ކުރިއެރުމާއި ކާމިޔާބީގެ އަސްލަކީ އެކުވެރިކަން: ރައީސް ޑރ މުއިއްޒު
ކުރިއެރުމާއި ކާމިޔާބީގެ އަސްލަކީ އެކުވެރިކަން ކަމަށް ރައީސް ޑރ މުޙައްމަދު މުއިއްޒު ވިދާޅުވެއްޖެއެވެ.
ރައީސް ޑރ މުއިއްޒު މިހެން ވިދާޅުވީ ޤައުމީ އެއްބައިވަންތަކަމުގެ ދުވަހުގެ މުނާސަބަތުގައި ބޭއްވި ރަސްމީ ޖަލްސާގައި ވާހަލަފުޅު ދައްކަވަމުންނެވެ.
ރައީސް ވިދާޅުވީ އެއްބައިވަންތަ ވެވޭނެ ހުރިހާ ސިފަތަކެއް، މާތް الله ދިވެހީންނަށް ވަދީޢަތްކުރައްވާފައިވާ ކަމަށެވެ. އެއްދީނަކުން ހިދާޔަތް ލިބިފައިވުމުގެ ނަސީބާއި އެއް ބަހަކުން ބަސްމޮށެ އުޅުމުގެ ޝަރަފު ދިވެހިންނަށް ދެއްވައިފައިވާ ކަމަށެވެ.
މީގެ އިތުރުން އެއް އަކުރަކުން ލިޔެކިޔެ އުޅުމުގެ އުފަލާއި، އެއް ސަގާފަތެއް ހިއްސާކުރުމާއި، އެއް ނަސްލަކުން ގުޅިފައި ވުމުގެ އަމާންކަން ލިބިފައިވާ ކަމަށެވެ.
ހަމަ އެހެންމެ، އެއް ސޫރައެއްގައި އޮތް އެއްކަހަލަ ރަށްތަކަކުން ދިވެހީންގެ ވެށި ސިފަވެގެން ދިޔުމުގެ ޒީނަތްތެރިކަންވެސް ދިވެހިންނަށް ވަނީ ދެއްވައި ފައި ކަމަށް ވެސް ރައީސް ވިދާޅުވިއެވެ.
“ދިވެހީން އެއްބައިވަންތަކުރުވީ މި އެއްގޮތްވަންތަކަން. މީ އެއް ޤައުމެއް. އެއް ބައެއް. އެހެންކަމުން، މި ނަސީބާއި ނިޢުމަތްތައް ދަމަހައްޓަންޖެހޭ. އެހެނީ، ކުރިއެރުމާއި ކާމިޔާބީގެ އަސްލަކީ އެކުވެރިކަން. އެކުވެރިވުމުން އަމާންކަން ލިބިދޭ”
ރައީސް ޑރ މުޙައްމަދު މުޢިއްޒު
ރައީސް ވިދާޅުވީ އެކުވެެރިވުމުން އިތުބާރު ލިބިދޭ ކަމަށާއި އޭގެ މައްޗަށް ވިޔަފާރިއާއި އެހެނިހެން ކަންކަމުގެ ގުޅުންތައްވެސް ހަރުދަނާވެގެން ދާނެ ކަމަށެވެ.
ހަމަމިއާއި އެކު އުންމަތްތައް ކުރިއަރައިގެންދާ ކަމަށާއި މިއަދު ދިވެހިރައްޔިތުން އެދެނީ އެކުވެރިކަމާއި ތަރައްޤީއަށް ކަމަށާއި އަވަސް ކުރިއެރުންތަކަށްކަމަށް ރައީސް ވިދާޅުވިއެވެ.
އެއްބައިވަންތަ ކަމުގެ ދުވަހުގެ މުނާސާބަތުިގައި ދިވެހިބަހާއި ސަޤާފަތާއި ތަރިކައާއި ބެހޭ ވުޒާރާއިން ބޭއްވި ޖަލްސާގައި ރައީސްގެ ދެކަނބަލުންނާއި ދައުލަތުގެ ވަޒީރުންނާއި ދައުލަތަށް ގިނަ ދުބަހު ޚިދްމަތް ކޮށްދެއްވި ގިނަ ބޭފުޅުންތަކެއް ވަނީ ބައިވެރިވެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
