5 އަހަރު ވީއިރު ބޮޑު ޚިޔާނާތު ފައިސާގެ ލޯ ލާރިއެއްވެސް ހޯދުނުތޯ؟ މަރުތަކަށް އިންސާފު ހޯދުނުތޯ؟: ޢަލީ

އެމްއެމްޕީއާރްސީގެ ޚިޔާނާތުގެ މައްސަލައާއި ގޮތްނޭނގޭ މަރުތަކުގެ އިންސާފު ގާއިމްކޮށްދޭނެކަމަށް ބުނެ ވެރިކަމަށް އައި މި ސަރުކާރަށް ގާއިމްކުރެވުނު އިންސާފަކީ ކޮބައިތޯ ޖުމްހޫރީޕާޓީގެ ރިޔާސީ ކެންޑިޑޭޓް ގާސިމް އިބްރާހިމްގެ އިންތިހާބީ އެޖެންޓް އަދި ކުރީގެ ޓޫރިޒަމް މިނިސްޓަރު އަލީ ވަހީދު ސުވާލު ކުރައްވައިފިއެވެ.

ރިޔާސީ ކެންޕެއިނަށް އދ އަތޮޅަށް ކުރެއްވި ދަތުރުފުޅުގައި އިއްޔެ ދަނގެތި އަށް ވަޑައިގެން ވާހަކަ ދައްކަވަމުން ޢަލީ ވިދާޅުވީ، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ގެ މި ވެރިކަމަކީ އެތަށް ބަޔަކު ޖަލަށް ލެވި، އެ އެންމެހާ ފަރާތްތަކުން ކުރި މަސައްކަތުން ގެނެވުނު ވެރިކަމެއް ކަމަށެވެ. އެހެން ކަމަށް ވީނަމަވެސް މިވެރިން ގެނައީ، ކުރީގެ ރައީސް، ޔާމިން އަބްދުލްގައްޔޫމްގެ ކިބައިން ބަދަލުހިފަން ނޫން ކަމަށް އޭނާ ވިދާޅުވި އެވެ.

އެހެންނަމަވެސް މިއަދު މިފެންނަނީ އެމްއެމްޕީއާރުސީ މައްސަލާގައި، ހަތަރު ފާސް މީހަކަށް ދައުވާ ކޮށްގެން މުޅި މައްސަލައިގެ އަސްލު ގެއްލުވާލަން އުޅޭތަން.

ޢަލީ ވަހީދު

ޢަލީ ވަހީދު ވިދާޅުވީ، އެމްއެމްޕީއާރްސީގެ ޚިޔާނާތުގައި ރައީސް ޔާމީން އެކަނި ޖަލަށްލާ، އެމްޑީޕީގެ ތެރެއިން އެފައިސާ ލިބުނުމީހުންނާއި، އެޚިޔާނާތުގައި ބައިވެރިވި އެހެން މީހުންގެ ނަން ހިމެނޭ ކަމަށް ބުނާ ލިސްޓްތައް ބަދަލުކޮށް ވަކިބަޔަކު އެމައްސަލައިން ރެކި ފިލުމަކީ އިންސާފެއް ނޫންކަމަށެވެ.

މި ފަސް އަހަރު ހަމަވީ، ދިވެހި ބައިތުލްމާލަށް، އެމްއެމްޕީއާރުސީން ގެއްލުނު ލޯ ލާރިއެއްވެސް ވަތް ތޯ ނުވަތަ ނޫންތޯ؟ އެމްޑީޕީގެ އާއްމު މެންބަރު މީހާވެސް އެ ސުވާލަށް ޖަވާބު ދެއްވަން ވާނެ. ނުލިބެޔޭ. ބައި ރުފިޔާ އެއްވެސް ނުލިބެޔޭ. ދެން ކީއްތޯ ވެރިކަމަށް އަންނަން އަޅުގަނޑުމެން ކީ؟ އިންސާފު ގާއިމް ކުރާނަމޭ. މަރުވެގެން ދިޔަ މީހުންގެ މަރުތަކުގެ ހަގީގަތް ހޯދާނަމޭ.

ޢަލީ ވަހީދު

ކަންކަން މިހެން ހުރި އިރު، އަލީވަހީދު ވިދާޅުވީ ގައުމުގެ ވެރިކަން ބޮއްސުންލާ ހުރިހާ ދިމާލަކުން އަޅުގަނޑުމެންނާ ދިމާލަން ލޮއްސިތައް އަމާޒުވެފައިވާ ދަނޑިވަޅެއްގައި ނުބައި ވެރިޔަކު ވެރިއަކަށް ގެނެވިއްޖެނަމަ ގައުމަށާއި ރައްޔިތުންނަށް ލިބޭ ގެއްލުން އިންތިހާއަށް ބޮޑުވާނެ ކަމަށެވެ. އަދި މިއީ ގާސިމްފަދަ އިޚްލާސްތެރި ދީލަތި ބޭފުޅަކަށް ފުރުޞަތެ ދެއްވަންވީ ވަގުތު ކަމަށްވެސް އޭނާ ވިދާޅުވި އެވެ.

އިސްލާމްދީނަށާއި ދިވެހި މިނިވަންކަމަށާއި ދިވެހި ރައްޔިތުންނަށް އެންމެ ބޮޑު ހިދްމަތެއް ކޮށްދެއްވި ލީޑަރަކީ ގާސިމް އިބްރާހިމް ކަމަށާއި ދިވެހި ވެރިކަމަށް މިފަދަ ދަނޑިވަޅެއްގައި އެންމެ ގާބިލް ވެރިއަކީ ގާސިމް އިބްރާހިމް ކަމަށް އަލީ ވަހީދު ވިދާޅުވިއެވެ.