ޕީއެސްއެމާއި އެމްއެންޔޫގެ ފްލެޓްތައް އަނބުރައި ހޯދައިދެއްވާނެ ކަމުގެ ޔަގީންކަން މުއިއްޒު ދެއްވައިފި

މިއަހަރުގެ ރިޔާސީ އިންތިޚާބު ކާމިޔާބު ވެވަޑައިގެން ވެރިކަމަށް އާދެވިއްޖެނަމަ، ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ވެރިކަމުގައި ހިޔާ މަޝްރޫގެ ތެރޭގައި ހިމެނި ޕަބްލިކް ސާވިސް މީޑިއާ (ޕީއެސްއެމް)ގެ މުވައްޒަފުންނާއި ގައުމީ ޔުނިވާސިޓީގެ މުވައްޒަފުންނަށް ދޭން ނިންމާފައިވާ ފްލެޓްތައް އަނބުރާ ހޯއްދަވައިދެއްވާނެކަމުގެ ޔަގީންކަން އިދިކޮޅު ޕީޕީއެމް، ޕީއެންސީ ކޯލިޝަންގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު ދެއްވައިފިއެވެ.

ގެދޮރުވެރިކަމަކީ ކޮންމެ ރައްޔިތެއްގެ އަސާސީ ހައްގެއް ކަމުގައި ސިފަކުރައްވަމުން ރޭ ފުވައްމުލަކުގައި ބޭއްވި ޑރ މުއިއްޒުގެ ކެމްޕެއިން ބޮޑު ޖަލްސާގައި ވާހަކަފުޅު ދައްކަވަމުން މުއިއްޒު ވިދާޅުވީ، ރައީސް ޔާމީންގެ ހިޔާ ފްލެޓްގެ މަޝްރޫގައި ގިނަ ކުންފުނިތަކަކަށް ފްލެޓް ލިބޭގޮތަށް ހަމަޖެހިފައި އޮތް ކަމަަށާއި މަޝްރޫތަކުގެ ދަށުން ބައެެއް ކުންފުނިތަކުން ފްލެޓް ލިބޭނެ ފަރާތްތައް ވެސް އޮތީ ކަނޑައަޅައި ނިންމައިފައިކަމަށެވެ.

އެކަމަކު މި ސަރުކާރު އައިސް ހެދި ގޮތަކީ މީގެ ތެރެއިން ބައެއް ކުންފުނިތަކުގެ މަޝްރޫތައް ހެދި ނުހެދި ގޮތެއް ވެސް ނޭނގެ ވުޖޫދުން ގެއްލިއްޖެ

ޑރ މުހައްމަދު މުއިއްޒު

މީގެއިތުރުން މުއިއްޒު ވިދާޅުވީ ޕީއެސްއެމްގައި ސިޔާސީ ނުފޫޒު ފޯރައި، ވަޒީފާ އަދާ ކުރުމުގައި އިންތިހާ އަށް ދަތިވެފައިވާ ކަމަށެވެ. އަދި ޕީޕީއެމް/ޕީއެންސީގެ ވެރިކަމެއްގައި އެކަން ނިމުމަކަށް ގެނެސް، ވަޒީފާގެ ކުރިއެރުން ދޭނެ އުސޫލެއް ގާއިމުކޮށް ދެއްވާނެކަމަށެވެ.

މުއިއްޒު ވިދާޅުވީ، ޕީއެސްއެމްގެ މުވައްޒަފުންނަށް ހާއްސަކުރެވިފައިވާ މަޝްރޫއު ހުޅުމާލޭގެ ހައުސިން މަޝްރޫގެ ތެރެއިން ވުޖޫދުން ފެންނާނެ ކަމަށާއި އެ އުފާވެރިކަން އެ މުވައްޒަފުންނަށް ހޯދައިދޭނެ ކަމަށެވެ.

ގައުމީ ޔުނިވާސިޓީގެ ވާހަކަ ފާހަގަކުރައްވަމުން މުއިއްޒު ވިދާޅުވީ ފްލެޓް ލިބޭ މީހުންގެ ލިސްޓު ވެސް އެ ތަނުން އޮތީ ނެރެފައި ކަމަށެވެ.

މީގެ އިތުރުން ރޭގެ ޖަލްސާގައި މުއިއްޒު ވަނީ، ސިފައިންނާއި ފުލުހުންގެ ނުނިމި ހުރި ފްލެޓްތައް ނިންމަވާނެކަމަށް ވިދާޅުވެފައެވެ. އަދި އޭގެ އިތުރުން ވެސް ސިފައިންނާއި ފުލުހުންނަށް އަމާޒުކޮށް ހައުސިން މަޝްރޫއު ހިންގަވާނެ ކަމަށް އޭނާ ވިދާޅުވިއެވެ.