ކޮންމެ ދިވެއްސެއްވެސް ބަހާއި ޢަމަލުން، މިއީ އެއްބައިވަންތަ ގައުމެއްކަން ސާބިތުކޮށްދިނުމަށް ރައީސް އެދިވަޑައިގެންފި
ދިވެހި ރާއްޖެއަކީ އެއްބައިވަންތަ ޤައުމެއްކަން ކޮންމެ ދިވެއްސަކުވެސް ބަހާއި ޢަމަލުން ސާބިތުކޮށްދިނުމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު އެދިވަޑައިގެންފިއެވެ.
މިރޭ އޮތް އެއްބައިވަންތަ ކަމުގެ ދުވަހުގެ ރަސްމިީ ޖަލްސާގައި ވާހަކަފުޅު ދައްކަވަމުން އެމަނިކުފާނު ވަނީ ޒަމާންތަކަށް ދިވެހިންގެ ވުޖޫދު ކަށަވަރުކޮށްދީ، އެއްރޫޙެއްގައި އެއް ޢަޒުމެއްގައި ދެމިތިބި ތިބުން ދަމަހައްޓައިދިނުމަށް އެދިވަޑައިގެންފައެވެ.
"ޒަމާންތަކަށް ދިވެހިންގެ ވުޖޫދު ކަށަވަރުކޮށްދެއްވާ! އެއްރޫޙެއްގައި އެއް ޢަޒުމެއްގައި ދެމިތިބި ތިބުން ދަމަހައްޓަވައިދެއްވާ! އެކަމަށް ޓަކައި މިއީ އެއްބައިވަންތަ އެކުވެރި ޤައުމެއްކަން ހަމަ ކޮންމެ ދިވެއްސަކު ބަހާއި ޢަމަލުން ސާބިތުކޮށްދެއްވާ! ދިވެހީންނަށް ޤުދުރަތުން ހަދިޔާކުރައްވާފައިވާ އެއްގޮތްވަންތަ ސިފަތައް އެ ގޮތުގައި ހިފަހައްޓަވައިދެއްވާ! އޭގެ ހިޔަލުގައި ހަމަޖެހުމާއި ކުރިއެރުމާއި ތަރައްޤީގެ މޭވާ ބިންނަން ހުރިހައި ދިވެހީން ތައްޔާރުވަމާ ހިންގަވާ!"
ރައީސް ޑރ.މުއިއްޒު ވިދާޅުވިއެވެ.
މީގެ އިތުރުންވެސް އެމަނިކުފާނުގެ ވާހަކަފުޅުގައި ވަނީ ދިވެހިން އެއްބައިވަންތަވުމުގެ މުހިންމު ކަމުގެ މައްޗަށް އަލި އަޅުއްވާލައްވާފައެވެ. މިގޮތުން އެމަނިކުފާނު ވިދާޅުވީ ދިވެހިން އެއްބައިވަންތަކުރުވީ ދިވެހިންގެ ކިބައިގައި ހުރި އެއްބަހަކުން ބަސްމޮށުމާއި، އެއް ސަގާފަތަކާއި އެއްސޫރައެއްގައި އޮތް އެއްކަހަލަ ރަށްތަކަކުން ދިވެހީންގެ ވެށި ސިފަވެގެން ދިޔުން ކަމަށެވެ.
އެހެންކަމުން މި ނަޞީބާއި ނިޢުމަތްތައް ދަމަހައްޓަންޖެހޭ ކަމަށް ރައީސް ޑރ.މުއިއްޒު ވަނީ ވިދާޅުވެފައެވެ. މިއަދު ދިވެހިރައްޔިތުން އެދެނީ އެކުވެރިކަމާއި ތަރައްޤީ އާއި އަވަސް ކުރި އެރުންކަން ފާހަގަ ކުރައްވަމުން އެމަނިކުފާނު ވިދާޅުވީ ނަޞީބާއި ނިޢުމަތްތައް ދަމަހައްޓަންޖެހޭ ސަބަބަކީ ކާމިޔާބީގެ އަސްލަކީ އެކުވެރިކަންކަމަށައި އެކުވެރިވުމުން އަމާންކަމާއި އިތުބާރު ލިބި، އޭގެ މައްޗަށް ވިޔަފާރިއާއި އެހެނިހެން ކަންކަމުގެ ގުޅުންތައް ހަރުދަނާވެ އުންމަތްތައް ކުރިއަރައިދިޔުމަށް މަގު ފަހިވެގެންދާނެތީ ކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
