މިނިވަންދުވަހުގެ ހަރަކާތްތަކަށް މާލެގެ ބައެއް ސަރަހައްދުތައް ބަންދުކުރަނީ

މިހާރު ފާހަގަ ކުރަމުންދާ ރާއްޖެގެ 59ވަނަ މިނިވަންދުވަހުގެ މުނާސަބަތުގައި ބާއްވާ ހަރަކާތްތަކަށް މާލޭގެ ބައެއް ސަރަހައްދުތައް ބަންދުކުރުމަށް ހަމަޖެހިފައިވާ ކަމަށް ފުލުހުން ހާމަކޮށްފިއެވެ.

ފުލުހުން ކޮށްފައިވާ ޓްވީޓެއްގައި ބުނެފައިވަނީ މިއަދު ހަވީރާއި، މިރޭ މާލޭގެ މަގުތަކުގައި ޕެރޭޑާއި ފުޅަނދުބުރު ބޭއްވުމަށް ހަމަޖެހިފައިވާތީ ބައެއް މަގުތައް ބަންދުކުރުމަށް ނިންމާފައިވާ ކަމަށެވެ.

އެގޮތުން މިއަދު ހަވީރު 3 ން އިރުއޮއްސި 6 އަށް އަދި ރޭގަނޑު 7 ން އެ ހަރަކާތްތައް ނިމެންދެން ބައެއް މަގުތައް އެއްގަމު ދަތުރުފަތުރަށް ބަންދުވާނެ ކަމަށް ވިދާޅުވިއެވެ. އަދި މެންދުރުފަހު 2 ން ފެށިގެން ހަރަކާތްތައް ނިމެންދެން އެއްނަމްބަރު ފާލަން ހިމެނޭ ކަނޑުގެ ސަރަހައްދު ވެސް ކަނޑު ދަތުރުތަކަށް ބަންދުވާނެ ކަމަށް ވިދާޅުވެއެވެ.

މިއަހަރުގެ މިނިވަންދުވަސް ކުލަގަދަކޮށް ފާހަގަ ކުރުމަށް ހިންގާ ހަރަކާތްތަކުގެ ތެރޭގައި ހިމެނޭ ޕެރޭޑާއި ރޫޓް މާޗް މާލޭގެ ބޮޑެތި މަގުތަކުގައި މިއަދު ހަވީރު ކުރިއަށްދިއުމަށް ވަނީ ހަމަޖެހިފައެވެ.

މި ޕެރޭޑް ހުއްޓާ ސަރަހައްދުތަކުގެ ތެރޭގައި ބޮޑުތަކުރުފާނު މަގު ޢިއްޒުއްދީން ފާލަން ކުރިމަތި، ސޯސަންމަގު/ ދިވެހިބަހުގެ އެކަޑަމީ ކުރިމަތި، މަޖީދީމަގު/ ޗާނދަނީމަގު ހަތަރު އަނގޮޅި ހިމެނެއެވެ. އަދި މަޖީދީމަގު/ މިލިއަން ބުކުޝޮޕް ކުރިމައްޗާއި ބޮޑުތަކުރުފާނުމަގު/ ކަޅުތުއްކަލާކޮށި ހުޅަނގު އުތުރުކަންމަތި ވެސް ހިމެނެއެވެ.

ރޫޓު މާޗު ހުއްޓުމަށް ހަމަޖެހިފައިވަނީ ބޮޑުތަކުރުފާނު މަގު ޢިއްޒުއްދީން ފާލަން ކުރިމަތި، ސޯސަންމަގު ދިވެހިބަހުގެ އެކަޑަމީ ކުރިމަތި، މަޖީދީމަގު އޮލިމްޕަސް ކުރިމައްޗަށެވެ. އަދި މަޖީދީމަގު  މާލެ ގްރޭންޑް ކުރިމައްޗަށާއި ޗާނދަނީމަގު ދާރުލްއާސާރުކުރިމައްޗަށް ވެސް ހުއްޓުމަށް ނިންމާފައި ވެއެވެ.

ފުލުހުންވަނީ މިގަޑިތަކުގައި މިސަރައްދު އެއްގަމު ދަތުރުތަކަށް ބޭނުން ނުކުރުމަށް އިލްތިމާސްކުރައްވާފައެވެ.

މިނިވަން ދުވަހާ ގުޅިގެން ކުރިއަށް ގެންދާ ހަރަކާތްތަކުގެ ތެރޭގައި ހިމެނޭ ފުޅަނދު ބުރު މާލޭ ބޮޑެތިމަގުތަކުގައި މިރޭ 8:30 އިން ފެށިގެން ކުރިއަށްދާނެއެވެ.