ރައީސް ޔާމިނުގެ އިންތިޚާބީ ހައްޤު ނިގުޅައިގަތުމުގެ ބައިވެރިއަކަށްވީ ޝަރުއީ ދާއިރާ: ޑރ ޖަމީލު

ޕީޕީއެމްގެ ރައީސް އަބްދުالله ޔާމީން އަބްދުލްގައްޔޫމަށް ރިޔާސީ އިންތިޚާބުގައި ވާދަކުރުމުގެ ފުރުސަތު ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ވަނީ ނިގުޅައިގެންފައި ކަމަށާއި، އެކަން ކުރުމުގައި އެމަނިކުފާނުގެ ބައިވެރިއަކަށް ވީ ޝަރުއީ ދާއިރާކަމަށް ކުރީގެ ނައިބު ރައީސް އަދި ރައީސް ޔާމިނުގެ އިސް ޤާނޫނީ ވަކީލު ޑރ މުހައްމަދު ޖަމީލު އަހުމަދު ވިދާޅުވެއްޖެ އެވެ.

ޑރ ޖަމީލު މިފަދައިން ވިދާޅުވެފައި ވަނީ ހޮނިހިރު ދުވަހުގެރޭ ފުވައްމުލަކު ސިޓީގައި ބޭއްވި ޕްރިގްރެސިވް ކޮންގްރެސް ކޯލިޝަންގެ ރިޔާސީ ކެންޑިޑޭޓު ޑރ މުހައްމަދު މުއިއްޒުގެ ރިޔާސީ ކެމްޕޭނު ޖަލްސާގައި ވާހަކަދައްކަވަމުން ނެވެ.

ޑރ ޖަމީލުގެ ވާހަކަފުޅު ފެއްޓެވީ ރައީސް ޔާމިނަށް ރިޔާސީ އިންތިޚާބުގައި ވާދަކުރުމުގެ ފުރުސަތު ގެއްލިގެންދިޔަ ހިސާބުންނެވެ. އެކަމަށް އަލިއަޅުވާލައްވާ އެމަނިކުފާނު ވިދާޅުވީ ރައީސް ޞާލިހު ވެރިކަމަށް ވަޑައިގެން ކުރެއްވި ހަމައެކަނި ކަމަކީ ރައީސް ޔާމިނަށް މިއަހަރުގެ ރިޔާސީ އިންތިޚާބުގައި ވާދަކުރުމުގެ ފުރުސަތު ނިގުޅައިގަތުން ކަމަށެވެ.

އެގޮތުން ރައީސް ޔާމިނުގެ މައްޗަށް ސިޔާސީ ދައުވާތަކެއް އުފުލާ، ނުހައްގުން އެމަނިކުފާނު ހުރަގޭގައި 3 އަހަރަށްވުރެ ގިނަ ދުވަހު މި ސަރުކާރުގެ ނުފޫޒުން ބަހައްޓާފައިވާކަމަށް ޑރ ޖަމީލު ވިދާޅުވި އެވެ. އަދި އެމަނިކުފާނަށް ރިޔާސީ އިންތިޚާބުގައި ވާދަކުރުމުގެ ފުރުސަތު ގެއްލުވާލާ، އެމަނިކުފާނު އިންތިޚާބު ކުރުމަށް އުންމީދުކޮށްގެން ތިބި އެތައް ބައެއްގެ އުންމީދުތައް މި ސަރުކާރުން ފެނަށް ދުއްވާލާފައިވާކަމަށް ޑރ ޖަމީލު ވިދާޅުވި އެވެ.

އެއާއެކު ޑރ ޖަމީލު ވިދާޅުވީ ރައީސް ޔާމިނުގެ އިންތިޚާބީ ހައްގު ނިގުޅައިގަތުމަށް ރައީސް ޞާލިހަށް ވާގިވެރިވީ ޝަރުއީ ދާއިރާއިން ކަމަށެވެ.

"2018 އިން ފެށިގެން މިއަދާއި ހަމަޔަށް ރައީސް އިބޫ ކުރެއްވި ކަމަކީ ވޯޓުގެ ހައްގު، ރައީސް ޔާމިނު އިންތީޚާބު ކުރުމަށް ބޭނުންވި ބޭނުން ނިގުޅައިގަތުން. އެކަން ނިގުޅައިގަތުމުގައި ރައީސް އިބޫގެ ބައިވެރިއަކަށްވީ ރާއްޖޭގެ ޝަރުއީ ދާއިރާ"

ޑރ މުހައްމަދު ޖަމީލު އަހުމަދު

ޑރ ޖަމީލު ވިދާޅުވީ ދިވެހިރާއްޖޭގައި ތައުލީމު ހާސިލްކޮށްގެން ތިބި މީހުން އިންތިހާއަށް އިތުރުކަން ފާހަގަކުރަމުންދިޔަ ނަމަވެސް މިއަދު މުޖުތަމައެއްގެ ގޮތުގައި ދިވެހިރާއްޖެ މި އޮތް ހާލަތާއި ދަތުރުކުރަމުންދާ މިސްރާބާއި ދޭތެރޭގައި ސުވާލު އުފައްދަން ޖެހޭ ކަމަށެވެ.

އެގޮތުން ޝަރުއީ ނިޒާމު ބޭނުންކޮށްގެން ދިވެހިރާއްޖެއަށް އެތަށް ރޮނގަކުން ތަރައްގީ ގެނެސްދެއްވި ބޭފުޅަކަށް ރޯމާ ރޯ ދުވާލު އަނިޔާކުރަމުން ދާއިރު، އެކަމާއި ދެކޮޅަށް ބަހެއް ބުނަން ނުކެރި ހަނު ތިބުމަކީ ދިވެހިރާއްޖެ ދަތުރުކުރަމުން މިދާ މިސްރާބާއި ދޭތެރޭގައި ސުވާލު އުފެދޭކަމެއްކަމަށް ޑރ ޖަމީލު ވިދާޅުވި އެވެ.

އެއާއެކު ޑރ ޖަމީލު ވަނީ ޑރ މުއިއްޒަށް ރިޔާސީ އިންތިޚާބު ކާމިޔާބު ވިޔަސް، ރައީސް ޔާމިނު މިނިވަން ނުކުރައްވާނެކަމަށް ބުނެ ފާޑުކިޔުންތެރިން ދައްކަވަމުންދާ ވާހަކަތަކަށް ވެސް ރައްދުދެއްވާފަ އެވެ.

ޑރ ޖަމީލު ވިދާޅުވީ ރައީސް ޔާމިނުގެ މައްޗަށް އުފުލާފައިވަނީ ނުހައްގު ދައުވާތަކެއް ކަމަށެވެ. ތަހުގީގު މަރުހަލާއިން ފެށިގެން ޝަރީއަތާއި ހަމަޔަށް، އަދި އެފަހުން ކުރި ހުކުމަކީވެސް ނުހައްގު ހުކުންތަކެއް ކަމަށާއި، ރައީސް ޔާމިނު މިނިވަންނުކުރެވޭނެ އެއްވެސް ސަބަބެއް ނޯންނާނެ ކަމަށެވެ. އަދި ގާނޫނީ ހަމައެއް ވެސް ނެތް ކަމަށެވެ.

އެހެންކަމުން ޑރ މުއިއްޒު ވެރިކަމާއި ހަވާލުވެވަޑައިގަންނަވާއިރު، ރައީސް ޔާމީން މިނިވަންނުވެ ހުންނެވިނަމަ، އެކަން ކުރައްވާނެކަމަށާއި އެ ޔަގީންކަން އޮތްކަމަށް ޑރ ޖަމީލު ވަނީ ވިދާޅުވެފަ އެވެ.