ދިރާސީ އަހަރު ޖެނުއަރީގައި ފެށުމަށް ގާނޫނުގައި ކަނޑައަޅަނީ

ރައްޔިތުންގެ މަޖިލީހަށް މިއަދު ހުށަހެޅުނު ބިލެއްގައި، ދިރާސީ އަހަރު ކިޔެވުން ފެށޭނީ ކޮންމެ އަހަރެއްގެ ޖެނުއަރީ މަސް ކަމުގައި ތަޢުލީމާބެހޭ ޤާނޫނުގައި ކަނޑައަޅަން ހުށައަޅައިފި އެވެ.

ހުރާ ދާއިރާގެ މެންބަރު ޑރ. އަނާރާ ނަޢީމް ރައްޔިތުންގެ މަޖިލީހަށް ހުށަހަޅުއްވައިފައިވާ ބިލުގައި، ދިރާސީ އަހަރު ފެށޭނެ އުސޫލުތަކާއި ހޯމް ސްކޫލިން ތައާރަފުކުރުންފަދަ މުހިންމު ކަންކަން ހިމެނެއެވެ. މި ބިލުގެ ފުރަތަމަ ކިޔުން، މަޖިލީހުގެ މިއަދުގެ ޖަލްސާގައި ވަނީ އިއްވައިފައެވެ.

އެ ބިލުގައި، ދިވެހިރާއްޖޭގެ ދިރާސީ އަހަރާއި ދިރާސީ ކަލަންޑަރު ކަނޑައަޅާނެ އުސޫލުތަކެއް ވަނީ ހިމަނައިފައެވެ.

އެ އުސޫލުތަކުގައިވާ ގޮތުން:

• ކޮންމެ އަހަރެއްގެ ދިރާސީ އަހަރު ފެށެންވާނީ ޖެނުއަރީ މަހުގައެވެ.

• އެއްވެސް ސަބަބަކާ ހުރެ ޖެނުއަރީ މަހުގައި ދިރާސީ އަހަރު ނުފެށޭ ހާލަތެއް މެދުވެރިވިޔަސް، އެ އަހަރުގެ ފެބްރުއަރީ މަސް ނިމުމުގެ ކުރިން ދިރާސީ އަހަރު ފަށަންވާނެއެވެ.

މީގެ އިތުރުން، ކޮންމެ އަހަރެއްގެ ދިރާސީ ކަލަންޑަރު އެޑިއުކޭޝަން މިނިސްޓްރީން އެކުލަވާލާއިރު، އޭގައި ހިމަނަންޖެހޭ އަށް ކަމެއްވެސް ފާހަގަ ކުރެވިފައިވެއެވެ. އެއީ:

1. ދިރާސީ އަހަރު ފެށޭ ދުވަހާއި ނިމޭ ދުވަސް.

2. ކިޔަވައިދޭ ދުވަސްތައް.

3. ކިޔަވައި ނުދޭ ދުވަސްތައް.

4. ޕްރޮފެޝަނަލް ޑިވެލޮޕްމަންޓް ދުވަސްތައް.

5. އިމްތިހާނު ބާއްވާނެ ދުވަސްތައް.

6. ދިރާސީ އަހަރަށް އަލަށް ވަންނަ ދަރިވަރުންނަށް އެދެވޭނެ މުއްދަތު ހުޅުވާލާ ދުވަސްތައް.

7. އެއް ސްކޫލުން އަނެއް ސްކޫލަށް ދަރިވަރުން ބަދަލު ކުރުމަށް ކަނޑައަޅާފައިވާ ދުވަސްވަރު.

8. ސްކޫލުގެ ޗުއްޓީ ދުވަސްތައް.

ދިރާސީ އަހަރެއް ކަނޑައެޅުމުގައި، ރަސްމީ ބަންދު ދުވަސްތަކާއި ސްކޫލު ޗުއްޓީ ދުވަސްތައް ނުހިމަނައި، މަދުވެގެން 195 ދުވަހުގެ ކިޔެވުން ހިމަނަން ޖެހޭނެއެވެ.

އަދި ކުރިއަށް އޮތް ދިރާސީ އަހަރުގެ ކަލަންޑަރު، މިހާރު ހިނގަމުންދާ ދިރާސީ އަހަރު ނިމުމުގެ ކުރިން ކަނޑައަޅައި އިއުލާނު ކުރަން ޖެހޭނެ ކަމަށް އެ އުސޫލުގައި ބަޔާންކޮށްފައިވެއެވެ.

މީގެ އިތުރުން، ސްކޫލުތަކުގައި ކިޔަވައިދޭ މާއްދާތަކުން ނަގާ އިމްތިޙާނުތައް ބާއްވާނެ ނިޒާމެއް މިނިސްޓްރީން ކަނޑައަޅަން ޖެހޭނެ ކަމަށާއި، އެ ޤާނޫނުގެ ދަށުން ހަދާ ޤަވާއިދުގައި ވެސް މިކަން ހިމަނަން ޖެހޭނެ ކަމަށް އެ އިސްލާޙުގައި ބަޔާންކޮށްފައިވެއެވެ.

ރާއްޖޭގައި ކުރިން ދިރާސީ އަހަރު ފެށިފައިވަނީ ކޮންމެ އަހަރެއްގެ ޖެނުއަރީ މަހުގައެވެ. ނަމަވެސް، ކޮވިޑް-19ގެ ބަލިމަޑުކަމުގެ ސަބަބުން ސްކޫލަށް ދަރިވަރުން ހާޒިރުވެގެން ކިޔެވުން މެދުކެނޑި، ތަޢުލީމަށް އައި ބަދަލުތަކާ ގުޅިގެން، ކިޔެވުން ހަ މަސް ދުވަހަށް ދަންމާލައި، ދިރާސީ އާ އަހަރު އޮގަސްޓުގައި ފަށާ ގޮތަށް 2021 ވަނަ އަހަރު ބަދަލުކުރެވުނެވެ.

މިކަން ކުރިން އޮތް ގޮތަށް ބަދަލުކުރުމަކީ ރައީސް ޑރ. މުޙައްމަދު މުޢިއްޒުގެ ރިޔާސީ ވައުދެކެވެ. އެ ވައުދު ފުއްދުމުގެ ގޮތުން މި އަހަރު ޖެނުއަރީ މަހު ދިރާސީ އަހަރު ފަށާ ގޮތަށް ވަނީ ބަދަލުކޮށްފައެވެ.

އެޑިއުކޭޝަން މިނިސްޓަރު ޑރ. އިސްމާޢީލް ޝަފީޢު ވިދާޅުވެފައިވަނީ، ވެރިކަމަށް އަންނަ ކޮންމެ ބަޔަކު ބޭނުންވާއިރަށް ދިރާސީ އަހަރަށް ބަދަލު ނުގެނެވޭ ގޮތަށް، ދިރާސީ އަހަރު ތަޢުލީމުގެ ޤާނޫނުގައި ކަނޑައެޅުމުގެ ވިސްނުން ގެންގުޅުއްވާ ކަމަށެވެ.