ގަމުގެ އިހްތިޞާސް ގައްދޫއަށް ބަދަލުކޮށް އަތޮޅަށް ނަފާވާނެ އިޤްތިޞާދަކަށް ހަދާނަން: ޑރ މުއިއްޒު

ގަމުގެ އިހްތިޞާސް ގދ ގައްދޫއަށް ބަދަލުކޮށް، އެ ރަށަކީ ގދ އަތޮޅަށް ނަފާވާނެ ވަރުގެ އިޤްތިޞާދަކަށް ހައްދަވާދެއްވާނެ ކަމަށް ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑޮޑޭޓު ޑރ މުހައްމަދު މުއިއްޒު ވިދާޅުވެއްޖެ އެވެ.

ޑރ މުއިއްޒު މިފަދައިން ވިދާޅުވެފައި ވަނީ އެމަނިކުފާނު ގދ އަތޮޅަށް ކުރައްވާ ރިޔާސީ ކެމްޕޭނު ދަތުރުފުޅުގައި އެ އަތޮޅުގެ ގައްދޫއަށް ވަޑައިގެން، އެ ރަށަށް ކޮށްދެއްވާނެ ކަންކަމާއި ގުޅޭގޮތުން ރައްޔިތުންނާއި މުޚާތަބުކުރައްވާ ވާހަކަދައްކަވަމުން ނެވެ.

އެގޮތުން އެމަނިކުފާނު ވިދާޅުވީ އެވޭލާ ޒަމާނުއްސުރެ ގަމަކީ ގައްދޫގެ ބައެއްގެ ގޮތުގައި އޮތް ރަށެއް ކަމަށެވެ. އެހެންކަމުން، އެއީ ގައްދޫގެ އިހުތިޞާސް ހިނގާ ތަނެއްގެ ގޮތުގައި ހަމަޖައްސަވާދެއްވާނެ ކަމަށާއި، އަދި އެ ރަށަކީ އަތޮޅަށް ނަފާވާނެ ތަނެއްގެ ގޮތުގައި ތަރައްގީކޮށްދެއްވާނެ ކަމަށެވެ.

"ގަމަމީ ގައްދޫ ރައްޔިތުންގެ ތަނެއްގެ ގޮތުގައި ހަދައިދޭނަން. އަދި އެ ރަށުން ރައްޔިތުންނަށް ނަފާވާގޮތަށް ބައްޓަންކުރެވި، އުމުރާނީ ތަރައްގީއާއި، އިޤްތިޞާދާއި ވިޔަފާރި ފުޅާކުރުމަށް ގަން ތަރައްގީކުރާނަން. އޭރުން މުޅި އަތޮޅުގެ ރައްޔިތުންނަށް ގަމުން ނަފާކުރާނެ"

ޑރ މުހައްމަދު މުއިއްޒު

ޑރ މުއިއްޒު ވިދާޅުވީ ގދ އަތޮޅަކީ ފަތުރުވެރިކަން ފުޅާކުރެވިދާނެ އަތޮޅެއް ކަމަށެވެ. އެގޮތުން އަތޮޅުގައި އެ ސިނާއަތު ކުރިއެރުވުމަށް މިހާރު ނުނިމި ހުރި ރިސޯޓުތައް ނިންމާ އިތުރު ރިސޯޓުތައް ތަރައްގީކުރާނެކަމަށް އެމަނިކުފާނު ވިދާޅުވި އެވެ.

އަދި ގައްދޫއަކީ ފާހަގަކޮށްލެވޭ ސާފިން ޕޮއިންޓުތަކެއް ހުރި ރަށަކަށްވުމުން، އެ ޕޮއިންޓު ތަކުގެ ބޭނުން ހިފާ ސާފިން ޓުއަރިޒަމް ފުޅާކުރުމުގެ މަސައްކަތް ކުރިއަށް ގެންދާނެކަމަށް ޑރ މުއިއްޒު ވިދާޅުވި އެވެ. އެގޮތަށް އެކަން ކުރެވިއްޖެ ނަމަ ރަށުގައި ތިބެގެން ރަނގަޅު އާމްދަނީއެއް ލިބޭނެ ވަޒީފާތައް އުފެދިގެންދާނެ ކަމަށާއި، އަދި ރައްޔިތުންގެ ފުދުންތެރިކަން އިތުރުވެގެންދާނެކަމަށް ޑރ މުއިއްޒު ވިދާޅުވި އެވެ.

އެމަނިކުފާނު ވިދާޅުވީ ސަރުކާރެއް ގެނައުމުގެ އެންމެ ބޮޑު ބޭނުމަކީ ރައްޔިތުންނަށް ބޭނުންވާ އަސާސީ ކަންކަން ފުރިހަމަކޮށްދީ ރައްޔިތުންގެ ފުދުންތެރިކަން އިތުރުކުރުން ކަމަށެވެ. އދި ވިދާޅުވީ އެކަން ނުކުރެވޭ ނަމަ ސަރުކާރެއް އޮތުމުގެ ބޭނުމެއް ނެތް ކަމަށެވެ.

އެއާއެކު ޑރ މުއިއްޒު ވިދާޅުވީ ޕްރޮގްރެސިވް ކޮންގްރެސް ކޯލިޝަންގެ ވެރިކަން ވެގެންދާނީ ރައްޔިތުން ފުދުންތެރި ކުރުވާނެ ވެރިކަމަކަށް ކަމަށެވެ. އަދި އެކަމާއި މެދު ރައްޔިތުން ޝައްކު ނުކުރެއްވުމަށް ވެސް އެމަނިކުފާނު ވަނީ އެދިވަޑައިގެންފަ އެވެ.