ޑިމޮކްރެޓްސް ދޫކޮށް ޝިޔާން ވެސް އަލުން އެމްޑީޕީއަށް: "ވިސްނުން ބަދަލުކުރީ ދިވެހިންގެ ވިންދާ އެއްގޮތަށް"

އެމްޑީޕީ މެންބަރުންގެ ތެރެއިން ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ތާއީދު ކުރައްވާ ބޭފުޅުން އުފެއްދެވި 'ދަ ޑިމޮކްރެޓްސް' ޕާޓީ ދޫކުރައްވައި ތޮއްޑޫ ދާއިރާގެ މެންބަރު ހަސަން ޝިޔާން ވެސް އަލުން އެމްޑީޕީ އާއި ގުޅިވަޑައިގެންފި އެވެ.

އެމްޑީޕީގައި 16 އަހަރު މެދު ނުކެނޑި މަސައްކަތް ކުރެއްވުމަށްފަހު އެ ޕާޓީ އުފެއްދި އަސާސްތަކާއި ދިމާ އިދިކީލަކޮށް ޕާޓީ ހިނގަމުން ދާތީ ކަމަށް ވިދާޅުވެ، ޝިޔާން އެމްޑީޕީން ވަކިވެވަޑައިގެންނެވީ މެއި މަހުގެ ތެރޭގައެވެ.

އެހެން ނަމަވެސް، އޭނާ އެމްޑީޕީއާ އަލުން ގުޅިވަޑައިގެން، މެންބަރު ކަމުގެ ފޯމް، ރޭ ވަނީ ރައީސް އިބްރާހިމް މުހައްމަދު ޞާލިހަށް އަރުވައިފަ އެވެ.

އެކަމާއި ގުޅިގެން އޭނާ ރޭ ކުރެއްވި ޓްވީޓެއްގައި ވިދާޅުވީ, ތޮއްޑޫ ދާއިރާގެ ރައްޔިތުންނާއި މުޅި ދިވެހިރާއްޖޭގެ ރައްޔިތުންގެ ވިސްނުންވެސް އޮތީ އޭނާ އެމްޑީޕީގެ ރިޔާސީ ކެންޑިޑޭޓު ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހަށް ދެވަނަ ދައުރެއް ދޭން ކަމަށާ، އެހެންކަމުން، އެގޮތަށް އޭނާގެ ވިސްނުންވެސް ބަދަލު ކުރައްވާފައިވާ ކަމަށެވެ.

"އިންޝާ الله ތޮއްޑޫ ދާއިރާގެ ސާފު ބޮޑު އަގުލަބިއްޔަތާ އެކު، ރައީސް ޞާލިހު މި އިންތިހާބު އެއްބުރުން ކާމިޔާބު ކުރައްވާނެ" ޝިޔާން ވިދާޅުވި އެވެ.

ޝިޔާންގެ އިތުރުން، ޑިމޮކްރެޓްސް އުފެއްދުމަށް އޭރު އެމްޑީޕީން ވަކިވެވަޑައިގަތް ކުޅުދުއްފުށީ އުތުރު ދާއިރާގެ މެމްބަރު ޔާސިރު އަބްދުއްލަތީފް ވެސް ދާދިފަހުން ވަނީ އަލުން އެމްޑީޕީީ އާ ގުޅިވަޑައިގެންފަ އެވެ. އަދި ޔާސިރާ އެކު އޭރު ޑިމޮކްރަޓްސް ޕާޓީއަށް ސޮއި ކުރެއްވި ކުޅުދުއްފުށީ ސިޓީ ކައުންސިލްގެ މެމްބަރުން ވެސް ވަނީ އަލުން އެމްޑީޕީއާ ގުޅިފަ އެވެ.