ނަތީޖާ ލިބޭ ދުވަހު ނުކުރަންވީ ކަމަކީ އެހެންކުދިންގެ ނަތީޖާ ކިހިނެއްތޯ އަހަން ގުޅުން: މެޑަމް ފަޒްނާ

އިމްތިހާނުގެ ނަތީޖާ ލިބޭ ދުވަހު ނުކުރަންވީ ކަމަކީ އެހެން ކުދިންގެ ނަތީޖާ ކިހިނެއްތޯ އަހަން އެއް ބެލެނިވެރިއަކު އަނެއް ބެލެނިވެރިއަކަށް ގުޅުންކަމަށް ކުރީގެ ރައީސް އިބްރާހިމް މުޙައްމަދު ޞާލިހުގެ އަނބިކަނބަލުން ފަޒްނާ އަހުމަދު ވިދާޅުވެއްޖެއެވެ.

މިއަދު މިއަހަރުގެ މެއި/ޖޫންގައި ދަރިވަރުން ހެދި އޯލެވެލް އިމްތިހާނުގެ ނަތީޖާ ދޫކުރަން ފެށުމާއި ގުޅިގެން މެޑަމް ފަޒްނާ ފޭސްބުކްގައި ކުރެއްވި ޕޯސްޓެއްގައި ވިދާޅުވީ، ނަތީޖާ ހިއްސާ ކުރަން ބޭނުންވާ މީހުން ކުރާނެ ކަމަށާއި، ބައެއް މީހުން ސޯޝަލް މީޑިއާގައި ނަތީޖާ ކަރުދާސް ޕޯސްޓް ވެސް ކުރާނެ ކަމަށެވެ.

އެހެންނަމަވެސް އަނެއްބައި މީހުންނަކީ އެކަން ހިއްސާ ކުރަން ބޭނުންނުވާ ފަރާތްތައްކަން ފާހަގަކުރަމުން މެޑަމް ފަޒްނާ ވަނީ އެމީހުން އެ ނިންމުމަށް އިހްތިރާމް ކުރުމަށް އެދިވަޑައިގެންފައެވެ.

"ނަތީޖާ ހިއްސާކުރަން ބޭނުންވާ މީހުން ކުރާނެއެވެ. ބައެއް މީހުން ސޯޝަލް މީޑިއާގައި ނަތީޖާ ކަރުދާސް ޕޯސްޓް ވެސް ކުރާނެއެވެ. އަނެއްބައި މީހުންނަކީ ތަންކޮޅެއް ޕްރައިވެޓް މީހުންވީމަ އެފަދަ އެއްވެސް ކަމެއް ނުކުރާނެއެވެ. އެހެންވީމަ އެމީހުންގެ ޕްރައިވެސީ އަށް އިހުތިރާމް ކުރާށެވެ."

މެޑަމް ފަޒްނާގެ ޕޯސްޓްގައި ވެއެވެ.

އުންމީދު ކުރި ފަދަ ނަތީޖާއެއް ލިބުނު ކުދިންގެ އުފަލުގައި ބައިވެރިވެ މަރުހަބާ ކިޔާކަމަށާއި، އުންމީދު ކުރި ފަދަ ނަތީޖާއެއް ނުލިބުނު ކުދިން މާޔޫސްނުވެ އާ އަޒުމަކާއި ފެށުމަށް ހިތްވަރުދެއްވާ ކަމަށް މެޑަމް ފަޒްނާ ވިދާޅުވިއެވެ.

މިއަހަރުގެ އޯލެވެލް އިމްތިހާނުގެ ނަތީޖާ މިއަދު ހެނދުނު 9 ފެށިގެން ޑިޕާޓްމެންޓް އޮފް ޕަބްލިކް އެގްޒަމިނޭޝަނުން ސެންޓަރުތަކަށް ފޮނުވަން ފަށާފައިވާއިރު،  މިއަދު 12 ޖެހިއިރު ސެންޓަރުތަކުން ވަނީ ނަތީޖާ ދޫކުރަން ފަށާފައެވެ.

ނަތީޖާއަށް ޝަކުވާ ހުށަހެޅުމަށް ފުރުސަތު ހުުޅުވާލާނެ ކަމަށް އެ ވުޒާރާއިން ބުނެފައިވާއިރު، އެކަމަށް ކަނޑައަޅާފައިވާ ތާރީހެއް އަދި ހާމަކޮށްފައެއް ނުވެއެވެ.

އައިޖީސީއެސްއީ ހަދާ 7،155 ކުދިންނާއި އެސްއެސްސީގެ 346 ކުދިން ހިމެނޭހެން ޖުމްލަ 7،501 ކުދިން މި ފަހަރުގެ އޯލެވެލް އިމްތިހާނުގައި ބައިވެރިވިއެވެ.

ރާއްޖޭގެ 257 ސެންޓަރުގައި ހެދި މި އިމްތިހާނުތަކުގެ ނަތީޖާ ރީޗެކް ކުރަން ބޭނުންވާ ދަރިވަރުންނަށް މާދަމާއިން ފެށިގެން މި މަހުގެ ނިޔަލަށް، އެ އިމްތިހާނު ހެދި ސެންޓަރަށް ހުށަހަޅައިގެން އެކަން ހަމަޖައްސަން ޑީޕީއީއިން ވަނީ އެދިފައެވެ.