ފެނަކަ، ޕީއެސްއެމް އަދި ވެމްކޯއިން ކޯޕަރޭޓް ގަވަނަންސް ކޯޑަށް އަަމަލުކުރަން ފަށައިފި: އަމީރު
ފެނަކަ އާއި ޕީއެސްއެމް އަދި ވެމްކޯއިން ކޯޕަރޭޓް ގަވާނަންސް ކޯޑަށް އަމަލުކުރަމުން ފަށާފައިވާ ކަމަށް ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެއެވެ.
މިއަދުގެ ރައްޔިތުންގެ މަޖިލީހުގެ ޖަލްސާގައި ވަނީ މާފަންނު މެދު ދާއިރާގެ މެމްބަރު އިބްރާހިމް ރަޝީދު (ބޮންޑޭ)، މިނިސްޓަރު އަމީރަށް ލިއުމުން ހުށަހެޅުއްވި ސުވާލަކަށް ލިއުމުން ދެއްވި ޖަވާބު އިއްވާފައެވެ.
އެގޮތުން ބޮންޑެ ކުރެއްވި ސުވާލުގައި ވަނީ، ފިނޭންސް މިނިސްޓްރީ އާއި ޕްރައިވަޓައިޒޭޝަން ބޯޑުން ކުންފުނިތަކަށް ފޮނުވާފައިވާ ސާކިއުލާތަކާއި އަދި ސަރުކާރު ހިއްސާވާ ކުންފުނިތަކަށް ހާއްސަކޮށް ތައްޔާރުކޮށްފައިވާ ކޯޕަރޭޓް ގަވާނަންސް ކޯޑަށް އަމަލުކުރަމުންނުދާ ކުންފުނިތަކުގެ ހިންގުމާ ހަވާލުވެ ތިއްބެވި ފަރާތްތަކާ މެދު ޕްރައިވަޓައިޒޭޝަން ބޯޑުން ނުވަތަ ފިނޭންސް މިނިސްޓްރީން މިހާތަނަށް އެއްވެސް އިންޒާރެއްދީ އެންގުމެއް އަންގާ އަދި ފިޔަވަޅެއް އަޅާފައިވޭތޯ އާއި އަޅާފައި ވާނަމަ އެކަމުގެ ތަފްސީލް ހާމަކޮށްދެއްވުމަށް އެދިފައެވެ.
އެ ސުވާލަށް މިނިސްޓަރު އަމީރު ލިޔުމުން ދެއްވި ޖަވާބުގައި ވިދާޅުވީ ކޯޕަރޭޓް ގަވާނަންސް ކޯޑުގައި ބުނާ ކަންތައްތަކަށް ގުޅޭ ގޮތުން ފިނޭންސް މިނިސްޓްރީއާއި، ކުންފުނިތަކާއި އަދި ޕްރައިވަޓައިޒޭޝަން ބޯޑާ އަބަދުވެސް ބައްދަލުކުރަމުންދާ ކަމަށެވެ.
އަދި މި އަހަރު އަލަށް އައްޔަނުކުރެވުނު ބޯޑު މެމްބަރުންނަށް ކޯޕަރޭޓް ގަވާނަންސް ކޯޑަށް އަމަލުކުރުމާ ގުޅޭ ގޮތުން އާންމު އިރުޝާދުދީ އަދި ކުންފުނީގައި ކޯޕަރޭޓް ގަވާނަންސް ކޯޑާ ގުޅޭ ގޮތުން ފުރިހަމަނުވެ ހުރި ކަންތައްތައް ފާހަގަކޮށް އެކަންތައްތައް ފުރިހަމަކުރުމަށް ކީ ޕާފޯމަންސް އިންޑިކޭޓާސް ގޮތުގައި ފާހަގަ ކުރެވިފައިވާނެ ކަމަށް ވިދާޅުވިއެވެ. އަދި މި ކަންތައްތައް ފުރިހަމަ ވެފައިވާ މިންވަރު މި އަހަރު އެކުލަވާލެވޭ ކޯޕަރޭޓް ގަވާނަންސް ރިވިއު ރިޕޯޓް 2022 އަށް ބަލާ އިތުރަށް އަޅާނެ ފިޔަވަޅުތަކާމެދު މަޝްވަރާ ކުރެވޭނެ ކަމަށްވެސް ވިދާޅުވިއެވެ.
މިއާއެކު އަމީރު ވިދާޅުވީ ކޯޕަރޭޓް ގަވާނަންސް ކޯޑާ ހަވާލާދީ ވަކި ގޮތަކަށް އަމަލުކުރުމަށް އެންގިފައިވާ ކުންފުނިތަކުގެ ތެރޭގައި ވެމްކޯއާއި ފެނަކަ އަދި ޕީއެސްއެމް ހިމެނޭ ކަމަށެވެ. އަދި އެ ކުންފުނިތަކުން އެގޮތަށް އަމަލުކުރަން ފަށައިފައިވާ ކަމަށް ވެސް އަމީރުގެ ޖަވާބުގައި ވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
