މިއަދު ރައީސް އަށް ނޫނެކޭ ބުނާނަމަ މާދަމާ ބަރުލަމާނީއަށް ނޫނެކޭ ބުނެވިދާނެ: މަޙްލޫފް
ޑިމޮކްރެޓްސް އިން މިއަދު ރައީސް އިބްރާހިމް މުޙައްމަދު ޞާލިޙަށް ނޫނެކޭ ބުނާނަމަ މާދަމާ އެމްޑީޕީ އިން ބަރުލަމާނީ އަށް ނޫނެކޭ ބުނުފާނެ ކަމަށް މިސަރުކާރުގެ ޔޫތް އެންޑް ސްޕޯޓްސް މިނިސްޓަރ އަޙްމަދު މަޙްލޫފް ވިދާޅުވެއްޖެއެވެ.
މަޙްލޫފް މިހެން ވިދާޅުވީ އޭނާ ކުރައްވައިފައިވާ ޓްވީޓެއްގައެވެ.
މިނިސްޓަރ މަޙްލޫފް ވިދާޅުވީ ޑިމޮކްރެޓްސް ގެ ބައެއް އިސް ބޭފުޅުން މިއަދު ރައީސް ޞާލިޙް ނޫން ގޮތެއްކަމަށް ބުނަމުން ދިއުމަކީ މާދަމާ އެމްޑީޕީގެ ބައެއް މެންބަރުން ބަރުލަމާނީ ނޫންގޮތެއް ކަމަށް ބުނަށް ދެވޭ ޖާގައެއް ކަމަށެވެ. އަދި ޑިމޮކްރެޓްސްގެ ލީޑަރޝިޕުން އަދިވެސް އިތުރަށް ވިސްނާލަން މުހިއްމު ކަމެއްކަމަށް ދެކެވަޑައިގަންނަވާ ކަމަށް މަޙްލޫފް ވިދާޅުވިއެވެ.
މީގެ އިތުރުން މަޙްލޫފް ވިދާޅުވީ މިއީ ހިތްހަމަޖުހުން އެއްފަރާތް ކޮށް އެއްބަޔަކު އަނެއް ބައެއްގެ އަތުގައި ހިފަންވީ ވަގުތު ކަމަށެވެ. މިއީ "ވިން ވިން ސިޗުއޭޝަނަކަށް" ދާންވީ ވަގުތު ކަމަށާއި ބައެއްގެ ފިތުނަގައި ނުޖެހި އެއްބައިވާންވީ ވަގުތު ކަމަށެވެ.
މަޙްލޫފް މިހެން ވިދާޅުވެފައި ވާއިރު ޑިމޮކްރެޓްސް ޢާންމު ގިނަ މެމްބަރުން ތަކެއް ވަނީ ޕީއެންސީ/ޕީއެންސީގެ ރިޔާސީ ކެންޑިޑޭޓް ޑރ މުޙައްމަދު މުޢިއްޒަށް ތާއީދު ކުރުމަށް ނިންމައިފައެވެ. އަދި ބައެއް ރަށްރަށުގެ ކެމްޕޭނު ޓީމު ތަކުން ދަނީ މުޢިއްޒު ކެމްޕޭނާއި ގުޅެމުންނެވެ.
ޑިމޮކްރެޓްސްއިން ނިންމަފައިވަނީ ވަކި ކެންޑިޑޭޓަކަށް ތާއީދު ނުކުރުމަށެވެ. އަދި އެޕާޓީގެ އިސް ގިނަ ބޭފުޅުން ވަނީ ރައީސް ޞާލިޙް ނޫން ގޮތެއް ހޯދަން ޖެހޭ ކަމަށްބުނެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
