ރައީސްގެ ފ ދަތުރު: ނިލަންދޫ ކައުންސިލުން ރައްޔިތުންގެ ފަރާތުން 7 ކަމެއް ރައީސަށް ހުށައަޅައިފި

ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ފ. އަތޮޅަށް ކުރައްވާ ދަތުރުފުޅުގައި ނިލަންދެއަތޮޅު އުތުރުބުރީ ނިލަންދޫއަށް ވަޑައިގެން ކައުންސިލާއި އަންހެނުންގެ ތަރައްޤީއަށް މަސައްކަތް ކުރައްވާ ކޮމިޓީއާއެކު ކުރިއަށް ގެންދެވި ބައްދަލުވުމުގައި، ރަށު ކައުންސިލުން ރައްޔިތުންގެ ފަރާތުން 7 ކަމެއް ހުށައަޅައިފި އެވެ.

މި ބައްދަލުވުމުން ފެއްޓެވުމުގެ ގޮތުން ރައީސް ޞާލިހުވަނީ ކައުންސިލް ބައްދަލުވުމުގެ ކުރިން އެ ރަށުގެ ރައްޔިތުންނާއެކު ކުރިއަށް ގެންދިޔަ ބައްދަލުވުމުގައި، ރައްޔިތުންގެ ފަރާތުން ހުށައަޅާފައިވާ ކަންތައްތަކަށް އަލިއަޅުވާލައްވާފަ އެވެ.

އެފަހުން ކައުންސިލުން ވަނީ ރައްޔިތުންނަށް ބޭނުންޖެހިފައިވާ ތަފާތު 7 ކަމެއް ރައީސުލްޖުމްޙޫރިއްޔާ އާއި ހިއްސާ ކުރައްވާފަ އެވެ. ކައުންސިލުން ހުށައެޅުއްވި ކަންކަމުގެ ތެރޭގައި ހިމެނެނީ؛

1. ފަތުރުވެރިކަން ތަރައްޤީކުރުމަށް ހުރި ދަތިތައް ނައްތައިލުން

2. ގިރާސަރަހައްދު ޙިމާޔަތް ކުރުން

3. ކައުންސިލްއިދާރާގެ އައުއިމާރާތެއް އެޅުން

4. ފުލުހުންގެ މަރުކަޒެއް ބިނާކުރުން

5. ސިއްޙީ ޚިދުމަތް އިތުރަށް ފުޅާކުރުމުގެ ގޮތުން ޑަޔަލަސިސް ހެދޭނެ ގޮތާއި، ހޮސްޕިޓަލްގައި އައިސީޔޫއެއް ޤާއިމްކުރުން

6. އިންޖީނުގެ ރީލޮކޭޓްކުރުމާއި،

7. ފެރީގެ ނިޒާމްގެ ޚިދުމަތް އިތުރަށް ރަނގަޅު ކުރުން

ޤުރުއާނާއި ބެހޭ މަރުކަޒުގެ ގޮފި ހިންގުމުގައި ދިމާވެފައިވާ ޢިމާރާތުގެ ދަތިކަން ހުރިކަން ވެސް ކައުންސިލުން ވަނީ ފާހަގަކޮށްފަ އެވެ.

އޭގެ އިތުރުން، ނިލަންދޫ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ފަރާތުން ވަނީ، ކޮމިޓީ އެކުލެވިފައި އޮންނަ ގޮތުން، ކޮމިޓީ ހިންގުމުގައި ހުރި ދަތިތައް ފާހަގަކުރައްވައި، އަންހެނުންގެ ތަރައްޤީއަށް މަސައްކަތްކުރާ ކޮމިޓީތައް އެކަށީގެންވާ ގޮތެއްގައި ކުރިޔަށް ގެނދިޔުމަށްޓަކައި އެމައްސަލަތައް ހައްލުކުރުމަށް ބޭނުންވާކަން ފާހަގަކުރައްވާފައެވެ.

ކައުންސިލުން ފާހަގަކުރެއްވި ކަންކަމާއި ގުޅޭ ގޮތުން ރައީސުލްޖުމްހޫރިއްޔާ ވިދާޅުވީ، ރަށުގެ ރައްޔިތުންނަށް ބޭނުންވެފައިވާ ކަންކަން ސަރުކާރުގެ ކަމާއި ގުޅުން ހުރި މުއްސަސާތަކާއި ގުޅިގެން އަވަސްކޮށްދެއްވުމަށް މަސައްކަތް ކުރައްވާނެ ކަމަށެވެ.

އެގޮތުން ފުލުހުންގެ މަރުކަޒާއި ކައުންސިލް އިދާރާގެ އައު އިމާރާތް އެޅުމުގެ މަސައްކަތުގައި އިސްކަންދެއްވައި، ބަނދަރާއި، އިންޖީނުގެ ބަދަލުކުރުމުގެ މަސައްކަތް ވެސް ކުރިޔަށް ގެންދަވާނެކަމުގެ ޔަޤީންކަން ރައީސް ވަނީ ދެއްވާފަ އެވެ.

ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުގެ ދެކަނބަލުން ނިލަންދޫއަށް ކުރެއްވި ދަތުރުފުޅުގައި، ރަށު ކައުންސިލާއި އަންހެނުންގެ ތަރައްގީއަށް މަސައްކަތް ކުރާ ކޮމެޓީއާއެކު ކުރިއަށް ގެންދިޔަ ބައްދަލުވުމަށް ފަހު، ވަނީ ނިލަންދޫގައި ޤާއިމްކުރެވިފައިވާ ފ. އަތޮޅު ހޮސްޕިޓަލަށް ޒިޔާރަތްކުރައްވާފަ އެވެ.

މިޒިޔާރަތުގައި ރައީސުލްޖުމްހޫރިއްޔާގެ ދެކަނބަލުން ވަނީ އެހޮސްޕިޓަލްގެ ވެރިންނާއި މުވައްޒަފުންނާއި އަދި ހޮސްޕިޓަލުން ޚިދުމަތް ހޯދަމުންގެންދާ އާއްމުންނާއި، ބައްދަލުކޮށްލައްވައި، ހޮސްޕިޓަލުން ދެމުންގެންދާ ޚިދުމަތްތަކާއި ގުޅޭ ގޮތުން މަޢުލޫމާތު އޮޅުން ފިލުއްވަވާފައެވެ.

ރައީސްގެ މި ދަތުރުފުޅުގައި ވަނީ ނިލަންދޫގައި، އަމިއްލަ ފަރާތަކުން ހިންގާ، "ތަދްރީސުލް ޤުރުއާނުލްކަރީމް" ރަސްމީގޮތުން ހުޅުވާދެއްވާފަ އެވެ.

މިޤުރުއާން ކުލާހަކީ، ހެނދުނު ކުލާހުގެ ނަމުގައި، 1969 ވަނަ އަހަރު ފެށުނު ޤުރުއާން ކުލާހެކެވެ. މިއަދު ރަސްމީކޮށް ހުޅުވި މިޤުރުއާންކުލާހުގެ އައު އިމާރާތުގައި 2 ކުލާސްރޫމް ހިމެނޭއިރު، މިހާރު މިޤުރުއާން ކުލާހުގައި 100 ވުރެ ގިނަ ދަރިވަރުން ކިޔަވަމުން ދެއެވެ.

ރައީސް ޞާލިހުގެ މި ދަތުރުފުޅުގައި ފ. ދަރަބޫދޫއަށް ވެސް ވަޑައިގެންނެވި އެވެ.

ރައީސުލްޖުމްހޫރިއްޔާގެ ދެކަނބަލުން، ފ. އަތޮޅަށް މިކުރައްވާ ރަސްމީ ދަތުރުފުޅުގައި އެދެކަނބަލުންގެ އަރިހުގައި ސަރުކާރުގެ މަތީ ފަންތީގެ ވަފްދެއް ބައިވެރިވެވަޑައިގަންނަވައެވެ.