ހަގީގަތުގައިވެސް އިބޫގެ ތާއީދު ފައިސަލްއަށް އެބައޮތްހެއްޔެވެ؟
އިއްޔެ ހެނދުނު ރާއްޖޭގެ މަޝްހޫރު ޓީވީ ޗެނަލެއްގައި އެމްޑީޕީގެ ރިޔާސީ ޓިކެޓަށް ވާދަކުރައްވާނެކަން ކުރީގެ ނައިބު ރައީސް ފައިސަލް ނަސީމު އިއުލާންކުރެއްވި މަންޒަރު ފެނުނެވެ. ކުރީގެ ރައީސް އިބްރާހިމް މުހައްމަދު ސޯލިޙްގެ ތާއީދާއެކު ފައިސަލް ނަސީމާއި އާދަމް އާޒިމްގެ ޕެއަރ ނިކުންނަ ވާހަކަތަކުގެ އަޑު ސިޔާސީ މަސްރަހުގައި ހަރުލާފައި ހުންނަތާ ދުވަސްކޮޅެއް ވެއްޖެއެވެ.
އެންމެ ފުރަތަމަ އެވާހަކަ ދެކެވުނީއްސުރެ މިއަދާ ހަމަޔަށް އައި އިރުވެސް ކުރެވޭ ސުވާލަކީ ހަމަ ހަގީގަތުގައިވެސް ރައީސް ސޯލިޙް ފައިސަލް ވެރިކަމަށް ގެންނަން ތާއީދުކުރެއްވީ ހެއްޔެވެ؟ ޓިކެޓަށް ކުރިމަތިލައްވަނީ ރައީސް ސޯލިހްގެ ތާއީދާއެކުކަމަށް ފައިސަލްއާއި އާޒިމް ކިތަންމެ ވަރަކަށް ވިދާޅުވިޔަސް، އަދިވެސް ރައީސް ސޯލިޙް ފާޅުގައި އެކަމުގައި އެއްޗެއް ވިދާޅުވިތަނެއް ނުފެއެވެ.
ރައީސް ސޯލިޙްގެ އަރިސް ބޭފުޅަކުވެސް އެހެން ފާޅުގައި ވިދާޅެއް ނުވެއެވެ. ރައީސް ސޯލިހްގެ އަރިހުގައި ސިޔާސީ އާރުލާ އެތައް ބޭފުޅުންނެއް އެބަތިއްބެވިއެވެ. އެއިން ބޭފުޅަކު އަދިއެއް ފައިސަލް ނުވަތަ އާޒިމް އާއެކު ނިކުންނެވި ތަނެއް ނުފެއެވެ. ހަމައެކަނި ފެންނަނީ ރައީސްގެ ކޮއްކޯފުޅު އަދި ކުރީގެ މެމްބަރު އަލީ ނިޔާޒްއެވެ. ނިޔާ ވެސް ސާފުސީދާކޮށް ރައީސް ސޯލިޙް ހުންނެވީ ފައިސަލްއާއި އާޒިމް ވެރިކަމަށް ނެރުއްވައިގެންކަމަށް ވިދާޅު ނުވެ، މުޅިންވެސް ދެއްވަނީ ނުސީދާ މެސެޖެވެ.
އެމްޑީޕީގެ އިސް ބައެއް ބޭފުޅުންނާ ޕާޓީގައި ގިނަ ދުވަސްވީ ބޭފުޅުން ވިދާޅުވާ ގޮތުގައި ރައީސް ސާލިޙްގެ ތާއީދު އޮތް ނަމަ އެމަނިކުފާނު ނިކުންނަވާ، ފާޅުގައި އެހެން ވިދާޅުވާނެއެވެ. ސުވާލު މާކެއްގެ ތެރެއަށް އެކަން ދޫކޮށްލައްވައިގެން އެހުންނަވަނީ ރައީސް ސޯލިޙްގެ 'ސްލޯ ރިއެކްޝަން'ގެ ސިޔާސަތުގެ ތެރެއިންކަމަށްވެސް ވެދާނެއެވެ.
ރައީސް ސޯލިޙްގެ އަރިސް ބޭފުޅުންގެ ތެރެއިން ކޮއްކޯފުޅު އަލީ ނިޔާޒް އެކަނި ފައިސަލްއާއެކު ހުންނެވިތަން ފެނުމަކީވެސް ސުވާލު އުފެދޭ ކަމެކެވެ. އެމްޑީޕީގެ އިސް ބައެއް ބޭފުޅުން ވިދާޅުވި ގޮތުގައި ރައީސް ސޯލިޙްގެ ތާއީދު އޮންނަ ބޭފުޅަކާއެކު ނޫނީ ސިއްކަ އާއިލާގެ ސިޔާސީ ބޭފުޅުން ނުނިކުންނަވާނެއެވެ.
ފަސްޓްލޭޑީ ފަޒްނާގެ އާއިލާގެ އެކި ބޭފުޅުންނާއި ކައިވެނި ބައްލައިގެން އެތިއްބެވީ ރައީސް ސޯލިހްގެ ސަރުކާރުގައި ހަގީގަތުގައި 'އެތެރެ ކޮއިލު'ގެ ބޭފުޅުންނެވެ. ބިގޭ، އެމްސީ ހަމީދު، އަލީ ޝިޔާމް މެން ފަދަ އެއްވެސް ބޭފުޅަކު އަދި ފައިސަލްއާއެކު ނެތުމަކީ 'ރައީސް ސޯލިޙްގެ ތާޢީދު އެބައޮތް' ކަމަށް އެވިދާޅުވާ ވިދާޅުވުމާމެދު ސުވާލު އުފައްދަން ޖާގަ ލިބޭ ކަމެކެވެ.
ރައީސް ސޯލިޙްގެ ތައީދާއި އެއްބާރުލުމާއެކު ޕްރައިމަރީ ރޭހަށް ނިކުންނެވިކަން އެކި ގޮތްގޮތަށް ވިސްނައިދެވޭތޯ ފައިސަލްވެސް އާޒިމްވެސް ޓީވީ ޕްރޮގްރާމްގެ އިތުރުން އެހެން މަންސަތަކުގައިވެސް މަސައްކަތްކުރައްވައެވެ. އެބޭފުޅުންގެ ކެންޑިޑެސީގެ އެންމެ މުހިއްމު އުންސުރަކީ އެއީކަންވެސް ހީވެއެވެ.
އެހެންނަމަވެސް ރައީސް ސޯލިޙްގެ ތާއީދު އެބޭފުޅުން އެމާނަ ކުރައްވަނީ އެމްޑީޕީގެ ވަގުތީ ޗެއާޕަރސަން ހޮވަން އުޅުނުއިރު ދިއްދޫ ދާއިރާގެ ކުރީގެ މެމްބަރު ޢަބްދުﷲ ވަޙީދުއަށް ވީގޮތަށްކަމަށް ރައީސް ސޯލިޙްގެ ސަރުކާރުގެ އިސް ބޭފުޅަކު ސިފަކުރެއްވިއެވެ.
ޢަބްދުﷲ ވަޙީދަށް ފަހުވަގުތު ރައީސް ސޯލިޙާއި އޭރުގެ ޕާޓީގެ ރައީސް ޢަބްދުﷲ ޝާހިދުގެ ތާއީދު ނެތުމުން، އޭނާ ވިދާޅުވީ އެކަމަށް ކުރިމަތިލެއްވީ އެބޭފުޅުންގެ ތާއީދާއި އެކުގައިކަމަށެވެ. އިސްވެ މިދެންނެވި ބޭފުޅާ އެކަމާ ބެހޭ ގޮތުން ވިދާޅުވީ "ރައީސް އިބޫ އާއި ޝާހިދު އާއި ދެބޭފުޅުން ކައިރީގައި ތިމަންނަ މާދަމައިން ފަށައިގެން ހިނގާނީ އިދިކޮޅަށް ކަމަށް ބުންޏަސް އެބޭފުޅުން ވިދާޅުވާނީ ތިއީ ވަރަށް ރަނގަޅު ޚިޔާލެކޭ، ކުރިއަށް ވަޑައިގަންނަވާ" ށޭ ކަމަށެވެ.
އެގޮތުން ޗެއާޕަރސަންކަމަށް ކުރިމަތިލާން ޢަބްދުﷲ ވަޙީދު ޚިޔާލު ފާޅުކުރުމުން، އާއްމު އުޞޫލުން އެއްވެސް މީހަކަށް 'ނޫނެކޭ' ނުބުނާ އުޞޫލުން އެބޭފުޅުންގެ އާއްމު ޖަވާބު ދެއްވީމާ ޢަބްދުﷲ ވަހީދަށް އެބޭފުޅުންގެ ތާޢީދު ލިބިލެއްވީކަމަށް ހީފުޅުވީކަމަށް ވެދާނެއެވެ. މިހާރު އުފެދޭ ސުވާލަކީ ފައިސަލް ޓިކެޓަށް ޝައުގުވެރިކަން ފާޅުކޮށް އެވާހަކަ ވިދާޅުވުމުން ރައީސް ސޯލިޙް "ތިއީ ވަރަށް ރަނގަޅުކަމެއް، އަވަހަށް ކުރިއަށް ވަޑައިގަންނަވާ"ށޭ ވިދާޅުވީ ބާއެވެ؟
ފައިސަލް ނަސީމަށް ރައީސް ސޯލިހްގެ ތާއީދު އެބައޮތްތޯ ސުވާލު އުފައްދާ ބޭފުޅުން ނަންގަވާ އަނެއް ޕޮއިންޓަކީ 2023 ވަނަ އަހަރުގެ ރިޔާސީ އިންތިޚާބުގައި ރަނިން މޭޓްކަން ނުދެއްވުމުން، ފައިސަލް ނިކުންނަވާ ރައީސް ސޯލިޙާއި ދެކޮޅަށް ސިއްރިޔާތުގައި ކެމްޕޭން ކުރެއްވިކަމަށް ދެކެވޭ ވާހަކަތަކެވެ.
ރައީސް ސޯލިޙްގެ ކެމްޕޭނުގައި ފައްޔާޒް އިސްމާއީލާއި ޢަބްދުﷲ ޝާހިދު އުޅުއްވިއިރު، ފައިސަލް ގެންދެވީ ރައީސާއި ދެކޮޅަށް ކެމްޕޭން ކުރައްވަމުންނެވެ. އެހެންކަމުން ރައީސް ސޯލިޙް އެ ދެބޭފުޅުންކުރެ ބޭފުޅެއްގެ ފަހަތަށް ނާރުއްވައި، އެއިންތިޚާބުގައި އެމަނިކުފާނާއި ދެކޮޅަށް މަސައްކަތްކުރެއްވި ބޭފުޅެއްގެ ފަހަތަށް މި އިންތިޚާބުގައި އެރުމަކީ ހަގީގަތުގައި ރައީސް ސޯލިޙަށް ތާއީދުކުރައްވާ ބޭފުޅުންނަށް ކުރެވޭ ބޭއިންސާފަކަށް ނޫނީ ނުވާނެއެވެ.
ދެން އޮތީ މިކަމުގައި ރައީސް ސޯލިޙް އެއްޗެއް ވިދާޅުވާންދެން މަޑުކުރުމެވެ. ރައީސް ސޯލިހް ހަމަހަގީގަތުގައިވެސް ފައިސަލް އަށް ތާއީދުކުރެއްވިނަމަ އެކަން އިއުލާންކުރެއްވުން ލަސްކުރައްވަނީ ކީއްވެގެންބާވައޭ ސުވާލު އުފެދެއެވެ.
ތާއީދުކުރައްވާކަން އިއުލާންކުރައްވައިފިނަމަ އެމްޑީޕީގެ ރިޔާސީ ޕްރައިމަރީ ވަރަށް ފޯރިގަދަ ވެގެންދާނެއެވެ. ތާއީދު ނުކުރައްވާނަމަ ފައިސަލްގެ މުޅި ކެމްޕޭން 'ފަނި' ވީއެވެ. ދޮގެއްގެ މައްޗަށް ފެށި ކެމްޕޭނަކަށް ރައްޔިތުންގެ ތާއީދެއް ނޯންނާނެއެވެ
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
