ސްކްރީނާ ދުރުވެ، އުމުރުން 11 އަހަރުގެ އިބާ އުފެއްދި ކްރޯޝޭގެ ދުނިޔެ
މި ޒަމާނުގައި ގިނަ ކުދިންގެ ވަގުތުތައް ބޭކާރުވެގެންދަނީ ސްމާޓްފޯނުތަކާއި ޓެބްލެޓްތަކުގެ ސްކްރީންތަކަށް ގެއްލި، ސޯޝަލް މީޑިއާއާއި ގޭމުތަކަށް ކުޅުމުގައެވެ. އެތައް ގަޑިއިރެއް ބޭކާރު ގޮތުގައި ސްކްރީނަށް ހުސްކުރާއިރު، އޭގެ ސަބަބުން ކުދިންގެ ސިކުނޑިއަށާއި އުޅުމަށް އެތައް ނޭދެވޭ އަސަރުތަކެއް ދަނީ ކުރަމުންނެވެ.
ނަމަވެސް، އދ. ދަނގެތީ ސްކޫލުގެ ގްރޭޑް 6 ގައި ކިޔަވަމުން އަންނަ އުމުރުން 11 އަހަރުގެ އިބާ އިބްރާހީމް ދާއޫދު މިވަނީ އެ އޮއިވަރާ ދެކޮޅަށް ފަތައި، ތަފާތު ނަމޫނާއެއް ދައްކުވައިދީފައެވެ. އިންޓަނެޓާއި ސްކްރީނުގެ ބޭނުން ހެޔޮގޮތުގައި ހިފައިގެން ޔޫޓިއުބް މެދުވެރިކޮށް ކްރޯޝޭ ކުރަން ދަސްކޮށް، ވޫލު ބަރަނިތަކުގެ އެހީގައި އޭނާ މިވަނީ ސްކްރީންތަކާ ދުރު، ފަންނީ އަދި އުފެއްދުންތެރި އަމިއްލަ ދުނިޔެއެއް ބިނާކޮށްފައެވެ


ފެށުން؛ ޝައުޤުވެރިކަމުން ހުނަރަކަށް
އިބާގެ މި ދަތުރު ފެށުނީ އުމުރުން އެންމެ 9 އަހަރުގައެވެ. ޔޫޓިއުބުން ފެނުނު ވީޑިއޯތަކަކުން އުފެދުނު ޝައުޤުވެރިކަމެއްގެ ސަބަބުން، ކްރޯޝޭ ކުރަން ދަސްކުރަން ބޭނުންވާ ވާހަކަ މަންމަ ގާތުގައި ބުންޏެވެ.
"އިބާ އައިސް ބުނީ އެކަން ކުރަން ބޭނުންވާ ވާހަކަ، އޭރު އަދި 9 އަހަރުވަރު. ހިތަށްއެރީ ވޭތޯ އެ ތަކެތި ހޯދައިދޭނަމޭ. ދެން އޭރު އަލީ އެކްސްޕްރެސްއިން ވަރަށް ދުވަހުން ލިބެނީވެސް. އެކަމަކު ހުކު ސެޓެއް ފުރަތަމަ ގެނައީ، ރަށުން ވޫލް ބޮޑިއެއް ގަތީ."

މަންމަ ކިޔައިދިން "ސްލިޕް ނޮޓް" އާއި "ޗެއިން" އެޅުމުގެ އަސާސީ ފިލާވަޅަށްފަހު، އިބާގެ އެދުރުދޮރާށްޓަކަށްވީ ޔޫޓިއުބެވެ.
"މަންމަ ކިޔައިދިނީ ސިލިޕްނޮޓް އަދި ޗެއިން، ދެން ޔޫޓިއުބް ބަލައިގެން އަމިއްލައަށް ދަސްކުރީ. ޔޫޓިއުބުންވެސް ބެލީމަ ނޭނގުނީމަ މަންމަ ކައިރީ ބަލަން ބުނަނީ ޔޫޓިއުބް، ދެން މަންމަ ބަލާފަ ކިޔައިދެނީ. އެންމެ ފުރަތަމަ ހެދީ މަލެއް."

މިހާރު އިބާއަކީ ތަފާތު ވައްތަރުގެ ކީ-ޗެއިން، ކުޑަކުދިންގެ ހެދުން އަދި ކުޅޭ އެއްޗެހިވެސް ވިޔަން ދަންނަ ކުޅަދާނަ ކުއްޖެކެވެ.
އިބާ މިހާތަނަށް ހެދި އެންމެ ޚާއްޞަ އެއްޗަކީ އޭނާގެ ފަޒޫދޮންތަ ދިން އޯޑަރަކަށް ހެދި "އާމީ މޭން" އެކެވެ. އެއީ އިބާގެ ކޫބޭ ނޭޝަނަލް ސާވިސަސްގެ ޓްރެއިނިން ނިންމި މުނާސަބަތަށް ހެދި އެއްޗެކެވެ.

މީގެއިތުރުން ސްޓެލްކޯގެ އާޓް މުބާރާތަށް، ހެދި ކްރޯޝޭ ކެންވަސްއަކީވެސް އިބާގެ ފާހަގަކޮށްލެވޭ މަސައްކަތެކެވެ. ސްކޫލު ޓެސްޓް ދުވަސްވަރާ ދިމާކޮށް ހަދަން ފެށި އެ މަސައްކަތް ނިންމާލެވުނީ 14 ދުވަހުންނެވެ. އެ މަސައްކަތް ވަނީ މުބާރާތުގެ "ބެސްޓް 10" އަށް ހޮވިފައެވެ.

ކިޔެވުމާއި މަސައްކަތުގެ ބެލެންސް
ކިޔަވާ ކުއްޖަކަށް ވުމާއެކު، ވަގުތު މެނޭޖްކުރުމަކީ އިބާއަށް ވަރަށް މުހިންމު ކަމެކެވެ. އެހެންކަމުން މަސައްކަތްތައް ކުރަމުންދަނީ ވަކި ތަރުތީބަކުންނެވެ. ފުރަތަމަ ނަމާދެވެ. އެއަށްފަހު ފިލާވަޅުތައް ހަދައި ކިޔެވުމެއެވެ. ދެން ކްރޯޝޭ ކުރުމެވެ.
”ބޮޑު އޯޑަރެއްނަމަ ނަގަނީ ކިޔެވުމަށް އުނދަގޫނުވާހެން ނިންމަން ގިނަ ދުވަސް އޮތް ނަމަ. އެނޫން ލިބޭ ކުދި އޯޑަރުތައް ހަދަނީ ލިބޭ ހުސްވަގުތު ތަކުގަޔާއި އަދި ބަންދު ދުވަސް ތަކުގައި.

އިބާގެ މަންމަ ކިޔައިދިން ގޮތުގައި މި މަސައްކަތުގެ ސަބަބުން އިބާއަށް ޒިންމާދާރު ކަމާއެކު މަސައްކަތްތައް ނިންމުމުގެ އިތުރުން ރިވެތި އަޚްލާޤީ ސިފަތައްވެސް ދަސްވެއެވެ. އެގޮތުން، ކްރޯޝޭ ކުރަން ވަގުތު ހޯދުމުގެ ގޮތުން، ގޭތެރޭގައި އަމިއްލައަށް ކުރަންޖެހޭ ކަންކަން އަވަހަށް ނިންމާލުމުގެ އިތުރުން، ކޮއްކޮގެ ފިލާވަޅުތައް ހެދުމުގައިވެސް އިބާ އެހީތެރިވެއެވެ. އަދި ކްރޯޝޭ ކުރުމުގައި ގޯހެއް ހެދިއްޖެނަމަ މުޅި އެތި ނިއުޅުވާލަން ޖެހުނަސް، ފޫހިކަމެއް ނެތި ކެތްތެރިކަމާއެކު އެކަން ކުރުމުގެ މަސައްކަތް ކުރެއެވެ.
ޢާއިލާގެ އެއްބާރުލުމާއި ކުރިމަގުގެ ހުވަފެން
މި ހުނަރު އިތުރަށް ތަރައްޤީކުރުމާއި، މަސައްކަތް ކުރުމުގައި އިބާގެ އެންމެ ބޮޑު ހިތްވަރަކީ އޭނާގެ ޢާއިލާއެވެ. އާއިލާގެ ފަރާތުން ލިބޭ އެއްބާރުލުމަކީ ހުއްޓުމެއްނެތި މަސައްކަތާއިގެން ކުރިއަށް ދިޔުމަށް ލިބޭ ބާރެކެވެ.

ޚާއްޞަކޮށް މަންމަ، ބައްޕަ، މާމަ އަދި ފަތުރުދޮންތަގެ ފަރާތުން ލިބޭ އެއްބާރުލުން އިބާ ފާހަގަކުރެއެވެ. ރާއްޖެއިން ބޭރަށްދާ ދަތުރުތަކުން އިބާއަށް ބޭނުންވާ ތަފާތު ވައްތަރުގެ ވޫލުތައް ހޯދައިދެނީ އާއިލާގެ މެންބަރުންނެވެ. އަދި އިބާގެ މަސައްކަތް ފުޅާކޮށް، ވިޔަފާރިއަކަށް ހަދައިދެން މަގުފަހިކޮށްދިނީވެސް އެމީހުންނެވެ.

އެގޮތުން ފުރަތަމަ ހޮބީއެއްގެ ގޮތުގައި ފެށި މި މަސައްކަތުން ހަދާ ތަކެތި އޭނާ މާމަގެ ފިހާރައިންނާއި އިންސްޓަގްރާމް ޕޭޖު ”ކްރޮޝޭ ބައި އިބާ” މެދުވެރިކޮށް މިހާރު ދަނީ ވިއްކަމުންނެވެ.
އަދި ސްކޫލުގެ ޓީޗަރުންނާއި ރައްޓެހިންގެ ފަރާތުންވެސް މިހާރު އޯޑަރުތައް ލިބެމުންދާއިރު، ނޯވާ ރިސޯޓްގައި ބޭއްވި އާޓް އެގްޒިބިޝަންގައި ދަނގެތީ ސުކޫލުގެ ފަރާތުން ބައިވެރިވެ، އިބާގެ ކްރޯޝޭ މަސައްކަތް އެ ރިސޯޓްގެ ފަތުރުވެރިންނަށްވެސް ވަނީ ދައްކާލާފައެވެ.

މުސްތަޤުބަލަށް ކުރާ އުއްމީދު
މުސްތަޤުބަލުގައި އިބާ ބޭނުންވަނީ އެހެން މީހުންގެ ވީޑިއޯތަކަށް ބެލުމެއްނެތި، އަމިއްލަ ޚިޔާލަށް ޕެޓާންތައް އުފައްދާ މޮޅު ފަންނުވެރިއަކަށް ވާށެވެ. އަދި މޯލްޑިވްސް އެކްސްޕޯ ފަދަ ބޮޑެތި މައުރަޒުތަކުގައި ބައިވެރިވެ ހުނަރު ދައްކާލައި، އަމިއްލަ ކްރޯޝޭ ސްޓޫޑިއޯއެއް ހުޅުވުމަކީ އިބާ ދެކޭ އެންމެ ބޮޑު ހުވަފެނެވެ.

އިބާގެ މި ކުޑަކުޑަ މަސައްކަތަކީ ހަމައެކަނި ވޫލު ފަށަކުން ތަކެތި ވިޔެލުމެއް ނޫނެވެ. މިއީ ޓެކްނޮލޮޖީގެ ބޭނުން ހެޔޮގޮތުގައި ހިފައިފިނަމަ، ޅަފުރައިގެ ކުއްޖެއްގެ ކިބައިގައިވެސް މުހިންމު ހުނަރެއް އަށަގަންނުވައި، ދިރިއުޅުމުގެ ރިވެތި އާދަތަކެއް ބިނާކުރެވިދާނެ ކަމުގެ މިސާލެކެވެ. ކުދިންގެ ޝައުޤުވެރިކަން ދެނެގަނެ، އެކަމަށް ޢާއިލާއިން މަގުފަހިކޮށްދީފިނަމަ ސްކްރީންތަކުގެ އަޅުވެތިކަމުން ދުރުވެ، އުފެއްދުންތެރި ކާމިޔާބު ދުނިޔެއެއް ބިނާކުރެވިދާނެކަން އިބާ މިވަނީ ސާބިތުކޮށްދީފައެވެ. ވޫލު ފަށަކާއި ކްރޯޝޭ ހުކަކުން ފެށުނު މި ދަތުރަކީ، މާދަމާގެ ފަންނުވެރި މުޖުތަމަޢަކަށް އަޅާދިން ވަރުގަދަ ބިންގަލެކެވެ.

އިބާގެ އުއްމީދަކީ ކޮންމެ ކުއްޖަކީވެސް އެކުއްޖެއްގެ ވަގުތުގެ ބޭނުން ހެޔޮގޮތުގައި ހިފައި، އަމިއްލަ ހުނަރުން މުޖުތަމަޢު ފަޚުރުވެރިކޮށްދޭނެ ކުއްޖަކަށް ވުމެވެ.
"މަސައްކަތް ކޮށްފިނަމަ ކުޑަކުއްޖަކަސް ކާމިޔާބުވާނެ. ބޭކާރުކޮށް ވަގުތު ހޭދަނުކޮށް، ޔޫޓިއުބުންވެސް ފައިދާހުރި ކަންކަން ދަސްކުރުން." ސްކްރީންގެ ބޭނުން ހެޔޮގޮތުގައި ހިފައި ހުނަރު ތަރައްޤީކުރުމަށް ނަޞޭޙަތްތެރިވަމުން އިބާ ބުންޏެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް