އެއާޕޯޓު ހޯދިހެން ސަރަހައްދު ހޯދުމަށް ނިކުންނަން ޖެހުނަސް ފަސްޖެހުމެއް ނެތް: އާޒިމާ

ދިވެހިންގެ މައި ދޮރޯށި، ވެލާނާ އިންޓަނޭޝަނަލް އެއާޕޯޓު ދިވެހިންގެ އަތްމަތިން ގެއްލުނު ދުވަހު އެއާޕޯޓު ހޯދުމަށް ކުރަންޖެހުނު މަސައްކަތް ރާއްޖޭގެ ސަހަރައްދު ހޯދަން ކުރައްޖެހުނަސް، ފަސް ނުޖެހި ދިވެހިން އެ މަސައްކަތް ކުރާނެކަމަށް ކުރީގެ ބަންޑާރަނައިބު އާޒިމާ ޝުކޫރު ވިދާޅުވެއްޖެ އެވެ.

އާޒިމާ މިފަދައިން ވިދާޅުވެފައިވަނީ މާދަމާއަށް އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް) ރާއްޖޭގެ ސަރަހައްދީ އިން ކަނޑައެޅުމާ ގުޅޭ ގޮތުން ހުށައަޅާފައިވާ މައްސަލައާއި ގުޅިގެން ގޮތް ނިންމުމަށް ތާވަލުކޮށްފައިވާއިރު އެ މައްސަލައިގެ ހުކުމް އައިސްދާނެ ގޮތަކާއި މެދު އަމިއްލަފުޅު ޚިޔާލުތަކާއި ގާނޫނީ ނުގުތާތަކުގެ އަލީގައި، އަދި އެ ޝަރީއަތް ހިނގާދިޔަ ގޮތުގެ މައްޗަށް ބިނާކޮށް ތައްޔާރުކޮށްފައިވާ ލިޔުމެއް ހިއްސާކުރައްވާ ފޭސްބުކުގައި ލިޔުއްވި ޕޯސްޓެއްގަ އެވެ.

އާޒިމާ ވިދާޅުވީ މާދަމާ އިޓްލޮސްގައި އޮތް މައްސަލަ ދިވެހިންނާއި ދެކޮޅަށްވެސް ނިމިދާނެ ކަމަށެވެ. އެކަމުގެ ސަބަބުން ރާއްޖޭގެ ކަނޑުގެ ސަރަހައްދުން ބޮޑުބައެއް ގެއްލުމުގެ ނުރައްކާތެރިކަން އިންތިހާއަށް ބޮޑުކަމަށެވެ.

އެހެން ނަމަވެސް އެ ކޯޓުގައި އެފަދައިން ނިންމި ނަމަވެސް ދިވެހިރާއްޖޭގެ ޚާއްސަ އިޣްތިޞާދީ ސަރަހައްދު ހޯދުމަށް ދިވެހިން މަސައްކަތްކުރާނެކަމަށް އާޒިމާ ވިދާޅުވި އެވެ.

އޭނާ ވިދާޅުވީ ދިވެހިންގެ މައި ދޮރޯށި ޖީއެމްއާރު ކުންފުނީގެ އަތުން އަނބުރާ ހޯދީވެސް ދިވެހި ދަރިން ނިކުމެ ކުރި މަސައްކަތުން ކަމަށެވެ.

އެހެންކަމުން އިޓްލޮސްގައި އޮތް މައްސަލަ ދިވެހިންނާއި ދެކޮޅަށް ނިމުމުކަމުގައި ވިޔަސް ދިވެހިންގެ ސަރަހައްދު ހޯދުމަށް ކުރާ މަސައްކަތްތައް ފަސްޖެހުމެއް ނެތި ކުރައްވާނެކަމަށް އާޒިމާ ވިދާޅުވި އެވެ. އަދި އެ މަސައްކަތުގައި ޚުދު އޭނާވެސް ބައިވެރިވެވަޑައިގަންނަވާނެ ކަމަށް އާޒިމާ ވަނީ ވިދާޅުވެފަ އެވެ.

ސަރަހައްދާއި ގުޅޭ އެ މައްސަލައިގައި މޮރިޝަސްއިން އެދިފައިވާ ގޮތަށް އިކުއިޑިސްޓެންސް އުސޫލުން ބައިކުރުމުން ލިބޭނެ މިންވަރަށްވުރެ ބޮޑުމިންވަރެއް ހައްގުވާ ގާނޫނީ އެތައް ސަބަބެއް ހުރިއިރު ދިވެހި ދައުލަތުން އެކަންކަމަށް ވަކާލާތުކޮށް ކޯޓަށް އެކަންކަން ހުށައަޅާފައި ނުވާކަން އިޓްލޮސްގައި ކުރިއަށް ދިޔަ އަޑުއެހުންތަކުގެ ޔައުމިއްޔާތަކުން ހާމަވެއެވެ.

އަދި އެ މައްސަލައިގައި ދައުލަތުން ވަކާލާތު ކުރަމުންދަނީ ދިވެހިންގެ މަސްލަހަތު ހިމާޔަތް އިސްކޮށްގެން ނޫންކަން ފާހަގަކޮށް ކުރީގެ ބަންޑާރަ ނައިބުންނާއި ޤާނޫނީ ފަންނުގެ ބޭފުޅުން ގެންދަވަނީ ކަންބޮޑުވުން ފާޅުކުރަމުން ނެވެ.