"ދިވެހިން ތިބީ ފަލަސްތީނާއިއެކު؛ މިނިވަން ފަލަސްޠީނުގެ ދައުލަތެއް ޤާއިމުކުރަން ރާއްޖެއިން ފުރިހަމަ އެއްބާރުލުން ދޭނެ"

ފަލަސްޠީނުގެ މިނިވަން ދައުލަތެއް ޤާއިމުވެ އެ ގައުމުގެ ވެރިރަށަކީ ޤުދުސް ކަމުގައި ހެދުމަށް ދިވެހިރާއްޖެއިން ދޭންޖެހޭ ހުރިހާ އެއްބާރުލުމެއް ކުރިއަށް އޮތް ތަނުގައި ދެމުންދާނެކަމަށް އިންތިޚާބީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.

ބްލޫމްބާގް ޓީވީއަށް ދެއްވި ޚާއްސަ ބަސްދީގަތުމެއްގައި އެ ނޫހުގެ ރިޕޯޓަރު ވަނީ، ފަލަސްތީން އާއި ދެކޮޅަށް ހައްދުފަހަނައަޅާފައިވާ އިސްރާއީލުން ހިންގަމުންދާ ޖަރީމާތަކުގައި މުޢިއްޒު ހުންނެވީ ކޮން ކޮޅެއްގައިތޯ އަހާފައެވެ.

އެ ސުވާލަށް ޖަވާބު ދެއްވަމުން މިހާރު އިންތިޚާބީ ރައީސް ވިދާޅުވީ ދިވެހިރާއްޖެ އަބަދުވެސް އޮންނާނީ ފަލަސްޠީނުގެ  ރައްޔިތުންނާއެކު ކަމަށެވެ. އަދި 1967 ވަނަ އަހަރުގެ ބޯޑަރުތަކާ އެއްގޮތްވާ ގޮތުގެ މަތިން، ޤުދުސަކީ ވެރިރަށުގެ ގޮތުގައި އޮންނަ، އަމިއްލަ މުސްތަޤިއްލު ދައުލަތެއް ޤާއިމުކުރުމުގެ ފުރިހަމަ އިޚުތިޔާރު ފަލަސްޠީނު ރައްޔިތުންނަށް އޮންނަންވާނެ ކަމުގައި އެމަނިކުފާނާއި ދިވެހިރައްޔިތުން ދެކެވަޑައިގަންނަވާ ކަމަށްވެސް ވިދާޅުވިއެވެ.

1967 ވަނަ އަހަރުގެ ބޯޑަރުތަކާ އެއްގޮތްވާ ގޮތުގެ މަތިން، ގުދުސް އަކީ ވެރިރަށް ކަމުގައި އޮންނަ، މިނިވަން މުސްތަގިއްލު ފަލަސްޠީނެއް، އޮތުމަކީ އެމީހުންގެ ހައްގެއް. އެއީ ދިވެހިންގެ ސްޓޭންޑް. އަދި އެކަން މުސްތަގުބަލްގައި ހާސިލް ކޮށްދިނުމަށް އަޅުގަނޑުމެން ފުރިހަމަ އެއްބާރުލުން ދޭނަން.

އިންތިޚާބީ ރައީސް ޑރ މުހައްމަދު މުއިއްޒު

މިއާއެކު ޑރ.މުޢިއްޒު ވިދާޅުވީ ހުރިހާ އެންމެނަށްވެސް އަމިއްލަ ކަންކަން ނިންމުމުގެ ފުރިހަމަ އިޚުތިޔާރު ލިބިގެންވާ ކަމަށާއި، ފަލަސްޠީނު ރައްޔިތުންނަށްވެސް އެ ޙައްޤު އޮންނާނެކަން ޤަބޫލުކުރުމަކީ ޒަމާނުއްސުރެ ރާއްޖެއިން ދަމަހައްޓަމުން އައި ސިޔާސަތެއްކަމަށާއި ކުރިއަށް އޮތް ތަނުގައިވެސް އެ ސިޔާސަތު ދަމަހައްޓަވާނެ ކަމަށެވެ.

މުޢިއްޒުގެ ވާހަކަފުޅާއި ގުޅިގެން، ރިޕޯޓަރު ވަނީ ފަލަސްޠީނު އިސްރާއީލު މައްސަލައިގެ ސަބަބުން ރާއްޖޭގައި ހައްދުފަހަނައެޅުން ފެތުރި އިތުރުވެދާނެތޯ އާއި އެކަމާއި ގުޅިގެން އެމަނިކުފާނުގެ އެއްވެސް ކަންބޮޑުވެލެއްވުމެއް އޮތް ތޯ ސުވާލު ކޮށްފައެވެ.

އެ ސުވާލަށް ޖަވާބު ދެއްވަމުން ޑރ.މުޢިއްޒު ވިދާޅުވީ އެ މައްސަލައަކީ ހުރިހާ ޤައުމެއްގައިވެސް އޮތް މައްސަލައެއްކަމަށާއި، އެއީ ފަލަސްޠީނުގެ މައްސަލައާ ގުޅުންހުރި ކަމެއް ކަމުގައި ދެކެވަޑައިނުގަންނަވާ ކަމަށެވެ. އަދި ހަރުކަށިފިކުރު ފެތުރުން ހުއްޓުވޭނީ އިސްލާމްދީން އޭގެ އަސްލު ގޮތުގައި ރައްޔިތުންނަށް އުނގަންނައި ދީގެން ކަމަށާ، އެމަނިކުފާނު މަސައްކަތް ކުރައްވާނީ އެމަގުން ކަމަށް މުޢިއްޒު ވިދާޅުވިއެެވެ.

"ހަރުކަށި ފިކުރުގަ މީހުންނަށް ރަނގަޅު އިސްލާމްދީން ބުނެދީ، އެއީ ސުލްހައިގެ ދީންކަމާއި އެންމެނަށް އިހުތިރާމުކޮށް ހައްގުތަކަށް ރައްކާތެރިވުމުގެ ދީންކަން ބުނެދީ އެމީހުން އިސްލާމްދީނުގެ ރަނގަޅު އުސޫލުތަކަށް އިއާދަކުރަން އަޅުގަނޑު ބޭނުމީ. އަޅުގަނޑު ދެކޭ ގޮތުގައި އެންމެންވެސް ރަނގަޅު މަގަށް ރުޖޫއަކުރެވޭނެ،" އިންތިޚާބީ ރައީސް ވިދާޅުވިއެވެ.

މުޢިއްޒު ވަނީ އެއް ބަޔަކު އަނެއްބައެއްގެ ހައްގުތަކަށް އިހުތިރާމުކުރާ، ސުލްހަވެރި މުޖުތަމައެއް ޤާއިމުކުރައްވަން އެމަނިކުފާނު ބޭނުންފުޅުވާ ކަމަށް ވިދާޅުވެފައެވެ.