މުޢިއްޒުގެ ވެރިކަމުގައި ޓެކްސީ ޑްރައިވަރުންގެ ދަފުތަރެއް ހަދައި ފްލެޓަށް ކުރިމަތިލުމުގެ ފުރުސަތު ދެނީ!

އިދިކޮޅު ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުއިއްޒު ގެ ވެރިކަމެއްގައި، ޓެކްސީ ޑްރައިވަރުންގެ ދަފްތަރެއް އެކުލަވާލައި އެ ދަފްތަރުގައި ހިމެނޭ ޑްރައިވަރުންނަށް ވަކި އިންސައްތައެއް ކަނޑައަޅައި ސޯޝަލް ހައުސިންގައި ފްލެޓް ލިބޭ ފަރާތްތަކުގައި ހިމަނުއްވާނެ ކަން އިއުލާން ކުރައްވައިފިއެވެ.

ޓެކްސީ ޑްރައިވަރުންގެ ހުރި ކަންބޮޑުވުންތަކާއި ގުޅޭގޮތުން މަޝްވަރާކުރުމަށް މިއަދު ޕްރޮގްރެސިވް ކޮންގްރެސް ކޯލިޝަންގެ ލީޑަޝިޕްގެ ބައެއް ބޭފުޅުންނާއި ރިޔާސީ ކެންޑިޑޭޓު ޑރ މުއިއްޒު ވަނީ ބައްދަލުކުރައްވާފަ އެވެ.

އެ ބައްދަލުވުމުގައި ޑްރައިވަރުންގެ ކަންބޮޑުވުންތައް އައްސަވައި އެކަމާއި ގުޅޭގޮތުން މުޢިއްޒުގެ ވެރިކަމެއްގައި ގެންގުޅުއްވާނެ ސިޔާސަތުތައް ވަނީ ހާމަކުރައްވާފައެވެ.

އެގޮތުން މުއިއްޒު ވިދާޅުވީ، ޓެކްސީ ޑްރައިވަރުންނަށް ކަންކަން ކޮށްދިނުމަށް ސަރުކާރަށް އޮތް އެންމެ ބޮޑު ހުރަހަކީ އެމީހުންގެ ދަފުތަރެއް އެކުލަވާލެވިފައި ނެތުން ކަމަށާ، އޭނާގެ ވެރިކަމެއްގައި އެކަން ކުރައްވާނެ ކަމަށެވެ.

"ވަޒީފާއެއްގެ ގޮތުގައި ކެޓަގަރައިޒްކޮށް، ރަސްމީ ގައުމީ ދަފުތަރެއް އުފައްދައި އޭގައި ރަޖިސްޓްރީ ވީމަ ގާނޫނީ ހައިސިއްޔަތު ލިބޭ ދަފުތަރަކަށް ހެދޭނެ،" އޭނާ ވިދާޅުވި އެވެ.

މުޢިއްޒު ވިދާޅުވީ އެ ދަފުތަރު އެކުލަވާލުމުން ޓެކްސީ ޑްރައިވަރުންނަށް ގިނަ ޚިދުމަތްތަކެއް ފަސޭހަކަ ކަމާއިއެކު ލިބި، ސޯޝަލް ހައުސިން ސްކީމްތަކާ އަދި ހައުސިން ލޯނުތައް ނެގުމުގެ ފުރުސަތު ވެސް ފަހިވެގެން އަންނާނެ ކަމަށެވެ.

"މި ދެންނެވި ހާއްސަ ދަފުތަރު ތިބޭފުޅުންގެ އުފައްދާ ކަމަށް ވަންޏާ، އޭގެ ތެރެއިން ވަރަށް ފަސޭހަވެގެން އަންނާނެ ކުރިއަށް ހުރި، އަޅުގަނޑުމެންގެ ސަރުކާރެއްގައި ހައުސިން ސްކީމްތައް ތައާރަފުކުރާ އިރުގައި، އޭގެ ތެރެއިން ރިކޮގްނައިޒް ކުރެވިގެން ޓެކްސީ ޑްރައިވަރުންނަށް ވަކި ޕަސެންޓޭޖެއް ކަނޑައަޅަން.. ތިބޭފުޅުންނަށް [ޓެކްސީ ޑްރައިވަރުންނަށް] ވެސް އިރާދަކުރެއްވިޔާ އަޅުގަނޑުމެންގެ ވިސްނުމަކީ އަޅުގަނޑުމެންގެ ސަރުކާރެއްގައި ކެޓަގަރީއެއް ކަނޑައަޅައި ނުވަތަ ވަކި ޕަސެންޓޭޖެއް ކަނޑައަޅެޅުން ސޯޝަލް ހައުސިންގައި ފްލެޓް ލިބޭ ފަރާތްތަކުގައި ހިމަނަން"

ޑރ. މުހައްމަދު މުޢިއްޒު

މިއަދުގެ ބައްދަލުވުމުގައި ޓެކްސީ ޑްރައިވަރުންގެ އެންމެ ބޮޑު ކަންބޮޑުވުމެއްގެ ގޮތުގައި ފާހަކަކުރީ ޕާކު ކުރާނެ އެކަށީގެންވާ ޖާގައެއް މާލެ ސަރަހައްދުން ނުލިބޭ މައްސަލައެވެ. އަދި ޕާކު ކުރާނެ ތަންތަން ނުދައްކާ ސްޓިކާ ޖަހާ މައްސަލައެވެ.

ޕާކިން މައްސަލައިގެ އިތުރުން ގަރާޖުގައި ވެހިކަލް ރަޖިސްޓްރީ ކުރުމަށްޓަކައި މިހާރު އަމަލުކުރަމުންދާ އުސޫލުގެ ސަބަބުން ވަރަށް ބޮޑު ތަކުލީފެއް އުފުލަން ޖެހޭކަމަށް ބައެއް ޓެކްސީ ޑްރައިވަރުން ފާހަގަކުރިއެވެ. އަދި އެކަންކަން ހައްލުކޮށްދެއްވުމަށް ޑރ މުއިއްޒަށް ހުށައެޅި އެވެ.

އެވާހަކަ ތަކާއި ގުޅިގެން ޑރ މުއިއްޒު ވިދާޅުވީ ޕްރޮގްރެސިވް ކޮންގްރެސް ކޯލިޝަންގެ ވެރިކަމެއްގައި އެ މައްސަލަ ޙައްލުކޮށްދެއްވާ ޕާކިން އިމާރާތްތަކެއް މާލޭގައި އަޅުއްވާދެއްވާނެ ކަމަށެވެ.

"އެގްޒެކްޓްލީ 6 ބިލްޑިންގ މާލޭގެ އެކި ސަރަހައްދުގައި އަޅަން އަޅުގަނޑުމެން މިހާރު ހުރިހާކަމެއް ނިންމާފަ މިހުރީ. 4 ފްލޯ ހިމެނޭހެން ހަދާފައި އޭގެން 1 ފްލޯ އެއްކޮށް ކަނޑައެޅީ ޓެކްސީތަކަށް. ގާތްގަނޑަކަށް 400 ވަރަކަށް ޓެކްސީ ބޭއްވޭނެ އެއް ފްލޯގައި އެކަނި. އެހާ ބޮޑު އިމާރާތެއް. އެމްއައިބީ އާއި ބައެއް ބޭންކުތަކާއި ވާހަކަދައްކައިގެން ލޯނު ވެސް ހަމަޖެއްސިން... އެކަމަކު ނުދިން ބިމެއް. ބިން ވަކިކުރީ.. ސިޓީ ކައުންސިލްގެ އިހުތިޞާސް ހިނގާބިމެއް، އެކަމަކު ސަރުކާރަށް އާދޭސް ދަންނަވައިގެން ވެސް ނުދިން ބިމެއް. ދަންނަވަން މި އުޅެނީ އަޅުގަނޑުމެން ވެރިކަމަށް ކުރިމަތިލައިގެން މި އުޅެނީ އަޅުގަނޑުމެންގެ ވެރިކަމެއްގައި މި މައްސަލަތައް ޙައްލުކޮށްދޭން ވެގެންނޭ"

ޑރ. މުހައްމަދު މުޢިއްޒު

ޕާކިން މައްސަލައިގެ އިތުރުން ގަރާޖު ސިޓީގެ މައްސަލައަކީ ވެސް ޓެކްސީ ޑްރައިވަރުންނަށް ވަރަށް ބޮޑު ތަކުލީފަކަށް ވެފައިވާ ކަމެއްކަމަށް ޑރ މުއިއްޒު ވިދާޅުވި އެވެ.

ޑރ މުއިއްޒު ވިދާޅުވީ ގަރާޖެއްގައި ވެހިކަލް ރަޖިސްޓްރީ ކުރުމަށް މިހާރު އޮންނަ އުސޫލަށް ބަދަލުގެނެސް، ވެހިކަލް ބޭއްވޭނެ ޖާގަ ހޯދައިދީ އެއީ ގަރާޖެއްގެ ގޮތުގައި ހެދޭ ގޮތަށް އުސޫލު ބަދަލުކުރާނެ ކަމަށެވެ. އޭރުން ގަރާޖު ސިޓީ ހޯދަން އުފުލަންޖެހޭ ތަކުލީފު ނުއުފުލާ، ފަސޭހައިން އެކަން ކުރެވޭނެކަމަށް ޑރ މުއިއްޒު ވިދާޅުވި އެވެ