުވުމަށް ޕީޕީއެމުން ނިންމައިފި އެވެ.

އެކަން އިދިކޮޅު ކޯލިޝަނުން ހާމަކުރައްވާފައިވަނީ ފޯޅަވަހި މައްސަލައާއި ގުޅިގެން ދިވެހިންގެ ކަންބޮޑުވުންތައް ސަރުކާރަށް އިއްވުމަށް އަންނަ ހުކުރު ދުވަހުގެ ރޭ އާޓިފިޝަލް ބީޗުގައި "ޗަ ގޯސް" ގެ ނަމުގައި ޖަލްސާއެއް ބާއްވާނެކަމަށް އިއުލާނުކުރުމަށް ބޭއްވި ޕްރެސްކޮންފަރެންސްގައި މީޑިއާއަށް މައުލޫމާތު ދެއްވަމުން ނެވެ.

އެކަމާއި ގުޅޭގޮތުން އިދިކޮޅު ކޯލިޝަން ވަގުތީގޮތުން ހިންގުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވީ ޗާ ގޯސް މައްސަލައިގައި މި ސަރުކާރުން ދައުލަތުގެ ސްޓޭންޑް ބަދަލުކުރުމާއި ގުޅިގެން އެންމެ ފުރަތަމަ ކަންބޮޑުވުން ފާޅުކުރެއްވި ސިޔާސީ ލީޑަރަކީ ރައީސް އަބްދުﷲ ޔާމީން އަބްދުލްގައްޔޫމު ކަމަށެވެ.

އެގޮތުން މީގެކުރުންވެސް އެތައް ޕްލެޓްފޯމެއްގައި ރައީސް ޔާމީން އެކަމާއި ދެކޮޅަށް ވަކާލާތު ކުރައްވާފައިވާއިރު، އެ މައްސަލައިގައި ދިވެހި ސަރުކާރުގެ ނިންމުމާއި ރައްޔިތުން ނުރުހޭކަން ހާމަކުރުމަށް އިޓްލޮސްއަށް ސިޓީއެއް ފޮނުވުމަށް ރައީސް ޔާމީން ޕީޕީއެމަށް އިރުޝާދު ދެއްވާފައިވާކަމަށް އަަބްދުއްރަހީމް ވިދާޅުވި އެވެ.

"ޗާގޯސް މައްސަލައިގަ ވެސް ރައީސް ޔާމީން، މިނިވަންކޮށް ހުންނަވައިގެން ވެސް މިވާހަކަ ދައްކަވާ އެންމެ ބޮޑަށް ވަކާލާތު ކުރެއްވި އެއް ބޭފުޅަކީ ރައީސް ޔާމީން. އެގޮތުން މި ކަމަކީ ކުރެވޭނެ ކަމެއް ނޫން ކަމަށް އިޓްލޮސްއަށް މި މައްސަލައިގައި ސިޓީއެއް ފޮނުވަން އެމަނިކުފާނު އެބޮތް މިހާރު ވިދާޅުވެފަ. އެއީ މީ ދިވެހިރައްޔިތުންގެ ހައްގު އެކުލެވިގެންވާ ކަމެއް. ރައްޔިތުން މިކަމާ ގަބޫލެއް ނޫން، މިކަން މި ގޮތަށް ކުރާކަށް"

ޕީއެންސީގެ ރައީސް އަބްދުއްރަހީމް އަބްދުﷲ

އަބްދުއްރަހީމް ވިދާޅުވީ އެ ސިޓީ އިޓްލޮސްއަށް ފޮނުވުމުގެ ކުރިން ސިޓީގައި ސޮއިކުރުމަށް ހުރިހާ ސިޔާސީ ޕާޓީތަކުގެ ލީޑަރުންނަށް ފޮނުއްވާނެ ކަމަށެވެ. އަދި މި މައްސަލައިގައި ރާއްޖޭގެ މަސްލަހަތު ހިމާޔަތްކުރުމަށް ހުރިހާ ސިޔާސީ ޕާޓީތަކުން ގުޅިގެން މަސައްކަތް ކުރުމަށް ދައުވަތު އަރުވާނެކަމަށް ވެސް އަބްދުއްރަހީމް ވިދާޅުވި އެވެ.

އޭގެ އިތުރުން އޭނާ ވަނީ މީ ރައްޔިތުންގެ މަސްލަހަތާއި ގުޅުން އޮތް ގައުމީ މައްސަލައަކަށް ވާއިރު، ސިޔާސީ ފިކުރު އެއްފަރާތްކޮށް ދިވެހިންގެ ހައްގު ކަށަވަރުކުރުމަށް ކުރެވޭ މަސައްކަތުގައި ގުޅިގެން މަސައްކަތްކުރުމަށް ސިޔާސީ ޕާޓީތަކުގެ ލީޑަރުންނަށް އިލްތިމާސް ކުރައްވާފަ އެވެ.