ނަޝީދަށް ދައުލަތުގެ ވެރިކަން ދޭގޮތަށް އެއްބަސްވުމަކީ އެމްޑީޕީ އެކުވެރިވާނެ ކަމެއް ނޫން: ފަޒްނާ

ކުރީގެ ރައީސް މުހައްމަދު ނަޝީދު ދައުލަތުގެ ވެރިކަން ދޭގޮތަށް އެއްބަސްވުމަކީ އެމްޑީޕީ އެކުވެރިވާނެ ކަމެއް ނޫން ކަމަށް ކުރީގެ ރަައީސް އިބްރާހިމް މުހައްމަދު ސޯލިހްގެ އަނބިކަނބަލުން ފަޒްނާ އަހްމަދު ވިދާޅުވެއްޖެ އެވެ.

ފަޒްނާ މިހެން ވިދާޅުވީ ރައީސް ސޯލިހް ފަޅީގައި ހުންނެވި ކުރީގެ މެންބަރު ރޮޒައިނާ އާދަމް, އެމްޑީޕީގެ ޗެއާޕާސަން އިންތިހާބުގައި ރައީސް ނަޝީދަށް ތާއީދު ކުރަން ނިންމުމާއި ގުޅިގެންނެވެ. ރޮޒައިނާ އަކީ ނަޝީދަށް ވަރަށް ފާޑުވިދާޅުވި ބޭފުޅެކެވެ. ހާއްސަކޮށް އެމްޑީޕީ ދޫކޮށްލެއްވުމުން އެންމެ ފާޑުވިދާޅުވި އެއް ބޭފުޅަކީ ރޮޒައިނާ އެވެ.

ރޮޒައިނާގެ ބަދަލަށް އެމްޑީޕީގެ ތެރޭގައި ވަރަށް ބޮޑު ފާޑުކިޔުމެއް އެބަ އޮތެވެ.

ރޮޒައިނާ ވަނީ ނަޝީދަށް ތާއީދުކުރާ ކަން ހާމަކޮށް ޕޯސްޓެއް ކޮށް އެ ސަަބަބުތައް ސާފުކޮށްދީފަ އެވެ. އެ ޕޯސްޓަށް ކުރެއްވި ކޮމެންޓެއްގައި ފަޒްނާ ވަނީ ޕާޓީ އެއްބައިވަންތަކުރަން ނަޝީދަށް ތާއީދުކުރާ ކަމަށް ރޮޒައިނާ ވިދާޅުވުމުން އެކަމަށް ރައްދު ދެއްވާފަ އެވެ.

ފަޒްނާ ވަނީ ރައީސް ނަޝީދު ޗެއަޕާސަން ކަމަށް ނުކުމެ ވަޑައިގަތީ "ބޮޑުބަދަލު" ގެ ނަމުގައި ފައްޔާޒަށް  ބޮޑުވަޒީރުކަން، ރައީސް ނަޝީދަށް ދައުލަތުގެ ވެރިޔާކަން ދޭގޮތަށްކަން ފާހަގަކުރައްވާ އެހާ ހިސާބުން ވެސް އެ އޮތީ އެކުވެރިކުރުމުގެ މަގަށް ހުރަސްއެޅިފައި ކަަމަށް ވިދާޅުވެފަ އެވެ.

އަދި ވިދާޅުވީ ބަޔަކު އެކުވެރިކުރުމަށް ބޭނުންވާ މައިގަޑު އެއް އަސާސަކީ ހަމަހަމަ އުސޫލެއް ގެންގުޅުން ކަމަށާ  ވަކިމީހަކު ގޮވައިގެން ނުކުމެ އިންސާފުވެރިކަމާއެކު ޗެއާޕާސަންކަން ކުރައްވާނެ ގޮތެއް ނުވިސްނޭ ކަމަށެވެ.

"ރައީސް ނަޝީދު ވިޔަސް ފައްޔާޒު ވިޔަސް އަދި އެހެން ބޭފުޅަކުވެސް ރައީސް އަކަށް ނޫނީ ބޮޑުވަޒީރަކަށް ނޫނީ  މިނިސްޓަރަކަށް، ނޫނީ އެންބެސަޑަރަކަށް އަދި ކިއެއްތަ އެއްވެސް ސިޔާސީ މަގާމަކަށް ވަޑައިގެންނެވުމަށް މަސައްކަތް ކުރެއްވުމަކީ އަޅުގަނޑަށް މައްސަލައެއް ނޫނެވެ. ސިޔާސީ ކަންކަމުގައި އުޅުއްވާނީ ސިޔާސީ ރޮގުން ކުރިއަށް ވަޑައިގަންނަވާށެވެ," ފަޒްނާ ވިދާޅުވި އެވެ.

އަދިވެސް އެކަމަނާ ވިދާޅުވެފައިވެ އެވެ.

"އަޅުގަނޑުގެ ޕޮއިންޓަކީ ވަކި އަތަކަށް ނުޖެހި އިންސާފުވެރި ކަމާއެކު މަސައްކަތް ކުރަން ޖެހޭ މަޤާމަކަށް ވަކިއަތަކަށް ޖެހިގެން ހުރިމީހަކު އައިސްގެން ޕާޓީގެ އެކުވެރި ކަމެއް ނުދެމެހެއްޓޭނެއޭ އެވެ,"

މީކާއީލަށް ތާއީދުކުރާ ސަބަބު

މި ޕޯސްޓްގައި ފަޒްނާ ވަނީ މީކާއީލަށް ތާއީދުކުރަން ނިންމި ސަބަބުވެސް ސާފުކޮށް ދެއްވާފަ އެވެ. ވިދާޅުވީ މީކާއީލް އަށް ތާއީދުކުރަން ފުރަތަމަ ނިންމީ ޒުވާން ޖީލަކަށް ޕާޓީ ހިންގަން ހަވާލު ކުރަންވެއްޖެކަމަށް ގަބޫލު ކުރެވޭތީ ކަމަށެވެ.

އަދި އެ ތާއީދު ބޮޑުވީ "ޕްރިންސިޕަލް ސެންޓާރޑް ލީޑަޝިޕް" އަކަށް ވަކާލާތު ކުރައްވާތީ ކަމަށް ވިދާޅުވި އެވެ.

ރައީސް ސޯލިހްގެ ތާއީދުވެސް އޮތީ މީކާއީލަށެވެ. ސޯލިހް ވަނީ މީކާއީލާއެކު ހުރިހާ އަތޮޅުތަކަށް ދަތުރުކުރައްވަން ނިންމަވާފަ އެވެ.