އޯޓިޒަމް އަށް މީހުން ހޭލުންތެރިކުރުވުުމަށް އެމްއޭސީއެލްއިން ހާއްސަ އިވެންޓެއް ބާއްވައިފި
މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން މޯލްޑިވްސް އޯޓިޒަމް އެސޯސިއޭޝަން އަށް އެއްބާރުލުން ދިނުމުގެ ގޮތުން ހާއްސަ އިވެންޓެއް ބާއްވައިފިއެވެ.
އެގޮތުން ބައިނަލްއަގްވާމީ އޯޓިޒަމްއަށް ހޭލުންތެރިކުރުމުގެ މަހާއި ގުޅިގެން ވެލާނާ އިންޓަރނޭޝަނަލް އެއާޕޯޓްގެ ޓުއާރ އެއް ދަރިވަރުންނަށް ދިނުމުގެ އިތުރުން ފަންޑް ހޯދުމުގެ އިވެންޓެއް އެމްއޭސީއެލްއިން ވަނީ ބާއްވައިފައެވެ.
މިކަމާއި ގުޅިގެން އެކުންފުނިން ނެރެފައިވާ ނޫސް ބަޔާނެއްގައި ބުނެފައިވަނީ އެމްއޭސީއެލްގެ ކޯޕަރޭޓް ސޯސަލް ރެސްޕޮންސިބިލިޓީ (ސީއެސްއާރ) ގެ ދަށުން ކުރިއަށް ގެންދެވުނު އެއާޕޯޓް ޓުއާރގެ ހަރަކާތުގައި 14 ދަރިވަރުންނާއި 3 ޓީޗަރުން ބައިވެރިވެފައިވާ ކަމަށެވެ.
އެގޮތުން އެއާޕޯޓް ޓުއާރގެ ހަރަކާތުގައި އެއާޕޯޓްގެ ރޭމްޕް އޮޕަރޭޝަންތަކާއި ފްލައިޓް ހޭންޑްލިންގް ބަލައިލުމަށް ދަރިވަރުންނަށް ފުރުސަު ލިބުމުން ތިބީ ވަރަށް އުފާވެފައިވެފައި ކަމަށް އެމްއޭސީއެލްއިންވަނީ ފާހަގަކޮށްފައެވެ.
މިއާއިއެކު ދަރިވަރުންނަށް އެއާޕޯޓްގެ އެމަޖެންސީ ޚިދުމަތްތައް ބަލައިލުމަށް ދިން ފުރުސަތުގެ ތެރެއިން ފަޔަރ އެންޑް ރެސްކިއު ޓީމާއިއެކު އަލިފާން ނިއްވާ އުޅަނދުތައް ބަލައިލުމުގެ އިތުރުން ފަޔަރ އެންޑް ރެސްކިއު ޔުނިފޯމް ލައިގެން އުޅަނދުތަކަށް އެރުމުގެ ފުރުސަތުވެސް ދެވިފައިވާ ކަމަށް އެކުންފުނިން ބުނެފައިވެއެެވެ.
މި ޓުއާރ ނިންމާލައިފައިވަނީ އެއާޕޯޓްގެ ރިކްރިއެޝަން ސެންޓަރުގައި އޮތް ކުޑަ އިވެންޓް އަކާއިއެކު އެމްއޭސީއެލްގެ ފަރާތުން ދެވުނު ހާއްސަ ހަދިޔާ ތަކަކާއިއެކު ކަމަށް އެކުންފުނިން ބުނެފައިވެއެވެ.
މި އިވެންޓްގެ އިތުރުން މި މަހުގެ ކުރީގެ ކޮޅު ފަންޑް ހޯދުމުގެ ޕްރޮގްރާމެއްވެސް ކުރިއަށް ގެންގޮސްފައިވާ ކަމަށް އެމްއޭސީއެލްއިން ފާހަގަކޮށްފައިވެއެވެ.
އެގޮތުން މި ޕްރޮގްރާމްގައި މޯލްޑިވްސް އޯޓިޒަމް އެސޯސިއޭޝަންއަށް އެއާޕޯޓްގައި މުދާ ވިއްކުމުގެ ފުރުސަތު ވަނީ ދީފައެވެ. މި ޕްރޮގްރާމް ވަރަށް ކާމިޔާބު ކަމާއިއެކު ނިންމާލެވިފައިވާއިރު އެމްއޭސީއެލް އިން ވަނީ އެސޯސިއޭޝަންއިން އޯޓިޒަމް އަށް ހޭލުުންތެރިކުރުވުމަށް ކުރާ މަސައްކަތަށް އެހީތެރިވުމުގެ ގޮތުން ފަންޑު ހޯދައިދީފައި ކަމަށް އެކުންފުނިން ބުނެފައިވެއެވެ.
މީގެ އިތުރުން އެމްއޭސީއެލްއިން ވަނީ މި ސީއެސްއާރ ޕްރޮގްރާމްތަކަކީ ރާއްޖޭގެ 'ވަލްނަރަބަލް' ކޮމިއުނިޓީތަކަށްް އެއްބާރުލުން ދިނުމަށް ޑިޒައިން ކުރެވިފައިވާ ޕްރޮގްރާމްތަކެއް ކަމަށް ފާހަގަކޮށް އެ ކުންފުނިން އަބަދުވެސް މަސައްކަތް ކުރަމުން ދަނީ އެކަމަށް އެންމެ ބޭނުންވެފައިވާ މީހުންގެ ދިރިއުޅުމުގައި ހެޔޮ އަސަރު ކުރުމަށް ކަމަށް ބުނެފައެވެ.
އެގޮތުން މޯލްޑިވްސް އޯޓިޒަމް އެސޯސިއޭޝަން އާއިއެކު ތެދުވެ ހުރުމުގެ އުންމީދަކީ އޯޓިޒަމްއަށް މީހުން ހޭލުންތެރި ކުރުވުމާއި އިންކްލޫސިވް އަދި ވިސްނޭ މުޖްތަމައެއް ބިނާކުރުން ކަމަށް އެމްއޭސީއެލްއިން ބުނެފައިވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
