މުއިއްޒުގެ ވެރިކަމެއްގައި ނަޑެއްލާގެ ރައްޔިތުންނަށް ބޮޑު ބަނދަރެއް!

ޕީޕީއެމް ޕީއެންސީގެ ވެރިކަމެއްގައި ގދ ނަޑެއްލާގައި ތަރައްގީގެ ގިނަ މަޝްރޫޢުތަކެއް ހިންގާނެ ކަމަށާއި، އޭގެ ތެރެއިންވެސް ހާއްސަ އިސްކަމެއް ދީގެން އެރަށަށް ރާޅު އަރާ މައްސަލައަށް ހައްލެއް ގެނެސް އެ ރަށުގައި ބޮޑު ބަނދަރެއް ތަރައްގީކޮށް ދެއްވާނެ ކަމުގައި އިދިކޮޅު ކޯލިޝަންގެ ރިޔާސީ ކެންޑިޑޭޓް ޑރ މުހައްމަދު މުއިއްޒު ވިދާޅުވެއްޖެއެވެ.

ރިޔާސީ އިންތިހާބުގެ ކެމްޕެއިންގައި ގދ އަތޮޅަށް ކުރައްވަމުންގެންދަވާ ދަތުރުފުޅުގައި އެ އަތޮޅު ނަޑެއްލާއަށް މިއަދު ވަޑައިގެން އެރަށުގެ ސަޕޯޓަރުންނާއި ބައްދަލުކުރައްވާ ދެއްކެވި ވާހަކަފުޅުގައި މުއިއްޒު ވިދާޅުވީ، ރާއްޖޭގެ އެހެން ރަށްތަކެކޭ އެއްގޮތަށް އެރަށަށްވެސް ގިނަ ކަންތައް ކޮށްދެއްވާނެ ކަމަށާއި އެރަށަށް ދިމާވެފައިވާ އެންމެ ބޮޑު މައްސަލަ ކަމަށްވާ ރާޅު އެރުމާއި ބަނދަރުގެ މައްސަލަ ހައްލުކޮށްދެއްވާނެ ކަމަށެވެ.

ރަށުގެ ބަނދަރުގެ މައްސަލަ ހައްލުކޮށް ބޮޑު ބަނދަރެއް ހަދައިދޭނަން. އަދި ހަމައެއާއެކު ރަށަށް ރާޅުއަރާ މައްސަލަ ބޮޑު ހިލަ ޖަހައިގެން ހިމާޔަތްކޮށްދޭނަން. މި ދެމަޝްރޫޢު ކުރިޔަށް ގެންދާނީ އެކުުއެކީގައި

ޑރ މުހައްމަދު މުއިއްޒު

މީގެ އިތުރުން މުއިއްޒު ވަނީ އިދިކޮޅު ކޯލިޝަންގެ ވެރިކަމެއްގައި ސަރުކާރުން ފެނިގެން ދާނީ ރައްޔިތުންގެ އަޑު އަހައި، އެ އެހުންތަކަށް އިޖާބަދޭ މަންޒަރުކަމުގައި ވިދާޅުވެފައެވެ.

ނަޑެއްލާއަކީވެސް ޒުވާނުން ތިބި ރަށަކަށްވެފައި ޒުވާނުން ކުޅިވަރު ކުޅުމަށް ބޭނުންވާ ކަންތައްތަކެއް އެބަހުރިކަން ފާހަގަކޮށް މުއިއްޒުވަނީ އެކަންކަންވެސް މެނިފެސްޓޯގެ ތެރޭގައި ހިމަނާނެ ކަމަށް ވިދާޅުވެފައެވެ.

އަދި އެ ރަށުގެ ސިއްޚީ މަރުކަޒުގެ ޚިދުމަތްތަކުގެ ފެންވަރު ރަނގަޅުކޮށްދީ އެ ސިއްޚީ މަރުކަޒު ތަރައްޤީ ކުރުމުގެ ގޮތުން،ފެންވަރު ރަނގަޅުކޮށް ވޯޑަކާއި އޮފީސް ބައެއް އިތުރުކޮށްދޭން މުއިއްޒު ވަނީ ވައުދުވެ ވަޑައިގެންފައެވެ.

މީގެ އިތުރުންވެސް ނަޑެއްލާ ސްކޫލުގައިވެސް މަލްޓީ ޕާޕަސް ހޯލަކާއި ކްލާސްރޫމްގެ އިތުރުން ސްޓާފް ރޫމަކާއި ލައިބްރަރީއެއް އަޅައިދޭނެ ކަމަށް މުއިއްޒުވަނީ ވިދާޅުވެފައެވެ.

ރިޔާސީ އިންތިހާބުގެ ކެމްޕެއިންގައި ގދ އަތޮޅަށް ޑރ މުއިއްޒު އާއި ކެމްޕެއިން ޓީމުން ކުރަމުން ގެންދާ ދަތުރުގައި އެ އަތޮޅުގެ ރަށްތަކުން ހޫނު ތަރުޙީބެއް ލިބެމުން އަންނަކަން ފާހަގަކޮށްލެވެއެވެ.