ރައީސުލްޖުމްހޫރިއްޔާގެ ޚާއްސަ އިނާމް ރޮބޯ މޭންއަށް

މަތީ ދަރަޖަ ހޯދާ ފަރާތްތަކަށް ފަރާތްތަކަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ދެއްވާ ޚާއްސަ އިނާމް، ކުދި ބޮޑު އެތައްބައެއްގެ މެދުގައި މަގުބޫލުކަން ހޯދާފައިވާ ރޮބޯ މޭން އަށް ލިބިއްޖެ އެވެ.

މި އަހަރުގެ މިނިވަންދުވަހުގެ މުނާސަބަތުގައި ސޯޝަލް ސެންޓަރުގައި މިއަދު ބޭއްވެވި ރަސްމީ ޖަލްސާގައި ރައީސުލްޖުމްހޫރިއްޔާ އެރުއްވި މި އިނާމާއި ރޮބޯ މޭންގެ ކުންފުނީގެ ފަރާތުން އިނާމާއި ހަވާލުވެފައި ވަނީ އަލްފާޟިލް ގާސިމް އަހުމަދެވެ.

ރޮބޯ މޭން އަށް މި އިނާމް ދީފައިވަނީ، ހުނަރުވެރި, ފަންނުވެރި، ޒުވާނުން ގައުމީ ތަރައްގީއަށް ކުރާ އުފެއްދުންތެރި އީޖާދީ މަސައްކަތުގައި ފާހަގަކުރެވޭ ކާމިޔާބީއެއް ހޯދާފައިވާތީއެވެ.

ރޮބޯ މޭން ދިވެހިންގެ ތެރެއަށް ތަޢާރަފު ވެފައިވަނީ 2015 ވަނަ އަހަރުގެ ތެރޭގައެވެ. ރޮބޯމޭން އަކީ މިއަދު ގިނަ ބައެއްގެ ހިތްތަކުގައި ގަދަރާއި ލޯބި ލިބިފައިވާ ކެރެކްޓަރ އެކެވެ.

ރޮބޯމޭން އަކީ، މާލޭގަޔާއި، މާލެއިން ބޭރުގެ އިތުރުން ބޭރު ގައުމުތަކުގައި ބޭއްވޭ ޚާއްސަ ހަފްލާ ތަކާއި ރަސްމިއްޔާތު ތަކުގައިވެސް އެކި ހުށަހެޅުންތައް ހުށަހަޅައިދީ، އެ ހަފްލާ ތަކުގެ ފަޅު ފިލުވައިދެމުން އަންނަ ކެރެކްޓަރ އެކެވެ.

މިއަދު ބޭއްވި ޖަލްސާގައި މަތީ ދަރަޖަ ހޯދާ ފަރާތްތަކަށް ރައީސުލްޖުމްހޫރިއްޔާ ދެއްވާ ޚާއްޞަ އިނާމު،18 ބޭފުޅަކަށް އަރުވާފައިވެއެވެ.