ފަރަށް އެރި ބްރިޖް ޕްލެޓްޕޯމު ނަގައިފި
ވިލިމާލެ ފަރަށްއެރި ތިލަމާލެ ބްރިޖުގެ ޕްލެޓުފޯމު 11 ދުވަސްފަހުން އެ ސަރަހައްދުން ނަގައިފިއެވެ.
އެންވަޔަރަމަންޓް މިނިސްޓްރީގެ ސްޓޭޓް މިނިސްޓަރު އަލީ ސޯލިހު މިއަދު ކުރެއްވި ޓްވީޓެއްގައި، ބްރިޖު ޕްލެޓްފޯމް ނަގާ މަންޒަރު ފެންނަ ފޮޓޯއެއް ހިއްސާކުރައްވައި އޭނާ ވަނީ ބްރިޖް ޕްލެޓްޕޯމު ނަގާފައިވާކަމަށް ވިދާޅުވެފައެވެ.
ތިލަފުއްޓާއި ވިލިމާލެ އަދި މާލެ ގުޅުވާލުމަށް ބްރިޖު އެޅުމުގެ މަސައްކަތުގައި ބޭނުންކުރަނިކޮށް މި މަހުގެ 16 ވަނަ ދުވަހު ވިލިމާލޭ ފަރަށް އެރި ސާވޭ ޕްލެޓްފޯމު ދެ ދުވަހުގެ ތެރޭގައި ނަގާނެ ކަމަށް އެފްކޮންސް އިން ބުނީ މިދިޔަ އަންގާރަ ދުވަހު އެވެ.
އެހެން ނަމަވެސް އޭގެ ފަހުން 3 ވީއިރު އެ ނެގިފައި ނުވާއިރު، އެކަމާއި ގުޅިގެން އެފްކޮންސް އިން ނެރުނު ކުރު ބަޔާނެއްގައި ބުނީ މޫސުން ގޯސްވުމުގެ ސަބަބުން ޕްލެޓްފޯމް ނެގުމުގެ މަސައްކަތް ކުރިއަށް ނުގެންދެވިފައިވާކަމަށެވެ.
ބްރިޖް ޕްލެޓްޕޯމު ފަރަށް އަރައިގެން އެ ނެގުމަށް ސަރުކާރުން އެކަށީގެންވާ މަސައްކަތް ނުކުރާތީ އެކި ޖަމިއްޔާތަކުން މީގެ ކުރިން ވަނީ ކަންބޮޑުވުން ފާޅުކޮށްފައެވެ. އެގޮތުން ވިލިމާލޭގެ އާންމުންގެ "ވިލިޖޯލި" ޖަމިއްޔާއާއި، "ސޭވް ދަ ބީޗް" އިން ބުނި ގޮތުގައި ކޮންމެ ރާޅަކާ އެކީ އެ ބިޔަ ޕްލެޓްފޯމް އެރަށު ފުއްޓަރު ފަރާތުގައި ޖެހޭ އަޑާއި އޭގެން އަރާ ލޮޅުމުގެ އަސަރު ރަށުތެރެއިންވެސް އިހްސާސް ކުރެވޭކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
