ފުލުހުންގެ ގިނަ ކަންކަން މިހާރު ދަނީ ސިޔާސީ ވަމުން: ރައީސް ޔާމީން
ދިވެހި ފުލުހުންގެ ޚިދުމަތުގެ ގިނަ ކަންކަން މިހާރު ދަނީ ސިޔާސީ ވަމުން ކަމަށާ، ފުލުހުންގެ ތަހުގީގަށް އިތުބާރު ނުކުރެވޭ ކަމަށް އިދިކޮޅު ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމް ވިދާޅުވެއްޖެއެވެ.
ނ އަތޮޅަށް ކުރައްވަމުންގެންދަވާ ދަތުރުފުޅުގެ ތެރެއިން ނ.މަގޫދޫގައި ބޭއްވި ޖަލްސާގައި ވާހަކަފުޅުދައްކަވަމުން ރައީސް ޔާމީން ވަނީ، އިއްޔެ ފުލުހުންގެ ބެލުމުގެދަށަށް ގެނެސްފައިވަނިކޮށް ނިޔާވި މީހާ ނިޔާވީ ޠަބީޢީ މަރަކުން ކަމަށް ގަބޫލުނުކުރައްވާ ކަމަށް ވިދާޅުވެފައެވެ.
އެމައްސަލައާއި ގުޅިގެން އިދިކޮޅުން ކަންބޮޑުވުން ފާޅުކުރާއިރު، އެ މައްސަލަ ތަހުގީގު ކުރާނެ ކަމަށް ފުލުހުން ބުނި ކަމުގައި ވިޔަސް ފުލުހުންގެ ބަހަށް އިތުބާރު ނުކުރެވޭ ކަމަށް ޔާމީން ވިދާޅުވިއެވެ. އެހެންކަމުން މި މައްސަލަ އަކީ އެމްޑީޕީގެ ސަރުކާރަށްވެސް ފިކުރު ކުރަންޖެހޭ ވަރުގެ ބޮޑު، ޒިންމާ އުފުލަންޖެހޭ މައްސަލައަކަށް ވާތީ އިދިކޮޅުން ބޭނުންވީ އެ މައްސަލާގައި މިނިވަން ތަހުގީގެއް ހިންގަން ކަމަށްވެސް ޔާމީން ވިދާޅުވިއެވެ.
"މިނިވަން ތަހުގީގެއް ކުރަން ގޮވާލަންޖެހެނީ ފުލުހުން ކުރާ މިފަދަ ތަހްގީގު ތަކަށް އިތުބާރު ނުކުރެވޭތީ. ފުލުހުންގެ ވަރަށް ގިނަ ކަންތައްތައް މިހާރު އެދަނީ ހަމަ ސިޔާސީ ވަމުން. މީކީ އަޅުގަނޑުމެންގެ ގައުމުގެ ކުރިމަގަށް އުޖާލާ ކަމެއް ނޫން. އެހެން ނަމަވެސް ހާލަތު އޮތް ގޮތް އަޅުގަނޑުމެން އެންމެ ފުރަތަަމަ ގަބޫލުކުރަން ޖެހޭނެ. އަދި އެކަން އަޅުގަނޑުމެންގެ ތެރޭގައި ހަމަ އެންމެނަށްވެސް އެނގެން ވާނެ."
މިއާއެކު ޔާމީން ވަނީ، ފުލުހުންގެ ބެލުމުގެ ދަށުގައި ހުއްޓާ ނިޔާވި މީހާގެ މައްސަލަ ކުއްލި މައްސަލައެއްގެ ގޮތުގައި މަޖިލީހަށް ހުށަހެޅުމުން މަޖިލީހުން ބޭރުކޮށްލުމާއި ގުޅިގެން ކަންބޮޑުވުން ފާޅުކޮށްފައެވެ. އަދި ރާއްޖޭގެ ކޮންމެ ހިސާބެއްގައި ނަމަވެސް ދިމާވާ އެފަދަ ކުއްލި ބޮޑެތި މައްސަލަތަކަކީ ކުއްލި މައްސަލަތައް ކަން ރައްޔިތުން އިންތިޚާބުކުރާ މަންދޫބުން ގަބޫލުކުރަންޖެހޭ ކަން ފާހަގަކޮށް ޔާމީން ވިދާޅުވީ، އެފަދަ މައްސަލަތައް މަޖިލީހުން ބަލަނީ އެކަމާއި ގުޅޭ ރަނގަޅު ތަހުގީގެއް ހިންގައި ދެން އެފަދަ ކަމެއް ނުހިނގާނެކަން ޔަގީން ކުރުމުގެ ގޮތުންކަމަށެވެ.
އެހެން ނަމަވެސް މީހެއްގެ ކުއްލި މަރުގެ މައްސަލަ އާއި ގުޅިގެން މަޖިލީހަށް ހުށަހެޅި ކުއްލި މައްސަލަ ވެސް ބަލައިގަތުމުގެ ހިތްވަރު އެމްޑީޕީ މެޖޯރިޓީ އޮތް މަޖިލީހުގައި ނެތް ކަމަށް ވިދާޅުވެ ޔާމީން ވަނީ ފާޑުވިދާޅުވެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
