ޗާގޯސް މައްސަލަ އާއި ގުޅިގެން ކަންބޮޑުވުން ފާޅުކޮށް ޤާސިމްވެސް އިޓްލޮސްއަށް ސިޓީއެއް ފޮނުވައިފި

ޗާގޯސްގެ މައްސަލައިގައި ކަނޑުގެ ޤާނޫނުގެ ބައިނަލްއަޤުވާމީ ޓްރައިބިއުނަލް (އިޓްލޮސް) ގައި މިއަދު ހުކުމް ކުރުމަށް ތައްޔާރުވަމުންދާ މައްސަލާގައި، ޖުމްހޫރީޕާޓީ އިން ކަންބޮޑުވާކަންކަން ބަޔާންކޮށް އެ ޕާޓީގެ ލީޑަރ އަދި މާމިގިލީ ދާއިރާގެ މެންބަރު ޤާސިމް އިބްރާހީމް ގެ ސިޓީފުޅެއް އިޓޮލްސް އަށް ފޮނުއްވައިފިއެވެ.

ޤާސިމް އިޓްލޮސް އަށް ފޮނުއްވި ސިޓީ ހިއްސާ ކުރައްވައި، ކުރެއްވި ޓުވީޓެއްގައި އޭނާ ވަނީ، ޗާގޯސް މައްސަލާގައި ދިވެހި ސަރުކާރުން ޒަމާނުއްސުރެ ގެންގުޅެމުން އައި ސްޓޭންޑް ކުއްލިއަކަށް ބަދަލުކުރުމާއި ގުޅިގެން، ދިވެހިރާއްޖޭގެ ހާއްޞަ އިގްތިސާދީ ސަރަހައްދުން ބައެއް އުނިވުމުގެ ކަންބޮޑުވުން އޮތް ކަމަށެވެ.

އަދި ރައީސުލް ޖުމްހޫރިއްޔާ އިބްރާޙީމް މުހައްމަދު ޞާލިހު މޮރިޝަސް ގެ ބޮޑުވަޒީރަށް ފޮނުއްވި ސިޓީފުޅާއި، ދިވެހި ޤައުމުގެ ޤާނޫނު އަސާސީގެ 3 ވަނަ މާއްދާއާއި ފުށުއެރުންތަކެއް ހުރިކަމަށް ޤަބޫލު ކުރެވޭކަން ފާހަގަކުރައްވައި ގާސިމް ވިދާޅުވީ، އިޓްލޮސް އަށް ސިޓީ ފޮނުއްވާފައިވަނީ މިމައްސަލާގައި ދިވެހި ދައުލަތާއި ރައްޔިތުންގެ ހައްގުތައް އެންމެ ފުރިހަމައަށް ހިމާޔަތް ކުރުމުގެ ނިޔަތުގައި ކަމަށެވެ.

ގާސިމްގެ އިޓްލޮސް އަށް ފޮނުއްވި ސިޓީގައި އޭނާ ވަނީ، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު، މޮރިޝަސް ގެ ބޮޑުވަޒީރަށް ފޮނުއްވި ސިޓީއަކީ ދިވެހިރާއްޖޭގެ ސިޔާސީ ޕާޓީތަކާއި، ދިވެހި ހުރިހާ ރައްޔިތުން ވެސް ކަންބޮޑުވާ ކަމެއް ކަން ފާހަގަކުރައްވާފައެވެ. އަދި އެ ސިޓީގައި، ދިވެހިރާއްޖެއިން މޮރިޝަސް އާއި އެއްކޮޅަށް ވޯޓުދޭން ނިންމާފައިވާކަމަށް ބުނެފައިވާއިރު، އެ ނިންމުމަކީ އޭގެ ސަބަބުން ރާއްޖޭގެ ކަނޑުގެ ސަރަހައްދުން ބޮޑުބައެއް ގެއްލިގެން ދާނެ ކަމުގެ ބިރު އޮތް ނިންމުމެއްކަންވެސް އޭނާ ފާހަގަކުރެއްވިއެވެ.

މީގެ އިތުރުން، ގާސިމް ވިދާޅުވީ، ރާއްޖޭގެ ގާނޫނު އަސާސީގައިވާ ގޮތުން، ރައީސުލްޖުމްހޫރިއްޔާ އަށް އެފަދަ ނިންމުމެއް އަމިއްލައަށް ނުނިންމޭނެ ކަމަށާ، އެ ނިންމުން ނިންމޭނީ ރައްޔިތުންގެ މަޖިލީހުގެ މެންބަރުންގެ ރުހުންވެސް ލިބިގެންކަން ފާހަގަކުރައްވާފައެވެ.

ރާއްޖެއަކީ މަސްވެރިކަމަށް ނުހަނު ބަރޯސާވެފައިވާ ގައުމެއް ކަމަށްވާއިރު ޗާގޯސް މައްސަލާގައި ދިވެހި ސަރުކާރުން ސްޓޭންޑް ބަދަލުކުރުމުގެ ސަބަބުން، އެކަމަށް އަސަރު ކުރާނެ ކަމަށް ދެކެވޭކަން ފާހަގަކުރައްވައި، ގާސިމް ވަނީ އެ މައްސަލައިގައި އިޓްލޮސް އިން ގޮތެއް ނިންމުން ލަސްކުރުމަށް އެދިލައްވާފައެވެ. އަދި މައްސަލައިގައި ނިންމުމެއް ނިންމާއިރު, ދިވެހި ސަރުކާރުން ސްޓޭންޑް ބަދަލު ކުރުމުގެ ސަބަބުން އެއްވެސް ކަހަލަ މައްސަލައެއް ރާއްޖެއަށް ފެންމަތިވާނަމަ، އެކަމެއް އެއްކިބާކޮށް، ނިންމުން ނިންމުމަށްވެސް ގާސިމްވަނީ އެދިލައްވާފައެވެ.

ރާއްޖޭގެ ސަރަހައްދީ އިން ކަނޑައެޅުމާ ގުޅޭ ގޮތުން ޖަރުމަނުގައި ހުންނަ އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް) އަށް ހުށަހަޅާފައިވާ މައްސަލައިގައި ގޮތެއް ކަނޑައެޅުމަށް ހުކުރު ދުވަހުގެރޭ 8:00 އަށް ތާވަލުކޮށްފައިވާއިރު، ސަރުކާރުން ސްޓޭންޑް ބަދަލުކުރުމުގެ ސަބަބުން ރާއްޖެއިން ބައެއް ގެއްލުމުގެ ފުރުސަތު ބޮޑުކަމަށް ޤާނޫނީ ފަންނުގެ ބޭފުޅުންވެސް ގެންދަވަނީ ވިދާޅުވަމުން ނެވެ.