ރާއްޖޭގެ މެދު ފަންތިން ދަށް އެއްކޮށް ފަގީރު ވެއްޖެ: އިބްރާހިމް ރަޝީދު

ދިވެހިރާއްޖޭގައި ދިރިއުޅޭ މެދު ފަންތިން ފެށިގެން އޭގެ ދަށަށް ތިބި ހުރިހާ ރައްޔިތުން މި ސަރުކާރު އައިފަހުން ފަޤީރުވެފައިވާ ކަމަށް ރައްޔިތުންގެ މަޖިލީހުގެ މާފަންނު މެދު ދާއިރާގެ މެންބަރު އިބްރާހީމް ރަޝީދު (ބޮންޑާ) ވިދާޅުވެއްޖެ އެވެ.

ބޮންޑާ މިފަދައިން ވިދާޅުވެފައިވަނީ ދަރަނި ރީސްޓްރަކްޗާ ކުރުމަށް މަޖިލީހުން އެރުވި ލަފަޔާއި އެއްގޮތަށް ކަންކަން ކުރުމަށް ސަރުކާރަށް ގޮވާލާ މަޖިލީހުގެ ނައިބު ރައީސް އީވާ އަބްދުالله ހުށައެޅުއްވި ޤަރާރަަށް ބަހުސް ކުރައްވަމުން ނެވެ.

ބޮންޑާ ވިދާޅުވީ މި ސަރުކާރުން ދަރަނި ނަގަމުން ގަނަމުންގޮސް، ސަރުކާރުގެ ހުރި ހުރިހާ ހަރު މުދަލެއް ރަހުނުކޮށްފައިވާ ކަމަށެވެ. އަދި މިހާރު ދަރަނި ނަގަން އިތުރަށް ރަހުނު ކުރާނެ އެއްޗެއް ނެތް ހިސާބަށް ކަންކަން ގެންގޮސްފައިވާކަމަށެވެ.

"މިހާރު ސުކޫލުތަކާ، އެހެން ހުރިއްޔާ ހުރިހާ ތަނެއް އަޅުގަނޑަކަށް ނޭނގޭ ރައްޔިތުންގެ މަޖިލިސްވެސް މޯގޭޖު ނުކުރާކަމެއް، ސަރުކާރުގެ ހުރިހާ ކުންފުންޏެއްގެ ދަށުގައި ހުރި ހުރިހާއެއްޗެއް ރަހުނު ކުރެވިއްޖެ. އެޗްޑީސީގެ ދަށުގައި އޮތް ހުޅުމާލެ އެއްކޮށް ރަހުނު ކުރެވިއްޖެ. ބަނދަރުތައް ރަހުނު ކުރެވިއްޖެ. ކޯއްޗެއްތޯ ބާކީ އޮތީ؟ ދެން ރަހުނު ކުރާނެ އެއްޗެއް ނެތިއްޔާ ދެން ކިހެނެއްތޯ ހަދާނީ؟ އަޅުގަނޑުމެން ކުރިމަތީ ލަންކާއަށް ގޮތެއް ވެގެން ދިޔައީ"

މާފަންނު މެދު ދާއިރާގެ މެންބަރު އިބްރާހީމް ރަޝީދު (ބޮންޑާ)

ބޮންޑާ ވިދާޅުވީ ދަރަނި ދެއްކޭނެ ގޮތެއް ނުހޯދާ ދަރަނި ނަގަމުން ދިއުމުގެ އަސަރު ރާއްޖޭގެ ރައްޔިތުންގެ ދިރިއުޅުމުން ފެންނަމުންދާ ކަމަށެވެ. އެމްޑީޕީ ވެރިކަމަށް އައިރު މެދު ފަންތީގެ ރައްޔިތުންގެ ޖީބުތަކުގައި ފައިސާ ހުރި ކަމަށާއި، އެ ފަރާތްތައް ވިިޔަފާރިތއް ކުރަމުން ދިޔަކަމަށް އޭނާ ވިދާޅުވިއެވެ.

އެހެން ނަމަވެސް ސަރުކާރުގެ ސިޔާސަތެއް ނެތުމުގެ ސަބަބުން، މިއަދު މެދުފަންތީގެ ވިޔަފާރިތައް ފުނޑިފައިވާ ކަމަށާއި، ދެފު ފަންތިން ފެށިގެން ދަށަށް ތިބި ރައްޔިތުން ފަޤީރުވެފައި ވާކަމަށް ބޮންޑާ ވިދާޅުވި އެވެ.

"މެދުފަންތިން ފެށިގެން ތިރި އެއްކޮށް ފަގީރުވެއްޖެ. ކުރީގައި އަޅުގަނޑުމެން ވެރިކަމަށް އައިރު މެދުފަންތީގައި ފައިސާ ހުރި. ވިޔަފާރި ކުރަމުން ދިޔަ ފިހާރަތަކުގައި. ކޮންމެވެސް ވަރަކަށް ދަތިތަކެއް ހުރި ނަމަވެސް. އެހެން ނަމަވެސް މިހާރު މެދުފަންތިން ތިރި އެއްކޮށް ފަގީރުވެއްޖެ"

މާފަންނު މެދު ދާއިރާގެ މެންބަރު އިބްރާހީމް ރަޝީދު (ބޮންޑާ)

ދައުލަތުގެ ދަރަނިން ރައްޔިތުން ސަލާމަތް ކުރުމަކީ އެމްޑީޕީން ވެފައިވާ ވައުދެއްކަން ބޮންޑާ ހަނދާންކޮށްދެއްވި އެވެ. އެގޮތުން ލޯނު ރީސްޓްރަކްޗާ ކުރުމަކީ އެމްޑީޕީއިން ލިޔެފައިވާ ވައުދެއް ކަމަށާއި، އެހެން ނަމަވެސް މިއަދު އެ ވައުދު ފުއްދަމުން ނުދާކަމަށް އޭނާ ވިދާޅުވިއެވެ.

ސަރުކާރަށް ގިނަ ފާޑުކިޔުންތަކެއް އަމާޒުކުރައްވާ ބޮންޑާ އިތުރަށް ވިދާޅުވީ ސަރުކާރުގެ ޚަރަދު ބަލަހައްޓަން މި ހާލަތުގައިވެސް ރައްޔިތުން އަތުން ނަގާ ޓެކްސް ބޮޑު ކުރެވިދާނެ ކަމަށެވެ. އަދި އެ ޓެކްސް ބޮޑުކޮށްގެން މަޖިލީސް މެމްބަރުންނަށް ބޮޑެތި މުސާރަތައްވެސް ދެވިދާނެ ކަމަށެވެ.

އެހެން ނަމަވެސް އޭގެ ހުރިހާ ތަކުލީފެއް އުފުލަން ޖެހޭނީ ހަމަ ރައްޔިތުންނަށް ކަމަށް ބޮންޑާގެ ވާހަކައިގައި ވަނީ ފާހަގަކުރައްވާފަ އެވެ. އޭގެ އިތުރުން، އެމްޑީޕީން ވައުދުވި ގޮތަށް ދަރަނި ރީސްޓްރަކްޗާ ކުރުމަށް ބޮންޑާ ސަރުކާރަށް ގޮވާލެއްވި އެވެ.