ބަޔަކަށް ރަނގަޅުވާ ކޮންމެ ގޮތަކީ އަދި ހައްގު ގޮތަށް ނުވެދާނެ: އިމްރާން

އެމްޑީޕީ ރިޔާސީ ޕްރައިމަރީގެ ވޯޓާއި ގުޅިގެން އަދާލަތު ޕާޓީގެ ރައީސް އަދި މި ސަރުކާރުގެ ހޯމް މިނިސްޓަރު އިމްރާނު މާނަފުން ޓްވީޓެއް ހިއްސާ ކުރައްވައިފިއެވެ.

އިމްރާނު ވިދާޅުވީ ބަޔަކަށް އެއީ ރަނގަޅުކަމެއް ކަމަށް ހީވާ ކޮންމެ ގޮތަކީ އަދި ހައްގު ގޮތަށް ނުވެދާނެކަމަށެވެ. އަދި ބަޔަކަށް ރަނގަޅު ވިޔަސް ނުވިޔަސް ހައްގު ވާނީ ހައްގަށް ކަމަށެވެ.

އެއީ ސީދާ ކަނޑައެޅިގެން ކޮން ކަމަކަށް އިޝާރާތް ކުރައްވާ ހިއްސާކުރެއްވި ބަސްކޮޅެއްކަމެއް އިމްރާނު ފާހަގަކުރައްވާފައެއް ނުވެއެވެ.

އެހެން ނަމަވެސް ގަބޫލު ކުރެވޭގޮތުގައި އެއީ އެމްޑީޕީގެ ރިޔާސީ ޕްރައިމަރީއާއި ގުޅިގެން ހިއްސާކުރެއްވި ވާހަކަފުޅެވެ.

މި އިންތިޚާބުގައި އަދާލަތު ޕާޓީއާއި ޕާޓީގެ ދީނީ އިލްމުވެރިން ގެންދަވަނީ ރައީސް ޞާލިހަށް ތާއީދުކުރައްވާ އެމަނިކުފާނަށް ކެމްޕޭނު ކުރައްވަމުންނެވެ. އަދި ރައީސް ޞާލިހަށް ހުޝާމަދު ކުރައްވާ އެމަނިކުފާނަށް ދެވަނަ ދައުރެއް ދެއްވަން ޖެހޭކަމަށް ވަކާލާތު ކުރައްވަމުންނެވެ.

އެމްޑީޕީގެ ރިޔާސީ ޕްރައިމަރީގައި ޕާޓީގެ ދެ ރައީސުންވެސް ވާދަކުރައްވާއިރު، ފެންނަ މަންޒަރުތަކަށް ބަލާއިރު، ތާއީދު ބޮޑީ ކޮން ބޭފުޅަކަށްކަން ދަންނަވާކަށް ނޭނގެއެވެ.

ދެ ރައީސުންވެސް ވިދާޅުވަނީ އިންތިޚާބު ކާމިޔާބު ކުރާނެކަމުގެ ޔަގީންކަން އޮތްކަމަށެވެ.

ޕާޓީގެ ކުރިމަގާއި މެދު ދެ ރައީސުންގެ ވިސްނުންފުޅު ތަފާތުއިރު، ރައީސް އިބްރާހިމް މުހައްމަދު ޞާލިހު ވިދާޅުވަނީ އެމްޑީޕީއަށް ވެރިކަމުގައި ދެމިއޮވެވޭނީ ކޯލިޝަނާއި އެކުގައި ކަމަށެވެ.

އެމަނިކުފާނުގެ ކިބައިގައި މަޝްވަރާކުރުމާއި ގުޅިގެން މަސައްކަތްކުރުމުގެ ސިފަ ހުންނަކަން ފާހަގަކުރައްވާ އަދާލަތުގެ ދީނީ އިލްމުވެރިން ފާހަގަކުރައްވައެވެ.

އެހެންކަމުން އިމްރާނު އެ އިޝާރާތްކުރައްވާ ހައްގު ގޮތަކީ ރައީސް ޞާލިހަށް ވޯޓުދީ އިންތިޚާބު އެމަނިކުފާނަށް ކާމިޔާބުކޮށްދިނުން ކަމަށް ބެލެވެއެވެ.