އަންނަ އަހަރަށް ދައުލަތުން ލަފާކުރާ ބަޖެޓަށް ބަހުސް ކުރުން ނިންމާލައިފިި

ރައްޔިތުންގެ މަޖިލީހަށް ހުށައަޅާފައިވާ އަންނަ އަހަރަށް ދައުލަތުން ލަފާކުރާ ބަޖެޓަށް ބަހުސް ކުރުން ނިންމާލައިފިިއެވެ.

އަންނަ އަހަރަށް ލަފާކޮށް 49.5 ބިލިއަން ރުފިޔާގެ ބަޖެޓެއް ރައްޔިތުންގެ މަޖިލީހުގެ ތަޅުމަށް ހުށަަހެޅުއްވީ މިމަހުގެ 14 ވަނަ ދުވަހު މިދިޔަ ސަރުކާރުގެ ފިނޭންސް މިނިސްޓަރު އިބްރާހީމް އަމީރެވެ. ބަޖެޓަށް ބަހުސް ކޮށް ދިރާސާ ކުރުމުގެ މަސައްކަތްފަށާފައި ވަނީ މިމަހުގެ 20 ވަނަ ދުވަހު އެވެ.

ބެޖެޓު ދިރާސާ ކުރާ ކޮމިޓީން ނިންމީ ބަހުސްގެ ފުރަތަމަ މަރުހަލާގައި ކޮންމެ މެންބަރަކަށް ވާހަކަ ދެއްކެވުމަށް 15 މިނެޓުގެ ވަގުތެއް ދިނުމަށެވެ. މެންބަރުން ދައްކަވާ ވާހަކަތަކާއި ކުރައްވާ ސުވާލުތަކަށް ޖަވާބުދެއްވުމަށް މާލީ ވަޒީރަށް 45 މިނެޓުގެ ވަގުތެއް ދިނުމަށްވެސް ކޮމިޓީން ފާސްކޮށް، މިސަރުކާރުގެ މާލީ ވަޒީރު މުހައްމަދު ޝަފީޤު ވަނީ މަޖިލީހަށް ވަޑައިގެން މެންބަރުންގެ ބައެއް ސުވާލުތަކަށް ޖަވާބުދެއްވާފައެވެ.

ބަޖެޓު ބަހުސް މަރުހަލާގައި ވާހަކަ ދެއްކެވީ 51 މެންބަރުންނެވެ. އަދި ބަހުސްގައި ޖުމްލަ 12 ގަޑިއިރާއި 23 މިނެޓު ހޭދަވިކަމަށްވެސް މަޖިލީހުގެ ރައީސް މުހައްމަދު އަސްލަމް ވިދާޅުވިއެވެ.

މިއަހަރުގެ ދައުލަތުގެ ބަޖެޓަށް އިތުރުކުރުމަށް ފިނޭންސް މިނިސްޓްރީން 6.5 ބިލިއަން ރުފިޔާ ހުށައެޅުއްވިއެވެ. ބަޖެޓަށް މިއައި ބަދަލާއިއެކު މިއަހަރަށް ފާސްކޮށްފައިވާ 42.8 ބިލިއަން ރުފިޔާގެ ބަޖެޓް ވަނީ 49.3 ބިލިއަން ރުފިޔާއަށް ބޮޑުވެފަ އެވެ.

އަންނަ އަހަރުގެ ބަޖެޓުގައި ޑެފިސިޓާއި ދަރަނި ދެއްކުމަށް ސޮވެރިން ޑިވެލޮޕްމަންޓް ފަންޑު ޓްރާންސްފާ ހިމަނައިގެން ބަޖެޓް ފައިނޭންސް ކުރުމަށް 17.2 ބިލިއަން ރުފިޔާ ހޯދަންޖެހޭކަމަށް ހުށައަޅާފައިވާއިރު، އެފައިސާގެ ތެރެއިން 12.4 ބިލިއަން ހޯދުމަށް ރޭވިފައިވަނީ ބޭރުގެ ފަރާތްތަކުންނެވެ.