ވަގަށް 5600 ވޭޕް ކާޓްރިޖް އެތެރެކުރަން އުޅުނީ ކުރީގެ ފަސްޓް ލޭޑީ ފަޒުނާގެ އާއިލީ ކުންފުނީގެ ނަމުގައި

ކަސްޓަމްސްއިން މި މަހުގެ 17 ވަނަ ދުވަހު ހިންގި ޚާއްސަ އޮޕަރޭޝަނެއްގައި އަތުލައިގަތް 5,600 ވޭޕް ކާޓްރިޖަކީ ކުރީގެ ފަސްޓް ލޭޑީ ފަޒުނާ އަހްމަދުގެ އާއިލީ ކުންފުންޏެއް ކަމަށްވާ ޕޭން-އޯޝަން އިންޓަނޭޝަނަލް ޕްރައިވެޓް ލިމިޓެޑްގެ ނަމުގައި އެތެރެކުރި ޝިޕްމަންޓެއްގެ ތެރެއިން ފެނުނު ތަކެތިކަން ހާމަވެއްޖެއެވެ.

ކަސްޓަމްސްގެ އޮފިޝަލަކު "ވޮއިސް" ނޫހަށް މައުލޫމާތު ދެއްވަމުން ކަށަވަރުކޮށްދެއްވާފައިވާ ގޮތުގައި، މި ވޭޕް ކާޓްރިޖްތައް ފެނިފައިވަނީ ޕޭން-އޯޝަން އިންޓަނޭޝަނަލްގެ މުދާ ޝިޕްމަންޓެއްގެ ތެރެއިންނެވެ. ޕޭން-އޯޝަން އިންޓަނޭޝަނަލް ޕްރައިވެޓް ލިމިޓެޑަކީ ފަޒުނާ އަހްމަދުގެ އާއިލީ މަސްލަހަތު އޮންނަ ކުންފުންޏެކެވެ.

އެ ކުންފުނީގެ ޑިރެކްޓަރުންގެ ބޯޑުގައި ފަސް މީހުން ތިބިއިރު އެތަނުން އެކަކީ ފަޒުނާގެ ބައްޕަ އަހްމަދު އިސްމާއީލް މަނިކު، (ބޮޑު ސިއްކަ)އެވެ. މީގެ އިތުރުން، އެ ކުންފުނީގެ ހިއްސާދާރެއްގެ ގޮތުގައި އޮތް "ޝައިންޓްރީ ހޯލްޑިންގްސް" ގެ ހިއްސާދާރުންގެ ތެރޭގައި ފަޒުނާވެސް ހިމެނިވަޑައިގަންނަވައެވެ.

ކަސްޓަމްސް އިން މައުލޫމާތު ދީފައިވާ ގޮތުގައި، މި ތަކެތި އަތުލައިގަނެފައިވަނީ ކަނޑުމަގުން ރާއްޖެ ގެނައި މުދާ ޝިޕްމަންޓެއްގައި ގާނޫނާއި ގަވާއިދާ ހިލާފު ތަކެތި ހުރެދާނެ ކަމަށް ކަސްޓަމްސްއަށް ޝައްކުކުރެވިގެން މާލޭ ކޮމާޝަލް ހާބަރުގައި ހިންގި ހާއްސަ އޮޕަރޭޝަނެއްގައެވެ.

މި އޮޕަރޭޝަންގައި ބަލައި ފާސްކޮށްފައިވަނީ "ޖެނެރަލް ކާގޯ" ނުވަތަ އާންމު މުދަލުގެ ގޮތުގައި ޑިކްލެއާކޮށްފައިވާ ޝިޕްމަންޓެކެވެ. އެހެންނަމަވެސް، އެ ޝިޕްމަންޓް ބަލައި ފާސްކުރިއިރު އޭގެ ތެރޭގައި ސިއްރުން ފޮރުވާފައި ހުރި 5,600 ވޭޕް ކާޓްރިޖް ފެނިފައިވާ ކަމަށް ކަސްޓަމްސްއިން ބުނެފައިވެއެވެ.

މި މައްސަލައާ ގުޅިގެން އިތުރަށް ބަލަންޖެހޭ ކަންކަން ކަމާބެހޭ އިދާރާތަކުން މިހާރު ދަނީ ތަހުގީގު ކުރަމުންނެވެ.