ޖުލައި މަހުގެ ތެރޭގައި ބިލެއްދޫގައި އޭޓީއެމްގެ ހިދުމަތް ފެށޭނެ: ރައީސް ޞާލިހު

ޖުލައި މަހުގެ ތެރޭގައި ފ. ބިލެއްދޫގައި އޭޓީއެމްގެ ހިދުމަތް ފެށޭނެ ކަމަށް ރައީސުލް ޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެއެވެ.

ރައީސް މިހެން ވިދާޅުވީ، ބިލެއްދޫ އާ އިންޖީނުގެއާއި އޮފީސް ހުޅުވުމުގެ ރަސްމިއްޔާތުގައި ވާހަކަ ދައްކަވަމުންނެވެ.

"ބިލެއްދޫ ދާއިރާގެ މެމްބަރުން އެދެމުންދާ އެއްކަމެއް އެއީ މިރަށުގަ އޭޓީއެއް އެމްގެ ހިދުމަތް ފޯރުކޮށްދިނުން. އިރާދަކުރެއްވިއްޔާ ސަރުކާރުގެ ސިޔާސަތުގެ ތެރެއިން އެންމެ ފުރަތަމަ ގާއިމު ކުރާ 10 އޭޓީއެމްގެ ތެރޭގަ ބިލެއްދޫ ހިމެނިގެން ދާނެ" ރައީސް ވިދާޅުވިއެވެ.

ރައީސް ވިދާޅުވީ މިހާރު ޕްލޭން ކުރެވިފައިވާ ގޮތުން، ޖުލައި މަހުގެ ތެރޭގައި ބިލެއްދޫގެ އޭޓީއެމްގެ ހިދުމަތް ލިބެން ފަށާވަރު ވާނެ ކަމަށެވެ.

ބިލެއްދޫ ރައްޔިތުންގެ ފަރާތުން ދެން އެންމެ ބޮޑަށް އެދޭ ކަމަކީ ރަށުގެ ބިން ބޮޑު ކުރުން ކަމަށް ރައީސް ވިދާޅުވިއެވެ. ބިލެއްދޫގެ ފަޅު ކުޑަކަން ފާހަގަ ކުރައްވައި ރައީސް ވިދާޅުވީ، ހިއްކެން އޮތް ވަރަކަށް ހިއްކައިދިނުމަށް އެރަށު ރައްޔިތުން އެދޭ ކަމަށެވެ.

ރިޔާސީ އިންތިހާބުގައި ވީ ވައުދުގެ ތެރޭގައި، ބިލެއްދޫ ބިން ހިއްކައި ބޯހިޔާވަހިކަން ފޯރުކޮށްދިނުން ހިމެނޭ ކަމަށް ރައީސް ވިދާޅުވިއެވެ.

އެގޮތުން އެރަށު ބަނދަރު ހެދުން އެމްޓީސީސީއާ ހަވާލު ކޮށްފައިވާކަން ފާހަގަ ކުރައްވައި ރައީސް ވިދާޅުވީ މިހާރު ކުރިއަށް ދަނީ އެ މަޝްރޫއުގެ ޑިޒައިންގެ މަސައްކަތް ކަމަށެވެ. އަދި އެ މަޝްރޫއުގެ ތެރޭގައި ހިމަނައިގެން ބިން ހިއްކުމުގެ މަސައްކަތްވެސް ކުރިއަށް ގެންދާނެ ކަމަށް ރައީސް ވިދާޅުވިއެވެ.

ރައީސް ފ. އަތޮޅަށް މި ކުރައްވާ ދަތުރުފުޅުގައި ވަޑައިގަތުމަށް ހަމަޖެހިފައި ވަނީ ފ. ނިލަންދޫ، ދަރަނބޫދޫ، މަގޫދޫ، ބިލެއްދޫ، އަދި ފީއައްޔަށެވެ.

މި ދަތުރުފުޅުގައި އެ ރަށްރަށުގަ ސަރުކާރުން ކުރިއަށް ގެންދިޔަ ބައެއް މަޝްރޫއުތައް ނިންމާ، ހިދުމަތްތައް އިފްތިތާހު ކުރުން ކުރިއަށް ގެންގޮސްދެއްވާނެއެވެ.

އަދި ކޮންމެ ރަށެއްގެ ރައްޔިތުންނާނއި، ކައުންސިލާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީއާ ރައީސް ބައްދަލު ކުރައްވާނެއެވެ.