އެމްޑީޕީ ޕްރައިމަރީއާއި ގުޅިގެން ހުށައެޅި މައްސަލަ ލަސްވާތީ ކަންބޮޑުވުން ފާޅުކޮށްފި

މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ރިޔާސީ ޕްރައިމަރީ އަލުން ބޭއްވުމަށް އެދި ސިވިލް ކޯޓަށް ހުށައެޅި މައްސަލައިގެ ޝަރީއަތް ލިގުލައިގެންދާތީ ކުރީގެ ބަންޑާރަނައިބު ދިޔާނާ ސައީދު ކަންބޮޑުވުން ފާޅުކުރައްވައިފި އެވެ.

އެމްޑީޕީގެ ޕްރައިމަރީއާއި ގުޅޭގޮތުން ސިވިލް ކޯޓަށް ހުށައެޅި 3 މައްސަލައިގެ ތެރެއިން އެ ކޯޓުން ބަލައިގެންފައިވަނީ  އަލީ އަމްޖަދު ކިިޔާ މީހަކު ހުށަހެޅި މައްސަލައެކެވެ. އެ މައްސަލަ ބަލައިގެންފައިވަނީ ފެބުރުއަރީ މަހުގެ 21 ގައެވެ.

އެ މައްސަލައިގެ އަޑުއެހުން ފަށާފައިވާއިރު، އެއީ ސިވިލް ކޯޓަށް ބެލިދާނެ މައްސަލައެއްކަމާމެދު އެމްޑީޕީން  ބުނަމުންދާތީ ޕްރައިމަރީއަށް އަމަލުކުރުން ފަސްކުރުމުގެ ވަގުތީ އަމުރުގެ ކުރިއަށް، އިހުތިސޯސްގެ ބަހުސް ކުރިއަށް ގެންދަން ކޯޓުން ވަނީ ނިންމާފަ އެވެ.

އެގޮތުން އެ މައްސަލައިގައި މިއަދު އޮތް އަޑުއެހުމަށް އެމްޑީޕީގެ ފަރާތުން އެއް ވަކީލަކަށް ހާޒިރުނުވެވޭތީ އެހެން ދުވަހަކަށް ފަސްކޮށްދިނުމަށް އެދުމުން އެކަމާ މެދު މައްސަލަ ހުށަހެޅި ފަރާތުން އިއުތިރާޒު ނުކުރާތީ މާދަމާ ހެނދުނު 11:30 އަށް އަޑުއެހުމެއް ބާއްވާ ގޮތަށް ތާވަލުކޮށް މިއަދުގެ އަޑުއެހުން ވަނީ ކުރުކޮށްލާފަ އެވެ.

އެކަމާ ހިތްޕުޅު ހަމަޖެހިވަޑައިނުގެން ދިޔާނާ ކުރެއްވި ޓްވީޓެއްގައި ވިދާޅުވީ އެމްޑީޕީގެ ވަކީލުންނަށް ގެއްލުންވާ ގޮތަށް އަޑުއެހުން ގެންދިޔައީ ކަމަށް ބުނުމުގެ ފުރުސަތު ދޭން ބޭނުން ނުވާކަމަށެވެ. އަދި އެ މައްސަލައިގައި އެމްޑީޕީގެ މުޅި ގާނޫނީ ޓީމާއި ދެކޮޅަށް ވަކާލާތުކުރައްވަން ތައްޔާރަށް ހުންނެވިކަމަށް ދިޔާނާ ވިދާޅުވި އެވެ.

އެހެން ނަމަވެސް އެފަދައިން ކަންކަން ކުރުމުގެ ސަބަބުން ޝަރީއަތް ދިގުލައިގެން ދިއުމަކީ ކަންބޮޑުވާކަމެއްކަމަށް ދިޔާނާ ވަނީ ވިދާޅުވެފަ އެވެ.

އެމްޑީޕީގެ ޕްރައިމަރީ އަލުން ބޭއްވުމަށް އެދި އަލީ އަމްޖަދު ހުށައަޅާފައިވާ މައްސަލައިގައި ބުނެފައިވަނީ  ރައީސް އިބްރާހީމް މުހައްމަދު ސޯލިހު ކާމިޔާބު ކުރެއްވި ކަމަށް ދައްކާ ނަތީޖާއަށް އަމަލުކުރުން ފަސްކުރަން އެމްޑީޕީގެ މައްޗަށް އަމުރުކޮށްދިނުމަށް އެދޭކަމަށެވެ.

އެމްޑީީޕީގެ ޕްރައިމަރީ އަލުން ބާއްވާދިނުމަށް އެދި ސވިލް ކޯޓަށް ހުށައެޅި މައްސަލައިގައި ވަނީ އެ ޕްރައިމަރީ ބާތިލުކުރަން އެދުނީ އެ އިންތިހާބު ބާއްވާފައިވަނީ ޕާޓީން ވަކިކުރި މެންބަރުންގެ ހައްގުތައް ގެއްލޭ ގޮތަށް ކަމަށް ބުނެފައެވެ.

އެގޮތުން އެމްޑީޕީގެ އަސާސީ ގަވާއިދު ބުނާ ގޮތުން ޕާޓީގެ މެންބަރުކަމުން މީހަކު ވަކިކުރުމަކީ ޕާޓީން އަޅާ ފިޔަވަޅެއްކަމަށްވާއިރު، ގައުމީ މަޖިލީހުން ނިންމައިގެން 39،000 މެންބަރުން ވަކިކޮށްފައިވަނީ ފިޔަވަޅު އެޅުމުގައި އަމަލުކުރަންޖެހޭ އިޖުރާއާތުތަކާ ހިލާފަށްކަން ފާހަގަކޮށްފައި ވެއެވެ.

އިންތިހާބު ބާއްވާފައިވަނީ ވަކިކުރި މެންބަރުންގެ ހައްގުތައް ގެއްލޭ ގޮތަށް ކަމުގައިވާތީ އެ މެންބަރުންނަށް ބައިވެރިވެވޭ ގޮތަށް އަލުން އިންތިހާބު ބޭއްވުމަށް އެމްޑީޕީގެ މައްޗަށް އަމުރުކޮށްދިނުމަށް މައްސަލަ ހުށައެޅި ފަރާތުން ވަނީ އެދިފައެވެ.

އެމްޑީޕީގެ ޕްރައިމަރީގައި ޕާޓީގެ ދެ ރައީސުން ވާދަކުރައްވާފައިވާއިރު، ފޯރިގަދަ ކެމްޕޭނަކަށްފަހު ތަފާތު ބޮޑުކޮށް ރައީސް ޞާލިހުވަނީ އިންތިޚާބު ކާމިޔާބުކުރައްވާފަ އެވެ. އެ އިންތިޚާބުގައި އެމަނިކުފާނަށް ވޯޓުލީ މީހުންގެ 61 އިންސައްތަ ލިބިލެއްވިއިރު، އިންތިޚާބުގައި އެމަނިކުފާނާއި ވާދަކުރެއްވި މަޖިލީހުގެ ރައީސް މުހައްމަދު ނަޝީދަށް ލިބިލެއްވީ ވޯޓުލީ މީހުންގެ 39 އިންސައްތައެވެ.

އެ އިންތިޚާބަށްފަހު ނަޝީދު ގެންދަވަނީ ޕާޓީގެ ތެރެއިން "ފިކުރެއްގެ ދިރުން" ނަމުގައި ގޮތްޕެއް ރަޖިސްޓްރީކޮށް، އެމަނިކުފާނަށް އޮތް ތާއީދު އިތުރުކުރުމަށް މަސައްކަތްޕުޅު ކުރައްވަމުންނެވެ.