އަލުން ފްލައިޓްތައް ގެނެސް، ބަނގުރޫޓް ވެފައިވާ ގައުމީ އެއާލައިން ކޮޅަށް ޖަހާނަން: ޑރ.މުޢިއްޒު

ގައުމީ އެއާލައިން މިހާރު ވަނީ ބަންގުރޫޓްވެފައި ކަމަށާ، އެ މަނިކުފާނުގެ ވެރިކަމުގައި އެ އެއާލައިން ކޮޅަށް ޖައްސަވައި ދިވެހިން ފަހުރުވެރިވާފަދަ އެއާލައިނަކަށް ހަދައިދެއްވާނެ ކަމަށް ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ.މުޙައްމަދު މުޢިއްޒަށް ވިދާޅުވެއްޖެއެވެ.

ރިޔާސީ އިންތިހާބުގެ ދެވަނަ ބުރުގެ ކެންޕެއިނަށް ފުވައްމުލަކަށް ވަޑައިގެން މިރޭއެ ސިޓީގައި ބޭއްވި ބޮޑު ޖަލްސާގައި ވާހަކަ ދައްކަވަމުން މުޢިއްޒު ވިދާޅުވީ ރާއްޖޭގެ އިގްތިޞާދު ނަގާ ކޮޅަށް ޖެހުމަށްޓަކައި ފަތުރުވެރިކަން ވަރަށް ބޮޑަށް ކުރިއަރުވަންޖެހޭ ކަމަށެވެ. އަދި އެމަނިކުފާނުގެ އިގްތިޞާދީ ސިޔާސަތުގައި  ފަތުރުވެރިކަމުގެ ދާއިރާއާއި، މަސްވެރިކަމުގެ ދާއިރާއާއި، ދަނޑުވެރިކަމުގެ ދާއިރާ އަދި ކޮންސްޓްރަކްޝަންގެ ދާއިރާ ކުރިއެރުވުމަށް ޚާއްސަ ސަމާލުކަމެއް ދީފައިވާނެ ކަމަށް ވިދާޅުވި އެވެ.

އަދި ފަތުރުވެރިކަމުގެ ވާހަކަދައްކާއިރު އޭވިއޭޝަން އިންޑަސްޓަރީގައި މަސައްކަތްކުރާ ފަރާތްތަކުން ކުރާ އަގުހުރި މަސައްކަތް ފާހަގަކުރަންޖެހޭކަން ފާހަގަކުރައްވަައި މުޢިއްޒު ވިދާޅުވީ، އެ ދާއިރާގައި މަސައްކަތްކުރާ މުވައްޒަފުންނަށް ހެޔޮގޮތް ތަކެއް ހަދައިދެއްވާނެ ކަމަށެވެ.

މީގެއިތުރުން މުޢިއްޒު ވިދާޅުވީ ގައުމީ އެއާލައިން ވަނީ ބަނގުރޫޓުވެފައި ކަމަށާއ ގައުމީ އެއާލައިންގެ މި ހާލަތުން ނަގައި ކޮޅަށް ޖަހައިދޭނެ ކަމަށެވެ.

''ޤައުމީ އެއާރލައިން ވަނީ ބަނގުރޫޓްވެފައި. ޤައުމީ އެއާރލައިން މިހާލަތުން ނަގައި ކޮޅަށް ޖަހައިދޭނަން. އަލުން ސީދާ ފުލައިޓުތައް ބޭރު ގައުމުތަކަށް އަޅުގަނޑުމެންގެ ޓޫރިޒަމްގެ މައި ޑެސްޓިނޭޝަންތަކަށް އަދި އިތުރު ޑެސްޓިނޭޝަންތަކަށް ވެސް ހުޅުވިގެންދާ ގޮތަށް ވައިޓް ބޮޑީ އެއާކްރާފްޓް އަލުން ގެނެސް އަދި ނެރޯ ބޮޑީ އެއާކްރާފްޓްތައް ވެސް އަލުން ގެނެސް އިރާދަކުރެއްވިއްޔާ އަޅުގަނޑުމެންގެ ގައުމީ އެއާލައިނަކީ ދިވެހިން ފަހުރުވެރިވާފަދަ އެއާލައިނަކަށް އަނެއްކާ ވެސް ހަދައިދޭނަން.''

ޑރ. މުހައްމަދު މުޢިއްޒު

މިއާއެކު މުޢިއްޒު ވިދާޅުވީ އައިލޭންޑް އޭވިއޭޝަންގައި މަސައްކަތްކުރައްވާ ފަރާތްތަކަށް ކުރިމަތިވެފައިވާ ތަފާތުކުރުމުގެ މައްސަލަތަކަށް ހައްލު ހޯދައިދީ އިންޓަރނޭޝަނަލް މިންގަނޑުތަކާއި އެއްގޮތަށް އެ ކުންފުނީގެ އޮނިގަނޑާއި މުސާރައާއި އިނާޔަތްތައް ބައްޓަންކޮށްދީ އިންސާފު ގާއިމްކޮށްދެއްވާނެ ކަމަށެވެ.

އަދި ސިވިލް އޭވިއޭޝަން އޮތޯރިޓީ އަކީ އޭވިއޭޝަންގެ ކަންކަން ބަލަހައްޓައިދީ، އޮޕަރޭޝަނަލް ކަންކަމަށް މަގުފަހިކޮށްދޭ ބައިނަލްއަގުވާމީ ގޮތުން އެކަން އޮންނަ އުސޫލުން ހިންގާ ތަނަކަށް ހަދައިދެއްވާނެ ކަމަށް މުޢިއްޒު ވިދާޅުވިއެެވެ.

ސަރުކާރުގެ ކުންފުނި އައިލެންޑް އޭވިއޭޝަންއިން ހިންގާ މޯލްޑިވިއަން ހިންގަމުން އަންނަނީ ބޮޑު ގެއްލުމެއްގައެވެ. ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން އާންމުކޮށްފައިވާ އައިލެންޑް އޭވިއޭޝަނުގެ މާލީ ހިސާބުތަކުން ދައްކާ ގޮތުން ބަލާއިރު މިދިޔަ އަހަރުގެ އެއްވެސް ކުއާޓާއެއްގައި އެ ކުންފުންޏަށް ފައިދާވެފައެއް ނުވެއެވެ. އެގޮތުން ފާއިތުވި އަހަރުގެ 4 ކުއާޓާގައި ލިބުނު ގެއްލުން އެއްކޮށްލުމުން ޖުމްލަ 164 މިލިއަން ރުފިޔާގެ ގެއްލުން ވަނީ ވެފައެވެ