ދަނގެތީ ޢީދުއުފާ؛ އިސްރަށްވެހިންގެ ހަވީރުން އެންމެނަށް އުފާވެރިކަން
ލިޔުންތެރިޔާ
ޚަދީޖާ އަރުފާ
އދ. ދަނގެތީ ޢީދު އުފާގެ ހަރަކާތްތަކުގެ ތެރެއިން އެންމެ ތަފާތު އަދި އެންމެ ހިތްހަމަޖެހުން ގެނުވައިދޭ އެއް ހަރަކާތަކީ އިސްރަށްވެހިންގެ ހަވީރެވެ. އާއްމުކޮށް ޢީދު ކުޅިވަރުގެތަކުގެ ތެރެއިން އެންމެ ބާކީވާ އެއްބަޔަކީ އެރަށެއްގައި ދިރިއުޅޭ އިސްރަށްވެހިން ނަމަވެސް، ދަނގެތީ ޢީދު އުފާގެ ހަރަކާތްތައް ކުރިއަށް ގެންދަނީ އެފަރާތްތައްވެސް ޝާމިލްކޮށްގެންނެވެ.
އެގޮތުން އެ ރަށުގައި ދިރިއުޅޭ 75 އަހަރުން މަތީގެ އިސްރަށްވެހިންނަށް ކޮންމެ ޢީދަކުވެސް ޚާއްސަ ހަވީރެއް ބާއްވާއިރު، އެ ހަވީރަކީ އެފަރާތްތަކުގެ އަގުވަޒަންކޮށް، އެފަރާތްތަކުން ރަށަށާއި ޤައުމަށް ކޮށްދީފައިވާ އަގުހުރި ޚިދުމަތްތަކުގެ ޒިކުރާއައު ކުރާ ދުވަހެވެ.
މި ޙަރަކާތް ފެށިގެންދަނީ އިސްވެހިންނަށް ރަތް ދޫލައިން ކިޔާ މަރުޙަބާއިންނެވެ. ކޮންމެ އިސްރަށްވެއްސަކުވެސް ޢާއިލާގެ ކުއްޖަކާއެކު ޙަރަކާތް އޮންނަ ސަރަހައްދަށް ވަންނަ ވަގުތު ރަތް ދޫލައިން ކިޔާ މަރުޙަބާއާއެކު، ރީތި މާބޮނޑިއެއްވެސް ހަދިޔާ ކުރެއެވެ.
އެއަށްފަހު، ދެން އޮންނަނީ ވެލްކަމް ޑްރިންކެއް ދިނުމެވެ. އިސްރަށްވެހިން އެ ބުއިމަށް އިންސާފްކުރަމުންދާއިރު، އެފަރާތްތަކުގެ އާއިލާގައި ހިމެނޭ، މާމަ ކާފަ ކިޔާ ކުދިން ރީތި އައިޓަމެއް ހުށަހަޅައިދެއެވެ. އައިޓަމްގައި ކިޔައިދޭ ލަވަވެސް ޚާއްސަކޮށްފައިވަނީ އެ އިސްރަށްވެހިންނަށެވެ.
އެ ޙަރަކާތަށްފަހު ”ޝަޚުސުންގެ ރަން ހަނދާން“ ފިލާ ހަވާލުކުރެވޭއިރު، މިއީ މިހާރު ދުނިޔެ ދޫކޮށްފައިވާ ފަރާތްތަކުގެ ތެރެއިން، އެކިގޮތްގޮތުން ދަނގެއްޗަށް ޚިދުމަތްކޮށްދީފައިވާ ފަރާތްތަކުގެ ޚިދުމަތުގެ އަގު ވަޒަންކޮށް އެފަރާތުގެ ޢާއިލާއާ ހަވާލުކުރެވޭ ފިލައެވެ. މި ފަހަރު މި ފިލާ އަރުވާފައިވަނީ، ދީނީ ގޮތުންނާއި އިޖުތިމާޢީ ގޮތުން ދަނގެއްޗަށް ގިނަ ޚިދުމަތްތަކެއް ކޮށްދީފައިވާ ޒުލޭޚާ ޢަލީ އަށެވެ.
އިސްރަށްވެހިންގެ ހަވީރަށް އިތުރު ދިރުމެއް ގެނެސްދެނީ އެ ހަވީރު ނިންމާލުމުގެ ގޮތުން ކުރިއަށް ގެންދާ ކުޅިވަރު ހަރަކާތެވެ. އިސްރަށްވެހިންނާ ގުޅޭ ގޮތަށް ފަރުމާ ކުރެވިފައިވާ މި ކުޅިވަރުތަކުން، މިފަހަރުވެސް އެންމެންގެ މޫނަށް ހިނިތުންވުން ގެނެސްދިނެވެ.
އިސްރަށްވެހިން އެ ކުޅިވަރުތަކުގައި ބައިވެރިވެ، އެކަކު އަނެކަކާ ހީނ ސަކަރާތްޖަހަމުންދިޔަ މަންޒަރު ވެގެންދިޔައީ މަންޒަރު ބަލަންތިބި އެންމެންގެ ހިތަށްވެސް ފިނިކަން ގެނުވި މަންޒަރަކަށެވެ.
މި ހަވީރު ނިންމާލާފައިވަނީ އިސްރަށްވެހިންނަށް ޚާއްސަ ހަދިޔާއެއްވެސް ދިނުމަށްފަހުގައެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
