ފެނަކައިގެ ކުރީގެ ޕްރޮކިއުމަންޓް ހެޑް ދީނާ ޖަލަށް ލުމަށް ހުކުމްކޮށްފި

ފެނަކައިގެ ޕްރޮކިއުމަންޓް މަސައްކަތެއްގައި ރަސްމީ ހައިސިއްޔަތު ނަހަމަ ގޮތުގައި ބޭނުންކުރިކަން ސާބިތުވެފައިވާ އެ ކުންފުނީގެ ކުރީގެ ޕްރޮކިއުމަންޓް ހެޑް ދީނާގެ މައްޗަށް ކޮރަޕްޝަނުގެ ކުށް ސާބިތުވެ ޖަލަށްލުމަށް ހުކުމްކޮށްފިއެވެ.

ފެނަކައާއި ބްލޭޒަން އިންކް އާ ދެމެދު 2018 ވަނަ އަހަރު ވެވުނު 848,000 ރުފިޔާގެ އެއްބަސްވުމާ އެއްގޮތަށް މަސައްކަތް ކުރިކަން ކަށަވަރު ނުކޮށް، ފެނަކައިން އެ ކުންފުންޏަށް ފައިސާ ދައްކާފައިވާ މައްސަލާގައި، ދީނާއަށް އިއްވީ ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ކުށުގެ ދައުވާއެވެ.

އެ ދައުވާ ސާބިތުވެފައިވާއިރު، ދީނާގެ ފަރާތުން ވަކީލުން އެދުނީ އޭނާގެ ސިއްހީ ހާލަތަށާއި އާއިލީ ހާލަތަށް ރިއާޔަތްކޮށް ޖަލު އަދަބުގެ ބަދަލުގައި ގޭބަންދާއި ޖޫރިމަނާގެ އަދަބެއް ދިނުމަށް އެދިފައެވެ.

ނަމަވެސް، ކްރިމިނަލް ކޯޓުގެ އިސް ގާޒީ އާދަމް މުޙައްމަދު ވިދާޅުވީ ދީނާއަކީ ޖަލު ބަންދުގައި ނުބެހެއްޓޭނެ ފަދަ ސިއްހީ ހާލަތެއް ހުރި މީހެއްކަން އެނގޭނެ ލިޔުމެއް ހުށަހަޅާފައި ނުވާ ކަމަށެވެ.

އަދި އޭނާ ކޮށްފައިވަނީ ޖިނާއީ ބޮޑު ކުށެއް ކަމަށާ، އެ ކުށުގެ އަދަބެއްގެ ގޮތުން އޭނާ، 1 އަހަރާއި 7 މަހާއި 11 ދުވަހުގެ މުއްދަތަށް ޖަލަށްލުމަށް ގާޒީ ވަނީ ހުކުމް ކުރައްވާފައެވެ.

ހަމަ މި މައްސަލައިގައި ފެނަކައިގެ ކުރީގެ މެނޭޖިންގ ޑިރެކްޓަރު އަހުމަދު ސައީދު މުހައްމަދުގެ މައްޗަށް ވެސް، ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ދައުވާ އުފުލާފައިވެއެވެ. ދެ މީހުންގެ މައްޗަށް ދައުވާ އުފުލީ 2024 ވަނަ އަހަރުގެ ޑިސެމްބަރު މަހުއެވެ.

ސައީދުގެ މައްޗަށް ކުށް ސާބިތުވެ، 28 ސެޕްޓެމްބަރު 2025 ގައި އޭނާއަށް ހަތަރު އަހަރުގެ ޖަލު ހުކުމެއް އިއްވާފައިވެއެވެ. ދީނާގެ މައްސަލަ ކޯޓުގައި ދިގުލައިގެން ދިޔައިރު، އޭނާގެ މައްޗަށް ހުކުމް އިއްވާފައިމިވަނީ ސައީދަށް ހުކުމް ކުރިތާ އަހަރަކަށްވުރެ ގިނަ ދުވަސް ފަހުންނެވެ.