އަޅުގަނޑު އަތު ބައިތުލް މާލުގެ ތަޅުދަނޑިވެސް އޮތް؛ އެއިން ލޯލާރިއެއްގައި ވެސް ޖެހިފައި ނޯންނާނޭ: ގާސިމް

އެމްއެމްއޭގެ ގަވަރުނަކަމާއި ގައުމީ ބައިތުލް މާލުގެ ތަޅުދަނޑި އޮތް ދުވަސްވަރެއްވެސް ދިޔަކަމަށާއި، އޭގެން ލޯލާރިއެއްގައިވެސް ޖެހިފައި ނޯންނާނެކަމަށް، ޖުމްހޫރީ ޕާޓީގެ ލީޑަރު އަދި ރިޔާސީ ކެންޑިޑޭޓް ގާސިމް އިބްރާހިމް ވިދާޅުވެއްޖެއެވެ.

ރިޔާސީ ކެންޕެއިނަށް އދ އަތޮޅަށް ކުރައްވަމުންދާ ދަތުރުފުޅުގައި އެ އަތޮޅު ވެރިކަން ކުރާ ރަށް، މަހިބަދޫއަށް ވަޑައިގެން ވާހަކަ ދައްކަވަމުން ގާސިމް ވިދާޅުވީ، ދުނިޔޭގެ ހުރިހާ ގައުމެއްގައިވެސް، މީހަކު ވެރިކަމަށް އިންތިހާބު ކުރާއިރު ބަލަނީ، އިންތިޚާބުގައި ވާދަކުރާ ކެންޑިޑޭޓުންގެ "ޓްރެކް ރިކޯޑަށް" ކަމަށެވެ. އެގޮތުން، ވެރިމީހާ އިންތިހާބު ކުރަނީ، މާޒީގައި ގައުމަށް އެންމެ ރަނގަޅު ޚިދުމަތެއް ކޮށްދެއްވާފައި ވަނީ ކާކުތޯ ބަލައި، އޭގެ މައްޗަށް ބިނާކޮށް ވޯޓުލައިގެން ކަމަށް އޭނާ ވިދާޅުވި އެވެ.

މިއާއެކު ގާސިމް ވިދާޅުވީ ދިވެހިރާއްޖޭގެ ވެރިކަން ފިޔަވައި އެހެން ހުރިހާ މަގާމެއްގައި ހެން އޭނާ މަސައްކަތް ކުރައްވާފައިވާ ކަމަށާ އެހެން ނަމަވެސް، މާޒީގައި އެ އަދާކުރި އެއްވެސް މަސައްކަތެއްގައި ޚިޔާނާތެއް ވެފައި ނުވާނެ ކަމަށެވެ.

ސެންޓްރަލް ބޭންކުގެ ގަވަރުނަރު ކަމާއި، މިނިސްޓަރު ކަމާ. ދެކަންވެސް. ދައުލަތުގެ ޚަޒާނާއާއި، ލާރި ހިފަހައްޓައިގެން ތިބި ތިޖޫރީ ތަޅުދަނޑި. ހުރިހާ އެއްޗެހި އަޅުގަނޑު އަތުގައި. ރައްޔިތުންގެ ޚާއްސަ މަޖިލީހުގެ ރައީސް ކަމާ. އެންމެ ފަޅި ލާރިއެއް ގައި ޖެހިގެންވެސް އަޅުގަނޑާ ސުވާކު ކޮށްލެވުނުތޯ؟ ތިން އަހަރު ދުވަހުގެ ދިގު މުއްދަތުގައި ހުރި އިރު. މިއީ ކުޑަ ކަމެއް ތޯ؟

ގާސިމް އިބްރާހިމް

ގާސިމް ވިދާޅުވީ ވެރިކަން ލިބިވަޑައިގެންނެވުމުން، އެ ވެރިން ކޮށްދޭ ކަންކަމަކީ އެބޭފުޅާގެ ކިބާގައި ހުންނަ މުރުއްވަތްތެރި ކަމުން ކޮށްދޭ ކަމެއް ނޫން ކަމަށެވެ. އެހެނީ ވެރިމީހާ ކަންކަން ކޮށްދެނީ ރައްޔިތުންގެ ފައިސާއިންނާއި، ބޭރު ގައުމުން ނަގާ ދަރަނިން "އެއްބައި ޖީބަށް ލާފައި" ދެން ހުންނަ ފައިސާއިން ކަމަށް ގާސިމް ވިދާޅުވި އެވެ.

އެހެންނަމަވެސް އޭނާގެ ވެރިކަން ބައްޓަންކުރާނީ އިގްތީޞާދީ ތަބުތައް ވަރުގަދަކޮށް ދަރަނިކުޑަކޮށް ހުރިހާ ރައްޔިތުން ނަފާލިބޭނެ އިޤްތިޞާދެއް ބިނާކުރުމަށެވެ.