ނެޝަނަލް މެންޓަލް ހެލްތު ސެންޓަރުން 4 އަހަރު ތެރޭ 30000 މީހުންނަށް ފަރުވާދިފި

އައި.ޖީ.އެމް.އެޗްގައި ޤާއިމްކުރެވިފައިވާ ނެޝަނަލް ސެންޓަރ ފޯ މެންޓަލް ހެލްތު (މެންޓަލް ހެލްތު ސެންޓަރުން) 2019 ވަނަ އަހަރުން ފެށިގެން މިއަހަރުގެ ފެބުރުއަރީމަހުގެ ނިޔަލަށް 30000 އަށް ވުރެ ގިނަ މީހުންނަށް ފަރުވާދެވިފައިވާކަމަށް އެ ސެންޓަރުން ހާމަކޮށްފިއެވެ.

ނޭޝަނަލް ސެންޓަރ ފޮރ މެންޓަލް ހެލްތް، އައި.ޖީ.އެމް.އެޗް އަށް 4 އަހަރު ފުރުންު ފާހަގަ ކުރާއިރު ބަލިމީހުންނާއި އާއިލާތަކަށް ޓާރޝަރީ ފެންވަރެއްގައި ދަނީ ހިދުމަތް ދެވެމުންނެވެ. ފާއިތުވެ ދިޔަ އަހަރުތަކުގައި އެން.ސީ.އެމް.އެޗް އިން ވަރަށް ގިނަ އަދަދެއްގެ ފަރާތްތަކަށް އެވިޑެންސް ބޭސްޑް ކޮލިޓީ ކެއަރ އާއި މަލްޓިޑިސިޕްލިނަރީ ސާރވިސްތައް ފޯރު ކޮށްދެވިފައިވެއެވެ.

25 މާރިޗް 2019 ވަނަ ދުވަހު ހުޅުވުނު މި ސެންޓަރަކީ ޓާރޝަރީ ފެންވަރުގައި ވަށާޖެހޭ ހިދުމަތްތައް ފޯރުކޮށްދެވޭ ނަފްސާނީ ބަލިތަކުގެ ފަރުވާއަށް ހާއްސަ ކުރެވިގެން ރާއްޖޭގައި ހުޅުވުނު ހަމައެކަނި ސެންޓަރެވެ.

މަދު އަދަދެއްގެ ސިއްހީ މާހިރުންނާއިއެކު ފެށި އެ ސެންޓަރުގައި އައި.ޖީ.އެމް.އެޗް އަށް ވަޑައިގަންނަވާ ބަލި މީހުންގެ އިތުރަށް ރަށްރަށުގެ ސިއްޙީ މަރުކަޒުތަކުންނާއި އަތޮޅު ހޮސްޕިޓަލްތަކުން ރިފަރ ކުރާ ކޭސްތައްވެސް ބައްލަވަމުންދެއެވެ.

އެން.ސީ.އެމް.އެޗް އިން ފުރަތަމަ އަހަރު (2019) ގައި މުޅި ޖުމްލަ 7246 ކޮންސަލްޓޭޝަން ކުރިއަށް ދިއައެވެ. ފާއިތުވި 3 އަހަރު ޓީމް އިތުރަށް ވަރުގަދަވެ އިތުރު ޑިމާންޑާއި އެއްވަރަށް ހިދުމަތްތައް ފޯރުކޮށްދިނުމުގެ މަސައްކަތް އަންނަނީ ކުރަމުންނެވެ. މިގޮތުން އަހަރަކު ގާތްގަނޑަކަށް 86117 ކޮންސަލްޓޭޝަން ކުރިއަށްދާކަން ފާހަގަކުރަމެވެ. 2019 ވަނަ އަހަރުން ފެށިގެން މިހިނގާ އަހަރުގެ ފެބްރުއަރީ މަހުގެ ނިޔަލަށް މުޅިޖުމްލަ 38963 ކޮންސަލްޓޭޝަން ކުރެވިފައިވާކަން ފާހަގަކުރަމެވެ.

މެންޓަލް ހެލްތު ސެންޓަރުން ހާމަކޮށްފައިވާ ގޮތުގައި ކޯވިޑް-19 އާއި ގުޅިގެން ނަފްސާނީ ބަލީގެ ހާލަތަށް ބޮޑެތި ބަދަލުތަކެއް އައިސްފައިވާކަން ވަނީ ދެނެގަނެވިފައެވެ. އަދި އެ އައި ބަދަލުތަކާއެކު ހިދުމަތްހޯއްދަވާ ފަރާތްތައް އިތުރުވުމާއި ގުޅިގެން ސެންޓަރުގެ ހިންގުމާއި ހިދުމަތްތަކަށްވެސް ބަދަލުތަކެއް ގެނެވުނެވެ.

އެގޮތުން ޓެލެ-މެންޓަލް ސާރވިސަސް ގާއިމުކުރުން، ޓްރައޭޖް އަދި ސްކްރީން ކުރާނެ މަރުހަލާ ތަކެއް ކަނޑައެޅުން، ފަންނީ މުވައްޒަފުން އިތުރުކުރުން އަދި ޓްރެއިނިންގ ތަކާއި ކްލިނިކަލް ސުޕަވިޒަން ކުރުން ފަދަ ކަންކަމުން އެ ސެންޓަރުން ދެވޭ ހިދުމަތްތައް އިތުރަށް ފުޅާވެގެންދިޔައެވެ.

އެކަމުގެ ސަބަބުން ނަފްސާނީ ބަލިމީހުންނަށް ހިދުމަތްނުލިބި ކިއުގައި މަޑުކުރަން ޖެހޭ މުއްދަތު ކުޑަވެގެން ދެއެވެ. 2021 ވަނަ އަހަރު 16-18 މަހާއި ދެމެދުގެ މުއްދަތަކަށް ނަފްސާނީ ބަލިތަކުގެ ހާއްސަ ޑޮކްޓަރަކަށް ދެއްކުމަށް މަޑުކުރަން ޖެހުނު ނަމަވެސް މިހާރު އެ މުއްދަތު 3-2 މަހަށް ކުޑަކުރެވިފައިވާކަން އެ ސެންޓަރުން ވަނީ ފާހަގަކޮށްފަ އެވެ.

އޭގެ އިތުރުން އެންޒައިޓީ އަދި ޑިޕްރެޝަން ހުންނަ ބަލިމީހުންނަށް ގްރޫޕް ތެރަޕީ ފޯރުކޮށްދިނުމާއި، ނަފްސާނީ ބަލި ތަހައްމަލުކުރާ ފަރާތްތަކުގެ އާއިލާތަކަށް އަމާޒުކޮށްގެން ހިނގާ ކެއާރާ ސަޕޯޓް ގުރޫޕް ، އެޗް.ޕީ.އެސް.އެން އަށް ޒިޔާރަތްކޮށްގެން ހިނގާ އައުޓް ރީޗް ޕްރޮގްރާމް، އަދި ކަމާގުޅުންހުރި މުއައްސަސާތަކާއި އެހެނިހެން ފަރާތްތަކަށް ޓްރެއިނިން ދިނުން ފަދަ ކަންކަމީ އެ ސެންޓަރުން އިސްކަން ދީގެން ކުރަމުން އަންނަކަންކަމެވެ.

ނަފްސާނީ ދުޅަހެޔޮކަން ތަރައްގީކުރުމުގެ މަސައްކަތް ކުރާތާ 4 އަހަރުވުން ފާހަގަކުރަމުން އެ ސެންޓަރުން ބުނީ ނަފްސާނީ ބަލި ތަހައްމަލުކުރާ ފަރާތްތަކާއި އެފަރާތްތަކުގެ އާއިލާތަކަށް ބޭނުންވާ ހިދުމަތްތައް ހަރުދަނާކޮށް ފުޅާކުރުމުގެ ގޮތުން، އެން.ސީ.އެމް.އެޗް ގެ އިތުރުން ނަފްސާނީ ހިދުމަތްތައް ފޯރުކޮށްދޭ މަރުކަޒުތައް ސަރަހައްދީ ފެންވަރުގައި ގގާއިމުކޮށް، ޕްރްއިމެރީ ހެލްތް ކެއާގެ ހިދުމަތްތަކުގެ ތެރޭގައި ނަފްސާނީ ހިދުމަތްތައް އެކުލަވާލުމަކީ ޚާއްސަ އަހަންމިއްޔަތުތަމެއް ދީގެން ކުރުން މުހިންމު ކަމެއް ކަމަށެވެ.