ރަލުގެ ވާހަކަ ދައްކަން ނުކެރެނީ ރާބޯމީހުން މަޖިލީހުގައި ގިނަވީމަތޯ؟: ނަޝީދު
ރައްޔިތުންގެ މަޖިލީހުގައި ރަލުގެ ވާހަކަ ދައްކަން މެންބަރުންނަށް ނުކެރެނީ މަޖިލީހުގައި ރާބޯ މީހުން ގިނަ ވުމުންތޯ ނޮޅިވަރަމް ދާއިރާގެ މެންބަރު މުހައްމަދު ނަޝީދު އަބްދުالله (މޮސްޓާ) ސުވާލު ކުރައްވައިފިއެވެ.
މޮސްޓާ މިފަދައިން ސުވާލު އުފައްދަވާފައި ވަނީ ހެންވޭރު ހުޅަނގު ދާއިރާގެ މެންބަރު ޙަސަން ލަޠީފް ހުށަހަޅުއްވާފައިވާ، މަސްތުވާތަކެއްޗަށް ދެވިހިފާފައިވާ މީހުންނަށް ފަސޭހައިން ފަރުވާ ލިބޭނޭގޮތަށް ނިޒާމު ބަދަލުކުރުމަށް ސަރުކާރަށް ގޮވާލައި ހުށަހަޅާ ޤަރާރުގެ ބަހުސްގައި ވާހަކަދައްކަވަމުންނެވެ.
އެ ގަރާރުގައި ބާރުގަދަ މަސްތުވާތަކެތީގެ ވާހަކަ ވާކަމަށް އިޝާރާތް ކުރައްވައި މޮސްޓާ ވިދާޅުވީ ރާއްޖޭގައި އަބަދުވެސް ވާހަކަ ދައްކަނީ ބާރުގަދަ މަސްތުވާތަކެތީގެ ވާހަކަ ކަމަށެވެ. އަދި ބާރު ގަދަ ވިޔަސް ކުޑަ ވިޔަސް މަސްތުވާތަކެތި ވާނީ މަސްތުވާތަކެތި ކަމަށް މޮސްޓާ ވިދާޅުވި އެވެ.
ދިވެހިރާއްޖޭގައި އެބައިން 10 އަށްވުރެ ގިނަ ބޮންޑެޑް ވެއަރ ހައުސް. ރާ އެތެރެ ކުރާ މީހުން. މި މީހުންނަނީ އޮނަރަބަލް މީހުންނަށްވެފައި، ރާއްޖޭގައި މަގުމަތީ ރަބަރު ޕެކެޓް ވިއްކަން އުޅޭ މީހުން ގުންޑާއިންނަށް.. ހަމަ ދެ ބައިމީހުންވެސް ވިއްކަނީ މަސްތުވާއެއްޗެހި. އެއްބަޔަކު ގުންޑާއިންނަށް އަނެއް ބަޔަކު އޮނަރަބަލް އިންނަށް. އެއީ ދިވެހި ރާއްޖެއަށް ޚިދުމަތް ކުރާ މީހުންނަށް. ޓެކްސް ދައްކާ މީހުންނަށް. ހަރާމް އެއްޗެއް ހަމަ ހަރާމް ކަމަށް ވާނީ ކޮންމެ ބަޔަކު ވިއްކިޔަސް.
މެންބަރު މުހައްމަދު ނަޝީދު އަބްދުالله (މޮސްޓާ)
މޮސްޓާ ވިދާޅުވީ ވަކި ވައްތަރެއްގެ މަސްތުވާއެއްޗެއް ހަލާލް ކޮށްފައި ވަޖި ވައްތަރެއްގެ މަސްތުވާއެއްޗެއް ހުއްދަ ކުރަން އުޅޭތަން ރައްޔިތުންގެ މަޖިލީހުގެ ތެރެއިންނާއި ދިވެހި ދައުލަތުގެ ތެރެއިންނާއި ރައްޔިތުންގެ ތެރެއިންވެސް ފެންނަމުންދާ ކަމަށެވެ.
ރަލުގެ ވާހަކަ މިތަނުގައި އެއްވެސް މީހަކަށް ދައްކަން ނުކެރޭ. އެކީއްވެގެންތޯ؟ ރާބޯ މީހުން މިތަނުގައި ގިނަ ވީމަ ވާ ގޮތެއްތޯ؟ ރޭގަނޑު ނުވައެއްގެ ފަހުން ކޮޅަށް ނުތިބެވޭ މީހުން ގިނަ ވީމަ ވާގޮތެއް ތޯއޭ ރާބޮއިގެން އެވާހަކަ ދައްކަން މިތާނގައި މި ނުކެރެނީ. ވަކި ބައެއް ކުރާ ކަންތައް ތަކެއްގެ ވާހަކަ. ހަމަ ރާ ވެސް ހަރާމޭ.
މެންބަރު މުހައްމަދު ނަޝީދު އަބްދުالله (މޮސްޓާ)
މޮސްޓާ އިތުރަށް ވިދާޅުވީ، ރާއްޖޭގައި އެންމެ ގިނަ ޖަރީމާތައް ހިންގާފައި ހުރީ ރާ ބޮއިގެން ކަމަށާ، އެހެން ނަމަވެސް އެކަން ހުއްޓުވައި އެކަމަށް ފިޔަވަޅު އަޅަން މަޖިލީހުން ވެސް މަސައްކަތް ކޮށްފައި ނުވާ ކަމަށެވެ. އެހެންނަމަވެސް އެކަންކަންވެސް ހުއްޓުވަން ޖެހޭ ކަމަށް މޮސްޓާ ވިދާޅުވި އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
