ޑރ މުއިއްޒު ވިދާޅުވީ ޕާކިން އަދި ގަރާޖު ސިޓީ މައްސަލަ ޙައްލުކުރާނެ ގޮތް!

މާލެ ސަރަހައްދަށް ދިމާވެފައިވާ ޕާކިންގެ ދަތިކަމުގެ މައްސަލައާއި ވެހިކަލް ގަރާޖެއްގައި ރަޖިސްޓްރީކުރުމަށް މިހާރު އުފުލަންޖެހޭ ތަކުލީފުތަކަށް ޕްރޮގްރެސިވް ކޮންގްރެސް ކޯލިޝަންގެ ވެރިކަމުގައި ދާއިމީ ޙައްލު ގެނެސްދެއްވާނެ ގޮތް އެ ކޯލިޝަންގެ ރިޔާސީ ކެންޑިޑޭޓު ޑރ މުހައްމަދު މުއިއްޒު ވިދާޅުވެއްޖެ އެވެ.

ޓެކްސީ ޑްރައިވަރުންގެ ހުރި ކަންބޮޑުވުންތަކާއި ގުޅޭގޮތުން މަޝްވަރާކުރުމަށް މިއަދު ޕްރޮގްރެސިވް ކޮންގްރެސް ކޯލިޝަންގެ ލީޑަޝިޕްގެ ބައެއް ބޭފުޅުންނާއި ރިޔާސީ ކެންޑިޑޭޓު ޑރ މުއިއްޒު ވަނީ ބައްދަލުކުރައްވާފަ އެވެ.

އެ ބައްދަލުވުމުގައި ޓެކްސީ ޑްރައިވަރުން ވަނީ ގިނަ ކަންބޮޑުވުންތަކެއް ހިއްސާކުރައްވާފަ އެވެ. ޓެކްސީ ޑްރައިވަރުންގެ އެންމެ ބޮޑު ކަންބޮޑުވުމެއްގެ ގޮތުގައި ފާހަކަކުރީ ޕާކު ކުރާނެ އެކަށީގެންވާ ޖާގައެއް މާލެ ސަރަހައްދުން ނުލިބޭ މައްސަލައެވެ. އަދި ޕާކު ކުރާނެ ތަންތަން ނުދައްކާ ސްޓިކާ ޖަހާ މައްސަލައެވެ.

"ކާރު ބާއްވާފަ ގެއަށް ވަދެފަ ނިކުންނައިރު ސްޓިކާ ޖަހާފައި. އަޅުގަނޑުމެންނަށް އެބަ ދިމާވޭ މިސްކިތް ކައިރީގައި ނަމާދަށް މި އަރަނީއޭ ކަރުދާސްގަނޑެއްގައި ލިޔެފައި ހަރުކޮށްފައި މިސްކިތަށް މި އަރަނީ، ފައިބާއިރު ސްޓިކާ ޖަހާފައި. ފަތިހު 3 4 ޖަހާއިރު ވެސް ސްޓިކާ ޖަހަނީ. އެހެންވީމަ ސްޓިކާ ޖެހުމުގެ ކަންތަކަށް ޙައްލެއް އަންނަން ޖެހޭ"

ކަންބޮޑުވުން ފާޅުކުރި ޓެކްސީ ޑްރައިވަރެއް

ޕާކިން މައްސަލައިގެ އިތުރުން ގަރާޖުގައި ވެހިކަލް ރަޖިސްޓްރީ ކުރުމަށްޓަކައި މިހާރު އަމަލުކުރަމުންދާ އުސޫލުގެ ސަބަބުން ވަރަށް ބޮޑު ތަކުލީފެއް އުފުލަން ޖެހޭކަމަށް ބައެއް ޓެކްސީ ޑްރައިވަރުން ފާހަގަކުރިއެވެ. އަދި އެކަންކަން ހައްލުކޮށްދެއްވުމަށް ޑރ މުއިއްޒަށް ހުށައެޅި އެވެ.

ޓެކްސީ ޑްރައިވަރުންގެ ވާހަކަތަކަށް ފަހު، އެ މީހުންނާއި މުޚާތަބުކުރައްވާ ޑރ މުއިއްޒު ވިދާޅުވީ ޕާކިން މައްސަލަ ޙައްލުކުރުމަށް މާލޭ ސިޓީ ކައުންސިލުގައި ހުންނަވާ ގިނަ މަސައްކަތްޕުޅުތަކެއް މިހާރު ވެސް ކުރައްވާފައިވާ ކަމަށެވެ.

އެގޮތުން މާލެއަށް ދިމާވެފައިވާ މައްސަލަ ޙައްލުކުރުމަށް 6 ޕާކިން އިމާރާތެއް އެޅުމަށް ކައުންސިލުން ނިންމާ އެކަމާއި ގުޅިގެން ކައުންސިލުން ކުރަން ޖެހޭ ހުރިހާ މަސައްކަތެއް ކޮށް ނިންމާ ސަރުކާރަށް ހުށައަޅާފައިވާނެ ކަމަށެވެ.

އެހެން ނަމަވެސް ދެ އަހަރަށްވުރެ ގިނަ ދުވަސް ވެގެން ދިޔައިރު، އެ އިމާރާތްތައް އެޅުމުގެ ހުއްދަ ސަރުކާރުން ދީފައި ނުވާކަމަށާއި، މައްސަލަ ޙައްލުކުރުމަށް އެކުލަވާލި އެ ޕްލޭނުގެ އަމަލީ މަސައްކަތް ނުފެށި ދިގުލައިގެން ދިޔައީ ސަރުކާރުގެ ހުއްދަ ނުލިބިގެންކަމަށް ޑރ މުއިއްޒު ވިދާޅުވި އެވެ.

އެކަން ފާހަގަކުރައްވާ ޑރ މުއިއްޒު ވިދާޅުވީ ޕްރޮގްރެސިވް ކޮންގްރެސް ކޯލިޝަންގެ ވެރިކަމެއްގައި އެ މައްސަލަ ޙައްލުކޮށްދެއްވާ ޕާކިން އިމާރާތްތަކެއް މާލޭގައި އަޅުއްވާދެއްވާނެ ކަމަށެވެ.

"އެގްޒެކްޓްލީ 6 ބިލްޑިންގ މާލޭގެ އެކި ސަރަހައްދުގައި އަޅަން އަޅުގަނޑުމެން މިހާރު ހުރިހާކަމެއް ނިންމާފަ މިހުރީ. 4 ފްލޯ ހިމެނޭހެން ހަދާފައި އޭގެން 1 ފްލޯ އެއްކޮށް ކަނޑައެޅީ ޓެކްސީތަކަށް. ގާތްގަނޑަކަށް 400 ވަރަކަށް ޓެކްސީ ބޭއްވޭނެ އެއް ފްލޯގައި އެކަނި. އެހާ ބޮޑު އިމާރާތެއް. އެމްއައިބީ އާއި ބައެއް ބޭންކުތަކާއި ވާހަކަދައްކައިގެން ލޯނު ވެސް ހަމަޖެއްސިން... އެކަމަކު ނުދިން ބިމެއް. ބިން ވަކިކުރީ.. ސިޓީ ކައުންސިލްގެ އިހުތިޞާސް ހިނގާބިމެއް، އެކަމަކު ސަރުކާރަށް އާދޭސް ދަންނަވައިގެން ވެސް ނުދިން ބިމެއް. ދަންނަވަން މި އުޅެނީ އަޅުގަނޑުމެން ވެރިކަމަށް ކުރިމަތިލައިގެން މި އުޅެނީ އަޅުގަނޑުމެންގެ ވެރިކަމެއްގައި މި މައްސަލަތައް ޙައްލުކޮށްދޭން ވެގެންނޭ"

ޑރ މުހައްމަދު މުއިއްޒު

ޕާކިން މައްސަލައިގެ އިތުރުން ގަރާޖު ސިޓީގެ މައްސަލައަކީ ވެސް ޓެކްސީ ޑްރައިވަރުންނަށް ވަރަށް ބޮޑު ތަކުލީފަކަށް ވެފައިވާ ކަމެއްކަމަށް ޑރ މުއިއްޒު ވިދާޅުވި އެވެ. މިހާރު ވެހިކަލް ރަޖިސްޓްރީކުރަނީ ކޮންމެވެސް ގެއަކަށް އެމީހުން ބުނި އަގެއް ދައްކައިގެން ސިޓީއެއް ހޯދައިގެން ކަމަށާއި، އެއީ އުސޫލެއްގެ ގޮތުން އެކަން ކުރެވިގެންވާނެ ގޮތް ނޫންކަމަށް ޑރ މުއިއްޒު ވިދާޅުވި އެވެ.

އެކަން ފާހަގަކުރައްވާ ޑރ މުއިއްޒު ވިދާޅުވީ ގަރާޖެއްގައި ވެހިކަލް ރަޖިސްޓްރީ ކުރުމަށް މިހާރު އޮންނަ އުސޫލަށް ބަދަލުގެނެސް، ވެހިކަލް ބޭއްވޭނެ ޖާގަ ހޯދައިދީ އެއީ ގަރާޖެއްގެ ގޮތުގައި ހެދޭ ގޮތަށް އުސޫލު ބަދަލުކުރާނެ ކަމަށެވެ. އޭރުން ގަރާޖު ސިޓީ ހޯދަން އުފުލަންޖެހޭ ތަކުލީފު ނުއުފުލާ، ފަސޭހައިން އެކަން ކުރެވޭނެކަމަށް ޑރ މުއިއްޒު ވިދާޅުވި އެވެ.

"އަޅުގަނޑުމެން ޕާކިން ބިލްޑިންގު އަޅަން ނިންމާފަ މި ހުރީ އެ ބިލްޑިންގު ތަކުގެ ތެރެއިން އެ ލިބޭ ޖާގައަކީ ގާނޫނަށް ގެނެވޭ ބަދަލުގެ ތެރެއިން އަސްލު ގަރާޖު ސްޕޭސް، އެހެންވީމަ އެތަނަށް އެމީހެއްގެ ގަރާޖު ރަޖިސްޓްރީ، ދާއިމީ ރަޖިސްޓްރީ ވެސް ހެދޭގޮތަށް، އެހެންވީމަ މީސް މީހުންގެ ގެއިން ސަލާން ޖަހައިގެން ބޮޑު އަގުގައި ގަރާޖު ސިޓީ ހޯދުންވެސް ނިމުމަކަށް އައިސް އަސްލު ޖާގައެއް ލިބި މަގުމަތީގައި ބާއްވަން ނުޖެހި އެ މައްސަލައަށް ރަނގަޅު ހައްލެއް ގެނައުން"

ޑރ މުހައްމަދު މުއިއްޒު

ޕާކު ކުރާނެތަނެއް ނުދައްކާ ސްޓިކާ ޖަހައިގެން ޖޫރިމަނާ ނުކުރާނެކަމަށް މި ސަރުކާރު އައުމުގެ ކުރިން 2018 ގެ ރިޔާސީ އިންތިޚާބުގައި އިބްރާހިމް މުޙައްމަދު ޞާލިހު ވަނީ ވައުދުވެވަޑައިގެންފަ އެވެ. އެހެން ނަމަވެސް، އަހަރުން އަހަރަށް ސްޓިކާ ޖަހައިގެން ދައުލަތަށް ހޯދާ އާމްދަނީ އިތުރުވަމުން އަންނަކަން ފިނޭންސް މިނިސްޓްރީގެ ތަފާސް ހިސާބުތަކުން ދައްކާއިރު، އެކަށީގެންވާ މިންވަރަށް ޕާކު ކުރާނެ ތަންތަން ސަރުކާރަށް ހަދާދެވިފައެއް ނުވެއެވެ.

ޑރ މުއިއްޒު ވިދާޅުވީ ސްޓިކާ ޖަހައިގެން ޖޫރިމަނާކޮށްފައިވާ ފަރާތްތަކުގެ ޖޫރިމަނާ ޕްރޮގްރެސިވް ކޮންގްރެސް ކޯލިޝަންގެ ވެރިކަމެއްގައި މާފުކޮށްދެއްވާނެ ކަމަށެވެ. އަދި އެ މައްސަލަތަކަށް ދާއިމީ ޙައްލެއް ގެނެސް މާލެ ސަރަހައްދުގެ މަގުތަކަކީ ހިނގާބިނގާވެ އުޅޭ މީހުންނާއި، ދުއްވާ އެއްޗެއްސަށް ފަސޭހަކަމާއެކު ބޭނުން ކުރެވޭނެ ފަދަ ހިތްގައިމު މަގުތަކަކަށް ހައްދަވާދެއްވާނެ ކަމަށެވެ.