ބޭންކުތަކުން ނެގި ލޯނުތައް ދެއްކޭނެ ކަމުގެ ޔަޤީންކަން އެބައޮތް: ރައީސް ޞާލިޙް

ބޭންކުތަކުން ނަގައިފައިވާ ބޮޑެތި ލޯނުތައް އަނބުރާ ދެއްކޭނެ ކަމުގެ ޔަޤީންކަން އެބަ އޮތް ކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.

ރައީސް މިހެން ވިދާޅުވީ ރިޔާސީ ކެމްޕޭނަށް ތ.އަތޮޅަށް ކުރައްވަމުން ގެންދަވާ ދަތުރުފުޅުގައި ތ.ކިނބިދޫއަށް ވަޑައިގެން ކިނިބިދޫ ރައްޔިތުންނާ އެކު ބޭއްވެވި ބައްދަލުވުމުގައި ވާހަކަދައްކަވަމުންނެވެ.

ރައީސް ޞާލިޙް ވިދާޅުވީ ވެރިކަމާއި ހަވާލުވެވަޑައިގެން އެންމެ ފުރަތަމަ ދުވަހުވެސް ރައްޔިތުންނަށް ވީ ވަޢުދުތައް ފުއްދުމުގެ މަސައްކަތް ފެއްޓެވި ކަމަށާއި ދައުލަތުގައި އޭރު ފައިސާ ނެތް ކަމަށެވެ.

އަދި ރިޒާވްގައި ފައިސާއެއް ހުރިނަމަ އެފައިސާއެއް ހަރަދުކުރަންޖެހުނީ ޖީއެމްއާރްގެ އާބިޓްރޭޝަންގެ މައްސަލައަށް ކަމަށާއި ރިޒާވުން 200 އެތައް މިލިއަން ޑޮލަރެއް އެކަމަށް ދޭން ޖެހުނު ކަމަށް ރައީސް ވިދާޅުވިއެވެ. ވެރިކަމާއި ހަވާލުވެ ވަޑައިގެންނެވިއިރު ރިޒާވްގައި ހުރީ މަދުއެއްޗެއް ކަމަށާއި، ހެޔޮއެދޭ ޤައުމުތަކުން ލިބުނު ފައިސާއާއި އެކީގައި މަސައްކަތް ފެއްޓެވި ކަމަށް ރައީސް ޞާލިޙް ވިދާޅުވިއެވެ.

މަސައްކަތް ފަށައިގަތް ތަނުން ކޮވިޑްގެ ވަބާ ކުރިމަތިވެވަޑައިގަތް ކަމަށާއި  އިޙްސާސްކުރަން ދަތި އެތައް އުނދަގޫ ތަކެއް ކުރިމަތިވިކަމަށް ރައީސް ޞާލިޙް ވިދާޅުވިއެވެ.

"ކުޑަ ސިކުންތު ކޮޅެއްގެ ތެރޭގައި މުޅި ދުނިޔެ ހުއްޓުމަކަށް އައި، އަޅުގަނޑުމެން ލޮލަށް ނުފެންނަ ސޫތްޕެއް، އެހެން ނަމަވެސް އަޅުގަނޑުމެން އެކަން އިރާދަކުރެއްވިޔާ ހުރަސްކޮށް މިއަދު މިއޮތީ އަނެއްކާވެސް ހަމަޖެހުމުގެ ނޭވާއެއް ލެވިފަ" ރައީސް ޞާލިޙް ވިދާޅުވިއެވެ.

ރައީސް ވިދާޅުވީ އެފަދަ ދަނޑިވަޅުތަކުގައި ކަންކުރަން އޮންނަނީ ދެގޮތަކަށް ކަމަށާއި އެއްގޮތަކީ މުސާރަތައް ކުޑަކޮށް ވަޒީފާއިން މީހުން މަދުކޮށް ޚަރަދު ކުޑަކުރުން ކަމަށާއި، ދެވަނަ ގޮތަކަށް އޮންނަނީ ފައިސާ ހޯދައިގެން ޕްރޮޖެކްޓްތައް ހިންގުމާއި މުސާރަ ދިނުމާއި އިކޮނޮމީ ހިންގުން ކަމަށެވެ.

ރައީސް ވިދާޅުވީ ސަރުކާރުން ނިންމީ ދެވަނަ ގޮތް ކަމަށެވެ.

"އެގޮތް ނިންމީވެސް ތަޖުރިބާގެ އަލީގައި، 2008ވަނަ އަހަރު އެނގިވަޑައިގަންނަވާނެ އަޅުގަނޑުމެންގެ ސަރުކާރުގަ މުޅު ދުނިޔެއަށް އައި ފައިނޭންޝަލް ކްރައިސިސް، އަޅުގަނޑުމެންގެ އޭރުގެ ސަރުކާރުން ނެގި ޑިޒިޝަން، އޭރުގެ ފައިނޭންޝަލް މިނިސްޓަރާއި އޭރު ސަރުކާރުގައި ތިއްބެވި ބޭފުޅުން ނިންމެވީ ޚަރަދު ކުޑަކުރުމަށް، މީހުން ވަޒީފާއިން ވަކިކުރުމަށް، މުސާރަ ކުޑަކުރުމަށް، އޭގެ ދަތި އުނދަގޫ ރައްޔިތުންނަށް އިންތިހާއަށްފޯރި" ރައީސް ޞާލިޙް ވިދާޅުވިއެވެ.

ރައީސް ޞާލިޙް ވިދާޅުވީ 2019 ވަނަ އަހަރު ކޮވިޑްގެ ދުވަސްވަރު ނިންމުން ނިންމެވީ އެތަޖުރިބާގެ އަލީގައި ކަމަށެވެ.

ރައީސް ވިދާޅުވީ ޚަރަދު ކުރުމަށް ނިންމައި އެގޮތައް މަސައްކަތްތައް އެބަހުރި ކަމަށާއި، އަދިވެސް އެފަދަ ޤައުމުތަކުން އުޅެނީ އެކަންކަމުން އަރައިނުގަނެވިގެން ކަމަށެވެ.

"އަޅުގަނޑު ހިތުން އަޅުގަނޑަށް އެނިންމުނީ އެންމެ ރަނގަޅުގޮތް، ދުނިޔޭގެ ޤައުމުތަކުން އެއީ ކިހިނެއްވީ ކަމެއްތޯ ބަލައި އަޅުގަނޑުމެންނަށް އެބަ މަރުޙަބާކިޔާ" ރައީސް ޞާލިޙް ވިދާޅުވިއެވެ.

ރައީސް ވިދާޅުވީ ރަށްރަށުން މިހާރު ފެންނަން މިހިރަ ބަނދަރުތަކާއި ފެނާއި ނަރުދަމާއާއި އިންޖީނުގެތަކާއި ސިއްޚީ ޚިދުމަތާއި ސްކޫލްތަކަށް މިއަންނަ ބަދަލުތަކަކީ އޭގެ ސަބަބުން ކުރެވުނު ކަންތައްތައް ކަމަށެވެ.

"އަޅުގަނޑު ހިތުން ބިންގަލެއް މިއޮތީ އެޅިފަ، ދެންދާންވީ ކުރިއަށް، އެހެންވެ އަޅުގަނޑުމެންގެ ކުރިއަށްއޮތް ދައުރުގެ މެނިފެސްޓޯގައި އިޤްތިޞާދީ ބޮދު ބަދަލެއްގެ ވާހަކަ މިދައްކަނީ، އެކަން ކުރެވޭނެ ގޮތްތައް އިންތިޒާމް ކޮށްފައި ހުރީމަ، އެދުވަހު އަޅުގަނޑުމެން ފައިސާ ހޯދީ މިކަންކަން ކުރަންވެގެން، އަނބުރާ އެފައިސާ  ބޭންކުތަކަށް ދެއްކޭނެ ކަމުގެ އިރާދަކުރެއްވިއްޔާ ފުރިހަމަ ޔަޤީންކަން އަޅުގަނޑުމެންގެ އެބައޮތް" ރައީސް ޞާލިޙް ވިދާޅުވިއެވެ.

ރައީސް ވިދާޅުވީ ރިޔާސީ ކެންޑިޑޭޓުން ދަރަނީގެ ވާހަކަ ދައްކަވައި ބަނގުރޫޓް ވެފައި އޮތް ވާހަކަ ދައްކަވަފައި ވަޢުދުތައް ވެ ވަޑައިގަންނަވަނީ ފައިސާ ހުރިކަން ނުވަތަ ލިބޭނެކަން ދެނެވަޑައިގަންނަވާތީ ކަމަށާއި، އެހެންނޫންނަމަ އެބޭފުޅުން އެހައްދަވަނީ އިތުރުފުޅުތަކެއް ކަމަށެވެ.

ތ.އަތޮޅަށް ކުރައްވަމުން ގެންދަވާ ދަތުރުފުޅުގައި ރައީސް ޞާލިޙާއި އެކު އެމަނިކުފާނުގެ ސަރުކާރުގެ ބައެއް ވަޒީރުންވެސް ދަނީ ބައިވެރިވެ ވަޑައިގަންނަވަމުންނެވެ.