ޕްލާސްޓިކް ކޮތަޅު ސަރުކާރުން ވިއްކުން: ހިލޭ ޑެލިވަރީ ކުރާނީ ގިނައިން ގަންނަ ފަރާތްތަކަށް

ކުނި މެނޭޖް ކުރުމުގެ ގާނޫނަށް ސަރުކާރުން ގެނައި އިސްލާހާއި އެކު ޕްލާސްޓިކް ކޮތަޅުން ފީ ނަގަން ފެށުމާ އެކު ކޮތަޅުގެ އަގު ބޮޑުވެ ކުނި އަޅާ ކޮތަޅުގެ އަގު ވެސް އުފުލިގެން ދިއުމުން އެކަން ހައްލު ކުރުމަށް ވޭސްޓް މެނޭޖްމަންޓް ކޯޕަރޭޝަން (ވެމްކޯ) އިން ވިއްކާ ކޮތަޅު ހިލޭ ޑެލިވަކޮށްދޭނީ ގިނައިން ގަންނަ މީހުންނަށް އެކަނި ކަމަށް އެ ކޯޕަރޭޝުން ބުނެފި އެވެ.

ވެމްކޯއިން އިއްޔެ އާއްމުކުރި އިއުލާނެއްގައި ވާގޮތުން، 'ބިންލައިނަރ' ގަތުމަށް މިހާރު ޕްރި-އޯޑަރ ކުރެވޭނެ ކަމަށާ އަދި އެފަދައިން އޯޑަރު ކުރެވޭނީ މަދުވެގެން 24 ކޮތަޅަށް ކަމަށެވެ.

އެކަމާއި ގުޅިގެން އެއްފަހަރާ 24 ބޮނޑި ކޮތަޅު ގަންނަން ޖެހެނީ ކަމަށް ބުނެ އާއްމުން ޝަކުވާކުރަމުން އަންނަނިކޮށް ވެމްކޯއިން ބުނީ 24 ބޮނޑި ކޮތަޅު އެއީ ހިލޭ ޑެލިވަރީ ލިބޭ އަދަދު ކަމަށާއި އެއީ ވިޔަފާރިތަކަށް ހާއްސަކޮށް އަގު ހެޔޮކޮށް ލިބޭނެ ގޮތަށް ވިއްކާ ކޮތަޅު ކަމަށެވެ.

އަދި ކޮތަޅު އޯޑަރު ކުރުމަށް ހާއްސަ ލިންކެއް ހެދިފައިވާނެ ކަމަށާއި، ސަރުކާރު ބަންދުނޫން ތިން ދުވަހުގެ ތެރޭގައި އޯޑަރުކުރި ކޮތަޅުތައް ޑެލިވަރީ ކޮށްދޭނެ ކަމަށްވެސް ވެމްކޯއިން ބުނެއެވެ.

މީގެ އިތުރުން، ހެނދުނު 11:00 އިން މެންދުރު ފަހު 3:00 އަށް ވެމްކޯގެ މާލެ، ހުޅުމާލެ އަދި ވިލިމާލޭގެ ވޭސްޓް ޓްރާންސްފާ ސްޓޭޝަންތަކުގެ ކަސްޓަމަ ފްރޮންޓް އޮފީސްތަކުން އާންމުންނަށް ވެސް ކޮތަޅު ވިއްކަން ވަނީ ފަށައިފަ އެވެ.

ކުނި މެނޭޖްކުރުމަށް ބޭނުންކުރާ 3 ސައިޒެއްގެ ކޮތަޅު، ކަޅު ކުލައާއި ފެހި ކުލައިން، 27 އެޕްރީލް އިން ފެެށިގެން ވެމްކޯ އިން ވަނީ ދޫކުރަން ފަށާފައެވެ. އެއީ ލާޖް، ޑަބަލް އެކްސް ލާޖް، އަދި ޓްރިޕަލް އެކްސް ލާޖްއެވެ.

މީގެ ތެރެއިން ލާޖް ސައިޒް ގެ 100 ކޮތަޅުގެ ބޮނޑިއެއްގެ އަގަކީ 35ރ އެވެ. ޑަބަލް އެކްސް ލާޖް ސައިޒްގެ 100 ކޮތަޅުގެ ބޮނޑިއެއްގެ އަގަކީ 165ރ އެވެ. ޓްރިޕަލް އެކްސް ލާޖް ގެ 50 ކޮތަޅުގެ ބޮނޑިއެއްގެ އަގަކީވެސް 165ރ އެވެ.

ކުނި އުކާލުމުގައި ކުނިވާ ޒާތުގެ ކުނި ނުވަތަ އަމިއްލައަށް ފަނާވާ ޒާތުގެ ކުނި ފެހި ކޮތަޅުގައި ބަންދު ކުރުމަށާއި، އަދި އެހެނިހެން ކުނި ކަޅު ކޮތަޅުގައި ބަންދުކުރުމަށް ވެމްކޯއިން ބުނެފައިވެއެވެ.