ޗާގޯސް މައްސަލައިގައި ވަކާލާތުކުރަމުން ދައުލަތުން ވަނީ ބައިކޮޅަށް ގޯލު ޖަހާފައި: ތާރިގު

ފޯޅަވަހި މައްސަލައިގައި ދިވެހި ދައުލަތުން ދަމަހައްޓަމުން އައި ސްޓޭންޑް ސަރުކާރުން ބަދަލުކުރީ އެކަނި ނޫން ކަމަށާއި، ރާއްޖޭގެ ސަރަހައްދީ އިން ކަނޑައެޅުމާ ގުޅޭ ގޮތުން ޖަރުމަނުގައި ހުންނަ އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް) އަށް ހުށައަޅާފައިވާ މައްސަލައިގައި ވަކާލާތު ކުރައްވަމުން ދިވެހި ސަރުކާރުން ބައިކޮޅަށް ގޯލުވެސް ޖަހާފައިވާކަމަށް ރައްޔިތުންގެ މަޖިލީހުގެ މަހިބަދޫ ދާއިރާގެ މެމްބަރު އަހުމަދު ތާރިގު ވިދާޅުވެއްޖެ އެވެ.

ތާރިގު މިފަދައިން ވިދާޅުވެފައިވަނީ ފޯޅަވަހި މައްސަލައިގައި ސަރުކާރުން އަމަލުކުރަމުންދާ ގޮތާއި ގުޅިގެން ޕްރޮގްރެސިވް ކޮންގްރެސް ކޯލިޝަނުން ކުރަމުންދާ ތުހުމަތުތަކަށް ރައްދުދީ ސަރުކާރުން ނެރުނު ބަޔާނަށް ފާޑުވިދާޅުވެ ކުރެއްވި ޓްވީޓެއްގަ އެވެ.

އިދިކޮޅުގެ ތުހުމަތުތަކަށް ރައްދުދީ ސަރުކާރުން ނެރުނު ބަޔާނުގައި ބުނެފައިވަނީ ރާއްޖޭގެ ސަރަހައްދު ކަނޑައެޅުމުގެ މައްސަލައާއި ގުޅިގެން ދިވެހި ސަރުކާރުގެ ސްޓޭންޑް ބަދަލުކޮށްފައި ނުވާކަމަށެވެ. އަދި ސަރުކާރުން މަސައްކަތް ކުރަމުންދަނީ ގާނޫނީ އިމުގެ ތެރެއިން ރައްޔިތުންގެ މަސްލަހަތު އެންމެ ބޮޑަށް ހިމާޔަތްކުރެވޭނެ އުސޫލުގެ ތެރެއިން ކަމަށެވެ.

ސަރުކާރުގެ އެ ވާހަކަތަކާއި ގުޅިގެން ގިނަ ސުވާލުތަކެއް އަމާޒުކުރައްވާ ތާރިގު ވިދާޅުވީ ފޯޅަވަހީގެ ސިޔާދަތު މޮއިޝަސްއަށް ލިބެން ޖެހޭކަމަށް ބުނެ ސަރުކާރުގެ ސްޓޭންޑް ބަދަލުކުރި ކުރުމާއި މިހާރު އިޓްލޮސްގައި އޮތް މައްސަލައާއި ގުޅުމެއް ނެތް ނަމަ، އެ މައްސަލައިގައި ވަކާލާތު ކުރަމުން މޮރިޝަސްގެ ވަކީލުން ރައީސް ޞާލިހުގެ ސިއްރު ސިޓީފުޅުގެ ވާހަކަ ދެއްކެވީ ކީއްވެތޯ އައްސަވާފަ އެވެ.

އޭގެ އިތުރުން އެ މައްސަލައާއި ގުޅިގެން 20 އޮކްޓޫބަރުގައި ބޭއްވި ޝަރީއަތުގެ މަޖިލީހުގައި އެޓާނީ ޖެނެރަލް އެ ސިޓީފުޅުގެ ވާހަކަ ދެއްކެވީ ކޮން ސަބަބަކާއި ހުރެތޯވެސް ތާރިގު ވަނީ ސުވާލު ކުރައްވާފައެވެ.

އޭނާ ފާހަގަކުރެއްވި ގޮތުގައި މިއީ ގުޅިފައިވާ މައްސަލަތަކެވެ. އަދި އިދިކޮޅުން ދަނީ ރައީސް ޞާލިހުގެ ސިއްރު ސިޓީފުޅުގެ ސަބަބުން ރާއްޖޭގެ ކަނޑުގެ ސަރަހައްދުން ބައެއް ގެއްލުމުގެ ފުރުސަތު އޮތްކަމަށް ބުނެ ކަންބޮޑުވުން ފާޅުކުރަމުން ނެވެ.

ފޯޅަވަހި މައްސަލައިގައި ސަރުކާރުގެ ސްޓޭންޑް ބަދަލުކުރީ 500 މިލިއަން ޑޮލަރުގެ ޑީލެއްގެ ތެރެއިންކަމަށް އެމްޑީީޕީގެ އިސްބައެއް ބޭފުޅުންވެސް ގެންދަވަނީ ތުހުމަތު ކުރައްވަމުން ނެވެ. އަދި އެ ޑީލު ހެއްދެވުމުގެ ފަހަތުގައި ހުންނެވީ ފޮރިން މިނިސްޓަރު އަބްދުالله ޝާހިދުކަމަށްވެސް ތުހުމަތު ކުރެއެވެ.

ރާއްޖޭގެ ސަރަހައްދީ އިން ކަނޑައެޅުމާ ގުޅޭ ގޮތުން ޖަރުމަނުގައި ހުންނަ އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް) އަށް ހުށަހަޅާފައިވާ މައްސަލައިގައި ގޮތެއް ކަނޑައެޅުމަށް ހުކުރު ދުވަހުގެރޭ 8:00 އަށް ތާވަލުކޮށްފައިވާއިރު، ސަރުކާރުން ސްޓޭންޑް ބަދަލުކުރުމުގެ ސަބަބުން ރާއްޖެއިން ބައެއް ގެއްލުމުގެ ފުރުސަތު ބޮޑުކަމަށް ޤާނޫނީ ފަންނުގެ ބޭފުޅުންވެސް ގެންދަވަނީ ވިދާޅުވަމުން ނެވެ.