އީރާންއިން އެމެރިކާގެ އަސްކަރީ މަރުކަޒުތަކަށް އަމާޒުކޮށް ހަމަލާދޭނެކަމަށް އިންޒާރުދީފި

އީރާނާއި ދެކޮޅަށް އިޒުރޭލުން ހަމަލާދިނުމުގެ ސަބަބުން އެކަމުގެ ބަދަލުހިފުމުގެ ގޮތުން، އިޒުރޭލަށް ވަރުގަދަ ހަމަލާތަކެއް ދިނުމުގެ އިތުރުން މެދުއިރުމަތީގައި ހުރި އެމެރިކާގެ އަސްކަރީ މަރުކަޒުތަކަށް އަމާޒުކޮށް ހަމަލާތައް ފުޅާކުރާނެކަމުގެ އިންޒާރު އީރާނުގެ އަސްކަރީ އޮފިޝަލުން ދީފިއެވެ.

ރޭގައި އިޒުރޭލުން ދިން ހަމަލާތަކުން ކުރިމަތިލުންތަކަކަށް ނިމުމެއްނާންނާނެ ކަމަށާއި ކުރިއަށްއޮތްތާނގައި އިޒުރޭލަށް ވަރުގަދަ ހަމަލާތަކެއްދޭނެ ކަމަށް އީރާނުން ވަނީ ބުނެފައެވެ. އަދި މި ހަމަލާއަކީ އިޒުރޭލްށް ވޭންދެނިވި އަދި ހިތާމަވެރި ރައްދަކަށް ވެގެންދާނެ ކަމަށްވެސް އީރާނުން ބުނެފައިވެއެވެ.

އަދި ހަމައެހެންމެ އީރާނުގެ ރައްދު ޙަމަލާތައް، ޔަހޫދީ އިޒުރޭލުން އިސްތިޢުމާރުކޮށްފައިވާ ހުރިހާ ސަރަހައްދުތަކެއްގެ އިތުރުން ޔަހޫދީންނަށް އެންމެ ވާގިވެރިވާ އެމެރިކާއިން އެ މެދުއިރުމަތީގައި ހިންގާ އަސްކަރީ މަރުކަޒުތަކަށް އަމާޒުކުރާނެކަމުގެ އިންޒާރުވެސް އީރާނުން ވަނީ ދީފައެވެ.

ފާހަގަކޮށްލެވޭ ގޮތުގައި އީރާނުން އިޒުރޭލާ ދެކޮޅަށް ވަރުގަދަ ހަމަލާތަކެއް ދޭނެކަމުގެ އިންޒާރު ދީފައި މިވަނީ ފާއިތުވި 24 ގަޑިއިރުގެ ތެރޭގައި އީރާންއާއި ދެކޮޅަށް އިޒުރޭލުން ވަރުގަދަ ހަމަލާތަކެއް ދީފައިވާ ދަނޑިވަޅެއްގައެވެ. އިޒުރޭލުން ދިން މި ހަމަލާތަކުގައި އީރާނުގެ އިންޤިލާބީ ފައުޖުގެ އިސްވެރިޔާ، ޙުސައިން ސަލާމީއާއި އީރާނުގެ ހަތިޔާރުއެޅި ބާރުގެ ޗީފް އޮފް ސްޓާފް މުޙައްމަދު ބަޣާރީއާއި އެމަޖެންސީ ކޮމާންޑުގެ ކޮމާންޑަރު ހިމެނޭ ގޮތަށް ގިނަ ޢަދަދެއްގެ އަސްކަރީ ވެރިން ވަނީ ޝަހީދު ކޮށްލައިފައެވެ.

ބަދަލު ހިފުމުގެ ގޮތުން އީރާނުންވެސް އިޒުރޭލާއި ދެކޮޅަށް އެތައް ސަތޭކަ މިސައިލު ހަމަލާތަކެއް ވަނީ ދީފައެވެ. މި ހަމަލާ ދީފައި ވަނީ އޮޕަރޭޝަން ޓްރޫ ޕްރޮމިސް’ގެ ނަމުން ނަން ދެވިފައިވާ ހާއްސަ އޮޕަރޭޝަނެއްގެ ދަށުންނެވެ. އީރާނުގެ އިންގިލާބީ ފައުޖުން ބުނެފައިވާ ގޮތުގައި މިސައިލް ހަމަލާ އަމާޒު ކޮށްފައިި ވަނީ އިޒްރޭލުގެ އަސްކަރީ މަރުކަޒުތަކާއި ވައިގެ މަރުކަޒުތައް ހިމެނޭ ގޮތަށް ކަމަށެވެ. މަސްރަހް ދިރާސާކުރާ ފަރާތްތަކުން ބުނާގޮތުގައި މިއީ އިޒްރޭލު ބަލިކޮށްލަން އީރާނަށް ލިބޭ ރަނުގެ ފުރުސަތަކަށް ވާނެއެވެ.

އީރާނުން އިޒުރޭލަށް ދިން މިސައިލު ހަމަލާގައި ޔަހޫދީންގެ 20 މީހުންނަށް ވަނީ އެކިވަރުގެ ޒަހަމްވެފައެވެ. އީރާނުން ވަނީ އިޒުރޭލުގެ އަސްކަރިއްޔާގެ މައި އިދާރާ ހިމެނޭހެން ގިނަ އިމާރާތްތަކަކަށް ބޮޑެތި ގެއްލުންތަކެއް ދީފައެވެ. އީރާނުގެ މި ވަރުގަދަ ހަމަލާތަކަށްފަހު ޔަހޫދީ އިޒުރޭލުން ވަނީ އީރާނުން ދިން މިސައިލު ހަމަލާގައި އިޒުރޭލަށް ލިބުނު ގެއްލުންތަކުގެ ފޮޓޯ އާއި ވީޑިޔޯ ނެގުން މަނާ ކޮށްފައެވެ.